ਓ. ਐੱਲ. ਐਕਸ. ਰਾਹੀਂ ਰੂਮ ਕਿਰਾਏ ''ਤੇ ਦੇਣਾ ਪਿਆ ਮਹਿੰਗਾ

ਖਰੜ (ਰਣਬੀਰ, ਅਮਰਦੀਪ, ਸ਼ਸ਼ੀ) : ਸਥਾਨਕ ਬਡਾਲਾ ਰੋਡ ਉੱਤੇ ਸਥਿਤ ਗੁਰੂ ਨਾਨਕ ਕਾਲੋਨੀ ਦੇ ਰਹਿਣ ਵਾਲੇ ਇਕ ਵਿਅਕਤੀ ਉੱਤੇ ਉਸ ਦੀ ਕਿਰਾਏਦਾਰ ਲੜਕੀ ਦੇ ਦੋਸਤ ਵਲੋਂ ਹਮਲਾ ਕਰ ਗੰਭੀਰ ਰੂਪ 'ਚ ਫੱਟੜ ਕਰ ਦੇਣ ਸਬੰਧੀ ਸੂਚਨਾ ਮਿਲੀ ਹੈ। ਜ਼ਖਮੀ ਹਾਲਤ 'ਚ ਉਕਤ ਵਿਅਕਤੀ ਨੂੰ ਪੀ. ਜੀ. ਆਈ. ਚੰਡੀਗੜ੍ਹ ਵਿਖੇ ਭਰਤੀ ਕਰਵਾਇਆ ਹੈ, ਜਿੱਥੇ ਉਹ ਜੇਰੇ ਇਲਾਜ ਦੱਸਿਆ ਜਾ ਰਿਹਾ ਹੈ। ਘਟਨਾ ਸਬੰਧੀ ਪੁਲਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ, ਜਿਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਪੂਰੇ ਮਾਮਲੇ ਬਾਰੇ ਜਾਣਕਾਰੀ ਦਿੰਦੇ ਹੋਏ ਉਕਤ ਥਾਂ ਦੇ ਰਹਿਣ ਵਾਲੇ ਸੰਜੀਵ ਵਰਮਾ ਨਾਂ ਦੇ ਵਿਅਕਤੀ ਨੇ ਦੱਸਿਆ ਕਿ ਉਸ ਨੇ ਆਪਣਾ ਰੂਮ ਕਿਰਾਏ ਉੱਤੇ ਦੇਣ ਦੇ ਲਈ ਇਸ ਦੀ ਜਾਣਕਾਰੀ ਓ. ਐੱਲ. ਐਕਸ. ਰਾਹੀਂ ਸਾਂਝੀ ਕੀਤੀ ਸੀ।

ਇਸ ਦੌਰਾਨ ਇਕ ਨੌਜਵਾਨ ਲੜਕੀ ਜੋ ਕਿ ਗੁਜਰਾਤ ਦੀ ਰਹਿਣ ਵਾਲੀ ਦੱਸੀ ਜਾ ਰਹੀ ਹੈ, ਵਲੋਂ ਉਸ ਦਾ ਇਹ ਕਮਰਾ ਕੁਝ ਦਿਨਾਂ ਦੇ ਲਈ ਕਿਰਾਏ (ਕਿਉਂਕਿ ਉਸ ਦਾ ਆਪਣਾ ਮਕਾਨ ਖਰੜ ਅੰਦਰ ਜਿੱਥੇ ਉਹ ਬਾਅਦ ਵਿਚ ਸ਼ਿਫ਼ਟ ਹੋ ਜਾਏਗੀ, ਤਿਆਰ ਹੋ ਰਿਹਾ ਹੈ) ਉੱਤੇ ਲੈਣ ਦੇ ਲਈ ਇੱਛਾ ਪ੍ਰਗਟ ਕੀਤੀ ਗਈ ਸੀ। ਸੰਜੀਵ ਨੇ ਦੱਸਿਆ ਕਿ ਉਹ ਲੜਕੀ ਕਿਰਾਇਆ ਦੇ ਕੇ ਉਸ ਦੇ ਰੂਮ ਦੇ ਅੰਦਰ ਰਹਿਣ ਲੱਗ ਪਈ ਪਰ ਕੁਝ ਦਿਨਾਂ ਬਾਅਦ ਉਸ ਲੜਕੀ ਦਾ ਇਕ ਦੋਸਤ ਲੜਕਾ ਉਸ ਨੂੰ ਮਿਲਣ ਦੇ ਲਈ ਆਇਆ, ਜਿਸ ਦੇ ਬਾਰੇ ਪੁੱਛਣ 'ਤੇ ਲੜਕੀ ਨੇ ਦੱਸਿਆ ਕਿ ਇਹ ਉਸ ਦਾ ਕਜ਼ਨ ਹੈ ਜੋ ਕਿ ਇੱਥੇ ਕੰਮ ਆਇਆ ਹੈ ਅਤੇ 2 ਦਿਨ ਰਹਿਣ ਮਗਰੋਂ ਵਾਪਸ ਚਲਾ ਜਾਵੇਗਾ ਪਰ 2 ਦਿਨਾਂ ਬਾਅਦ ਵੀ ਜਦੋਂ ਉਹ ਲੜਕਾ ਵਾਪਸ ਨਾ ਗਿਆ ਤਾਂ ਕੁਝ ਸ਼ੱਕ ਹੋਣ 'ਤੇ ਸੰਜੀਵ ਮੁਤਾਬਕ ਉਸ ਨੇ ਕਿਰਾਏਦਾਰ ਲੜਕੀ ਨੂੰ ਉਸ ਲੜਕੇ ਨੂੰ ਇੱਥੋਂ ਭੇਜ ਦੇਣ ਜਾਂ ਉਸ ਦਾ ਕਮਰਾ ਖ਼ਾਲੀ ਕਰ ਦੇਣ ਦੇ ਲਈ ਕਿਹਾ। ਮਕਾਨ ਮਾਲਕ ਦੇ ਇਸ ਇਤਰਾਜ਼ ਤੋਂ ਵਾਕਿਫ ਹੁੰਦਿਆਂ ਹੀ ਉਸ ਲੜਕੀ ਨੇ ਲੜਕੇ ਨੂੰ ਉੱਥੋਂ ਭੇਜ ਦਿੱਤਾ।

ਇਸ ਦੇ 2 ਦਿਨਾਂ ਮਗਰੋਂ ਹੀ ਉਹ ਇਹ ਕਹਿ ਕੇ ਇੱਥੋਂ ਚਲੀ ਗਈ ਕਿ ਉਹ ਗੁਜਰਾਤ ਆਪਣੇ ਘਰ ਜਾ ਰਹੀ ਹੈ ਅਤੇ ਕੁਝ ਦਿਨਾਂ ਬਾਅਦ ਵਾਪਸ ਆਏਗੀ। ਅਖੀਰ ਕੁਝ ਦਿਨਾਂ ਮਗਰੋਂ ਉਹ ਲੜਕੀ ਵਾਪਸ ਆ ਗਈ ਅਤੇ ਰੂਮ ਦੀ ਚਾਬੀ ਜੋ ਉਸ ਨੂੰ ਪਤਾ ਸੀ ਕਿ ਕਿੱਥੇ ਰੱਖੀ ਹੁੰਦੀ ਹੈ, ਲੈ ਕੇ ਕਮਰੇ ਅੰਦਰ ਚਲੀ ਗਈ। ਸੰਜੀਵ ਮੁਤਾਬਕ ਉਹ ਅਗਲੇ ਦਿਨ ਜਦੋਂ ਆਪਣੇ ਉਸ ਕਿਰਾਏ ਉੱਤੇ ਦਿੱਤੇ ਕਮਰੇ ਵਾਲੇ ਪਾਸੇ ਗਿਆ ਤਾਂ ਦੇਖਿਆ ਤਾਂ ਲੜਕੀ ਤੋਂ ਇਲਾਵਾ ਕੋਈ ਹੋਰ ਵੀ ਉਸ ਦੇ ਨਾਲ ਕਮਰੇ ਅੰਦਰ ਮੌਜੂਦ ਸੀ। ਇਸ ਬਾਰੇ ਪੁੱਛਣ 'ਤੇ ਉਸ ਲੜਕੀ ਨੇ ਦੱਸਿਆ ਕੀ ਇਹ ਉਸ ਦੇ ਨਾਲ ਆਇਆ ਉਸ ਦਾ ਰਿਸ਼ਤੇਦਾਰ ਹੈ ਜੋ ਆਪਣੇ ਕਿਸੇ ਕੰਮ ਦੇ ਲਈ ਇੱਥੇ ਆਇਆ ਹੈ, ਕੰਮ ਹੋਣ ਤੋਂ ਮਗਰੋਂ ਉਹ ਵਾਪਸ ਚਲਾ ਜਾਵੇਗਾ।

