ਸਿਆਸੀ ਨੇਤਾ ਤੇ ਵੱਡੇ ਕਿਸਾਨ ਵੀ ਨਹੀਂ ਛੱਡ ਰਹੇ ਬਿਜਲੀ ਸਬਸਿਡੀ
02/03/2020 1:43:42 PM
ਹੁਸ਼ਿਆਰਪੁਰ (ਅਮਰਿੰਦਰ)— ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਜੂਨ 2017 'ਚ ਬਿਜਲੀ ਸਬਸਿਡੀ ਲੈ ਰਹੇ ਸੂਬੇ ਦੇ 14 ਲੱਖ ਪਰਿਵਾਰ, ਜਿਸ 'ਚ ਸੰਪੰਨ ਕਿਸਾਨਾਂ, ਫਾਰਮ ਹਾਊਸਾਂ ਦੇ ਮਾਲਕਾਂ ਦੇ ਨਾਲ-ਨਾਲ ਰਾਜਨੀਤਕ ਦਲਾਂ ਦੇ ਨੇਤਾਵਾਂ ਸਮੇਤ ਉੱਚ ਅਧਿਕਾਰੀਆਂ ਦੇ ਕਿਸਾਨ ਪਰਿਵਾਰਾਂ ਨੂੰ ਇਹ ਸਹੂਲਤ ਲੈਣੀ ਬੰਦ ਕਰਨ ਦੀ ਅਪੀਲ ਕੀਤੀ ਸੀ।
ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਕਿਹਾ ਸੀ ਕਿ ਸੁੱਖ-ਸਹੂਲਤ ਵੱਲੋਂ ਸੰਪੰਨ ਕਿਸਾਨ ਜੇਕਰ ਬਿਜਲੀ ਸਬਸਿਡੀ ਲੈਣਾ ਬੰਦ ਕਰ ਦੇਣ ਤਾਂ ਇਸ ਦਾ ਸਿੱਧਾ-ਸਿੱਧਾ ਲਾਭ ਰਾਜ ਦੇ ਛੋਟੇ ਕਿਸਾਨਾਂ ਦੇ ਨਾਲ-ਨਾਲ ਜ਼ਰੂਰਤਮੰਦ ਗਰੀਬ ਪਰਿਵਾਰਾਂ ਨੂੰ ਮਿਲ ਸਕੇਗਾ। ਹੈਰਾਨੀ ਵਾਲੀ ਗੱਲ ਹੈ ਕਿ ਮੁੱਖ ਮੰਤਰੀ ਦੀ ਇਸ ਅਪੀਲ ਦੇ ਹੁਣ ਢਾਈ ਸਾਲ ਦੇ ਬਾਅਦ ਵੀ ਅੱਜ ਤੱਕ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਦੇ ਅਧੀਨ ਆਉਂਦੇ ਕਰੀਬ 60317 ਕਿਸਾਨਾਂ 'ਚੋਂ 40 ਹਜ਼ਾਰ ਤੋਂ ਜ਼ਿਆਦਾ ਵੱਡੇ-ਵੱਡੇ ਅਮੀਰ ਕਿਸਾਨਾਂ 'ਚੋਂ ਹੁਣ ਤੱਕ ਇਕ ਨੇ ਵੀ ਬਿਜਲੀ ਸਬਸਿਡੀ ਛੱਡਣ ਦਾ ਮਨ ਨਹੀਂ ਬਣਾਇਆ ਹੈ। ਇਹੀ ਨਹੀਂ ਆਮ ਤੌਰ 'ਤੇ ਸਾਰੇ ਰਾਜਨੀਤਕ ਦਲਾਂ ਦੇ ਵੱਡੇ-ਵੱਡੇ ਰਾਜਨੇਤਾਵਾਂ ਅਤੇ ਵੱਡੇ-ਵੱਡੇ ਕਿਸਾਨ ਵੀ ਸਬਸਿਡੀ ਦਾ ਮੋਹ ਨਹੀਂ ਛੱਡ ਪਾ ਰਹੇ ਹਨ।
ਛੋਟੇ ਕਿਸਾਨਾਂ ਨੂੰ ਨਹੀਂ ਮਿਲ ਰਹੀ ਸਬਸਿਡੀ ਦੀ ਇਹ ਸਹੂਲਤ
ਇਥੇ ਇਹ ਵੀ ਗੱਲ ਵਰਨਣਯੋਗ ਹੈ ਕਿ ਮੁਫਤ ਬਿਜਲੀ-ਪਾਣੀ ਦੀ ਸਹੂਲਤ ਛੋਟੇ ਕਿਸਾਨਾਂ ਨੂੰ ਬਹੁਤ ਘੱਟ ਮਿਲ ਰਹੀ ਹੈ। ਛੋਟੇ ਕਿਸਾਨ ਤਾਂ ਅੱਜ ਵੀ ਪਾਣੀ ਦਾ ਬਿੱਲ ਅਦਾ ਕਰਕੇ ਖੇਤੀ ਕਰਨ ਨੂੰ ਮਜਬੂਰ ਹਨ, ਜਦੋਂ ਕਿ ਇਸ ਸਹੂਲਤ ਦਾ ਸਭ ਤੋਂ ਜ਼ਿਆਦਾ ਲਾਭ ਰਾਜਨੀਤਕ ਪਾਰਟੀਆਂ ਦੇ ਨੇਤਾਵਾਂ ਅਤੇ ਉੱਚ ਅਧਿਕਾਰੀਆਂ ਦੇ ਕਿਸਾਨ ਪਰਿਵਾਰ ਹੀ ਲੈ ਰਹੇ ਹਨ। ਹੁਸ਼ਿਆਰਪੁਰ ਜ਼ਿਲੇ ਨਾਲ ਸਬੰਧਤ ਕਿਸਾਨ ਪਰਿਵਾਰਾਂ ਨਾਲ ਸਬੰਧ ਰੱਖਦੇ ਕਾਂਗਰਸ, ਅਕਾਲੀ-ਭਾਜਪਾ ਅਤੇ ਆਮ ਆਦਮੀ ਪਾਰਟੀ ਦੇ ਵਿਧਾਇਕ, ਸਾਬਕਾ ਵਿਧਾਇਕ ਅਤੇ ਸਾਬਕਾ ਮੰਤਰੀ ਸੰਪੰਨ ਹੁੰਦੇ ਹੋਏ ਵੀ ਅੱਜ ਇਸ ਸਹੂਲਤ ਦਾ ਭਰਪੂਰ ਲਾਭ ਲੈ ਰਹੇ ਹਨ। ਜਿਨ੍ਹਾਂ ਦੇ ਕੋਲ ਆਮ ਕਿਸਾਨਾਂ ਨਾਲੋਂ ਕਿਤੇ ਜ਼ਿਆਦਾ ਵੱਖ-ਵੱਖ ਕੰਮ-ਕਾਜ ਅਤੇ ਹੋਰ ਕਈ ਪ੍ਰਕਾਰ ਦੀਆਂ ਸਰਕਾਰੀ ਸੁਵਿਧਾਵਾਂ ਵੀ ਹਨ, ਉਹ ਵੀ ਬਿਜਲੀ ਦੀ ਮੁਫਤ ਸਹੂਲਤ ਦਾ ਅਨੰਦ ਲੈ ਰਹੇ ਹਨ।
ਔਸਤਨ ਮਹੀਨੇ 'ਚ 2 ਲੱਖ ਯੂਨਿਟ ਫੂਕ ਦਿੰਦੇ ਹਨ ਕਿਸਾਨ
ਪਾਵਰਕਾਮ ਦੇ ਅੰਕੜਿਆਂ ਅਨੁਸਾਰ ਸਰਕਾਰ ਕਿਸਾਨਾਂ ਨੂੰ ਮੁਫਤ ਬਿਜਲੀ-ਪਾਣੀ ਦੀ ਸਹੂਲਤ ਦੇਣ ਦੇ ਬਦਲੇ ਹਰ ਸਾਲ ਸਬੰਧਤ ਵਿਭਾਗ ਨੂੰ ਲੱਗਭਗ 6256 ਕਰੋੜ ਰੁਪਏ ਖੇਤੀਬਾੜੀ ਖੇਤਰ 'ਚ ਸਬਸਿਡੀ ਦੇ ਤੌਰ 'ਤੇ ਦਿੰਦੀ ਰਹੀ ਹੈ। ਜੇਕਰ ਗੱਲ ਪਾਵਰਕਾਮ ਹੁਸ਼ਿਆਰਪੁਰ ਸਰਕਲ ਦੀ ਕਰੀਏ ਤਾਂ ਹਰ ਮਹੀਨੇ ਕਿਸਾਨ 2 ਲੱਖ ਯੂਨਿਟ ਬਿਜਲੀ ਫੂਕ ਦਿੰਦੇ ਹਨ। ਅੰਕੜਿਆਂ ਅਨੁਸਾਰ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਦੇ ਅਧੀਨ 60317 ਟਿਊਬਵੈਲ ਕੁਨੈਕਸ਼ਨਾਂ ਦੀ ਸਹੂਲਤ ਲੈਣ ਵਾਲੇ ਕਿਸਾਨਾਂ 'ਚ ਕਰੀਬ 15 ਫੀਸਦੀ ਕਿਸਾਨ 3 ਏਕੜ ਤੋਂ ਘੱਟ ਜ਼ਮੀਨ 'ਚ ਖੇਤੀ ਕਰਦੇ ਹਨ। ਇਸ ਤਰ੍ਹਾਂ ਵੇਖਿਆ ਜਾਵੇ ਤਾਂ 3 ਏਕੜ ਤੋਂ ਜ਼ਿਆਦਾ 'ਚ ਖੇਤੀ ਕਰਨ ਵਾਲੇ 85 ਫੀਸਦੀ ਕਿਸਾਨ ਮੁਫਤ ਬਿਜਲੀ ਦੀ ਸਹੂਲਤ ਦਾ ਅਨੰਦ ਉਠਾ ਰਹੇ ਹਨ।
ਜਾਗਰੂਕਤਾ ਅਭਿਆਨ ਦੇ ਬਾਵਜੂਦ ਸਬਸਿਡੀ ਨਹੀਂ ਛੱਡ ਰਹੇ ਅਮੀਰ ਕਿਸਾਨ : ਇੰਜੀ. ਖਾਂਬਾ
ਜਦੋਂ ਇਸ ਸਬੰਧੀ ਹੁਸ਼ਿਆਰਪੁਰ ਪਾਵਰਕਾਮ ਦੇ ਡਿਪਟੀ ਚੀਫ ਇੰਜੀਨੀਅਰ ਪੀ. ਐੱਸ. ਖਾਂਬਾ ਤੋਂ ਪੁੱਛਿਆ ਤਾਂ ਉਨ੍ਹਾਂ ਨੇ ਸਵੀਕਾਰ ਕੀਤਾ ਕਿ ਲਗਾਤਾਰ ਚਲਾਏ ਜਾ ਰਹੇ ਜਾਗਰੂਕਤਾ ਅਭਿਆਨ ਦੇ ਬਾਵਜੂਦ ਢਾਈ ਸਾਲ ਗੁਜ਼ਰ ਜਾਣ ਦੇ ਬਾਅਦ ਵੀ ਅੱਜ ਤੱਕ ਹੁਸ਼ਿਆਰਪੁਰ ਪਾਵਰਕਾਮ ਸਰਕਲ ਦੇ ਕੋਲ ਇਕ ਵੀ ਕਿਸਾਨ ਬਿਜਲੀ ਸਬਸਿਡੀ ਛੱਡਣ ਲਈ ਨਹੀਂ ਅੱਪੜਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਜੇਕਰ ਕੋਈ ਕਿਸਾਨ ਜਾਂ ਸੰਸਥਾ ਐਗਰੀਕਲਚਰ ਪਾਵਰ ਸਬਸਿਡੀ ਹਾਸਲ ਕਰ ਰਹੇ ਹਨ ਤਾਂ ਉਨ੍ਹਾਂ ਨੂੰ ਆਪਣੀ ਸਮਾਜਕ ਜ਼ਿੰਮੇਵਾਰੀ ਸਮਝਦੇ ਹੋਏ ਸਬਸਿਡੀ ਸਿਰੰਡਰ ਕਰਨ 'ਚ ਕੋਈ ਝਿਜਕ ਨਹੀਂ ਵਿਖਾਉਣੀ ਚਾਹੀਦੀ ਹੈ। ਇਸਦੇ ਨਾਲ ਜਿੱਥੇ ਜ਼ਰੂਰਤਮੰਦ ਕਿਸਾਨਾਂ ਨੂੰ ਮੁਨਾਫ਼ਾ ਹੋਵੇਗਾ, ਉਥੇ ਹੀ ਰਾਜ ਦੀ ਤਰੱਕੀ 'ਚ ਵੀ ਉਹ ਯੋਗਦਾਨ ਦੇਣਗੇ।