ਸਿਵਲ ਹਸਤਪਾਲ ਦੇ ਪਾਰਕ ’ਚ ਬਜ਼ੁਰਗ ਵਿਅਕਤੀ ਦੀ ਸ਼ੱਕੀ ਹਾਲਾਤ ’ਚ ਮੌਤ

ਲੁਧਿਆਣਾ (ਰਾਜ) : ਸਿਵਲ ਹਸਪਤਾਲ ’ਚ ਇਕ ਬਜ਼ੁਰਗ ਦੀ ਪਾਰਕ ’ਚ ਸ਼ੱਕੀ ਹਾਲਾਤ ’ਚ ਮੌਤ ਹੋ ਗਈ। ਮ੍ਰਿਤਕ ਹੀਰਾ ਲਾਲ (65) ਜੋ ਕਿ ਬੀਮਾਰੀ ਕਾਰਨ ਹਸਪਤਾਲ ’ਚ ਦਾਖ਼ਲ ਹੋਇਆ ਸੀ। ਚੌਂਕੀ ਸਿਵਲ ਹਸਪਤਾਲ ਦੀ ਪੁਲਸ ਨੇ ਲਾਸ਼ ਕਬਜ਼ੇ ’ਚ ਲੈ ਕੇ ਮੋਰਚਰੀ ’ਚ ਰਖਵਾ ਦਿੱਤੀ ਹੈ। ਜਾਣਕਾਰੀ ਮੁਤਾਬਿਕ ਹੀਰਾ ਲਾਲ ਘੰਟਾ ਘਰ ਚੌਂਕ ਨੇੜੇ ਫੁੱਟਪਾਥ ’ਤੇ ਹੀ ਰਹਿੰਦਾ ਸੀ। ਉਹ ਖ਼ੁਦ ਹੀ ਸਿਵਲ ਹਸਪਤਾਲ ਆਇਆ ਸੀ।

ਇਸ ਤੋਂ ਬਾਅਦ ਉਸ ਦੀ ਹਾਲਤ ਦੇਖਦੇ ਹੋਏ ਡਾਕਟਰਾਂ ਨੇ ਉਸ ਨੂੰ ਦਾਖ਼ਲ ਕਰ ਲਿਆ ਸੀ। ਐਮਰਜੈਂਸੀ ’ਚ ਉਸ ਨੂੰ ਇੰਜੈਕਸ਼ਨ ਅਤੇ ਦਵਾਈ ਦਿੱਤੀ ਗਈ ਸੀ। ਇਸ ਤੋਂ ਬਾਅਦ ਅਚਾਨਕ ਉਹ ਖ਼ੁਦ ਹੀ ਐਮਰਜੈਂਸੀ ਤੋਂ ਨਿਕਲ ਕੇ ਪਾਰਕ ’ਚ ਆ ਗਿਆ ਸੀ। ਉਸ ਨੇ ਪਹਿਲਾਂ ਅੰਨ-ਜਲ ਸੇਵਾ ਟਰੱਸਟ ਤੋਂ ਲੰਗਰ ਲਿਆ ਅਤੇ ਪਾਰਕ ’ਚ ਬੈਠ ਖਾਣ ਲੱਗਿਆ। ਲੰਗਰ ਖਾਂਦੇ-ਖਾਂਦੇ ਹੀ ਅਚਾਨਕ ਉਸ ਦੀ ਸਿਹਤ ਵਿਗੜ ਗਈ। ਆਸ-ਪਾਸ ਦੇ ਲੋਕਾਂ ਨੇ ਉਸ ਨੂੰ ਪਾਣੀ ਵੀ ਪਿਲਾਇਆ ਪਰ ਉਸ ਦੀ ਮੌਤ ਹੋ ਗਈ।