ਸੰਜੀਵ ਨੇ ਲੜਕੀ ਦੇ ਉਸ ਰਿਸ਼ਤੇਦਾਰ ਨੂੰ ਮਿਲਣ ਦੀ ਇੱਛਾ ਪ੍ਰਗਟ ਕੀਤੀ ਤਾਂ ਲੜਕੀ ਨੇ ਕਿਹਾ ਕਿ ਉਹ ਅਜੇ ਆਰਾਮ ਕਰ ਰਹੇ ਹਨ, ਇਸ ਲਈ ਤੁਸੀਂ ਫਿਰ ਕਦੇ ਉਨ੍ਹਾਂ ਨੂੰ ਮਿਲ ਲੈਣਾ। ਸੰਜੀਵ ਨੇ ਦੱਸਿਆ ਕਿ ਉਹ ਅਗਲੇ ਦਿਨ ਜਦੋਂ ਉਸ ਕਮਰੇ ਵੱਲ ਗਏ ਤਾਂ ਦੇਖਿਆ ਕਿ ਇਹ ਉਹੀ ਲੜਕਾ ਸੀ ਜੋ ਪਹਿਲਾਂ ਵੀ ਉਸ ਦੇ ਨਾਲ ਕਜ਼ਨ ਵਜੋਂ ਰਹਿ ਕੇ ਗਿਆ ਸੀ। ਉਸ ਦਾ ਸ਼ੱਕ ਯਕੀਨ ਵਿਚ ਬਦਲ ਗਿਆ, ਇਸ ਲਈ ਉਸ ਨੇ ਫੌਰਨ ਉਸ ਲੜਕੀ ਨੂੰ ਸੱਦ ਕੇ ਕਮਰਾ ਖਾਲੀ ਕਰਨ ਦੇ ਲਈ ਕਿਹਾ ਪਰ ਲੜਕੀ ਵਲੋਂ ਇਸ ਦੇ ਲਈ ਮੁਆਫੀ ਮੰਗਦਿਆਂ 15 ਦਿਨਾਂ ਦੀ ਮੋਹਲਤ ਮੰਗੀ ਗਈ ਅਤੇ ਕਿਹਾ ਕਿ ਉਹ ਇਨ੍ਹਾਂ ਦਿਨਾਂ ਦੇ ਅੰਦਰ-ਅੰਦਰ ਕਮਰਾ ਖਾਲੀ ਕਰ ਦੇਵੇਗੀ ਪਰ ਸੰਜੀਵ ਨੇ ਇਹ ਮੋਹਲਤ ਇਸ ਸ਼ਰਤ ਉੱਤੇ ਦਿੱਤੀ ਸੀ ਕਿ ਉਹ ਲੜਕਾ ਮੁੜ ਇੱਥੇ ਨਹੀਂ ਆਏਗਾ।

ਇਸ ਲਈ ਲੜਕੀ ਦੇ ਕਹਿਣ ਉੱਤੇ ਉਸ ਦਾ ਦੋਸਤ ਨੌਜਵਾਨ ਲੜਕਾ ਉੱਥੋਂ ਚਲਾ ਗਿਆ ਪਰ ਇਸ ਦੇ ਇਕ 2 ਦਿਨਾਂ ਤੋਂ ਬਾਅਦ ਅਚਾਨਕ ਪੌੜੀਆਂ ਤੋਂ ਉਤਰਦਿਆਂ ਹੋਇਆਂ ਉਹ ਲੜਕੀ ਪੈਰ ਫਿਸਲ ਕੇ ਡਿਗ ਪਈ, ਜਿਸ ਦੇ ਪੈਰ 'ਤੇ ਸ਼ਾਇਦ ਗੰਭੀਰ ਸੱਟ ਲੱਗੀ ਸੀ ਕਿਉਂਕਿ ਉਸ ਤੋਂ ਚੱਲਿਆ ਨਹੀਂ ਸੀ ਜਾ ਰਿਹਾ। ਇਸ ਲਈ ਲੜਕੀ ਨੇ ਰੋਂਦਿਆਂ ਉਸ ਨੂੰ ਹਸਪਤਾਲ ਲੈ ਜਾਣ ਲਈ ਕਿਹਾ, ਜਿਸ ਦੇ ਕਹਿਣ 'ਤੇ ਸੰਜੀਵ ਉਸ ਨੂੰ ਸਿਵਲ ਹਸਪਤਾਲ ਖਰੜ ਲੈ ਗਿਆ, ਜਿੱਥੇ ਇਲਾਜ ਮਗਰੋਂ ਉਸ ਨੇ ਮੁੜ ਉਸ ਲੜਕੀ ਨੂੰ ਲੈ ਕੇ ਰੂਮ ਦੇ ਅੰਦਰ ਛੱਡ ਦਿੱਤਾ। ਇਸ ਦੇ ਕੁਝ ਪਲਾਂ ਦਰਮਿਆਨ ਹੀਂ ਉਹੀ ਲੜਕਾ ਮੁੜ ਉਸ ਲੜਕੀ ਦਾ ਪਤਾ ਲੈਣ ਕਮਰੇ ਅੰਦਰ ਪਹੁੰਚ ਗਿਆ।

ਇਸ ਦੌਰਾਨ ਲੜਕੇ ਨੇ ਸੰਜੀਵ ਕੁਮਾਰ ਨੂੰ ਅੰਦਰ ਬੁਲਾ ਕੇ ਬੁਰਾ-ਭਲਾ ਆਖਦਿਆਂ ਅਚਾਨਕ ਉਸ ਉੱਤੇ ਹਮਲਾ ਕਰ ਕੇ ਜ਼ਖਮੀ ਕਰ ਦਿੱਤਾ ਤੇ ਉਹ ਬੇਹੋਸ਼ ਹੋ ਗਿਆ , ਜਿਸ ਦਾ ਫਾਇਦਾ ਚੁੱਕ ਉਹ ਲੜਕਾ ਉਥੋਂ ਫਰਾਰ ਹੋ ਗਿਆ, ਇਸ ਸਭ ਦਾ ਰੌਲਾ ਸੁਣ ਕੇ ਇਕੱਠੇ ਹੋਏ ਆਂਢੀ-ਗੁਆਂਢੀਆਂ ਵਲੋਂ ਉਸ ਨੂੰ ਚੁੱਕ ਕੇ ਸਿਵਲ ਹਸਪਤਾਲ ਖਰੜ ਭਰਤੀ ਕਰਵਾਇਆ ਗਿਆ। ਇਥੋਂ ਮੁੱਢਲੀ ਡਾਕਟਰੀ ਸਹਾਇਤਾ ਮਗਰੋਂ ਉਸ ਨੂੰ ਸੈਕਟਰ-16 ਜਨਰਲ ਹਸਪਤਾਲ ਲਈ ਰੈਫਰ ਕਰ ਦਿੱਤਾ ਗਿਆ ਪਰ ਕਿਉਂਕਿ ਚੋਟ ਗੰਭੀਰ ਸੀ, ਇਸ ਲਈ ਉੱਥੋਂ ਵੀ ਉਸ ਨੂੰ ਅੱਗੇ ਪੀ. ਜੀ. ਆਈ. ਲਈ ਰੈਫਰ ਕਰ ਦਿੱਤਾ ਗਿਆ ਜਿੱਥੇ ਉਹ ਅਜੇ ਤੱਕ ਜ਼ੇਰੇ ਇਲਾਜ ਹੈ। ਇਸ ਘਟਨਾ ਸਬੰਧੀ ਖਰੜ ਸਿਟੀ ਪੁਲਸ ਨੂੰ ਸੂਚਿਤ ਕੀਤਾ ਗਿਆ ਤਾਂ ਪੁਲਸ ਨੇ ਮੌਕੇ ਉੱਤੇ ਪਹੁੰਚ ਕੇ ਸੰਜੀਵ ਕੁਮਾਰ ਦੇ ਬਿਆਨ ਕਲਮਬੱਧ ਕਰਦਿਆਂ ਇਸ ਪੂਰੇ ਮਾਮਲੇ ਦੀ ਜਾਂਚ ਆਪਣੇ ਪੱਧਰ ਉੱਤੇ ਸ਼ੁਰੂ ਕਰ ਦਿੱਤੀ ਹੈ।