ਸਹੁਰਿਆਂ ਨੇ ਧੋਖੇ ਨਾਲ ਵਿਆਹੁਤਾ ਦਾ ਕਰਵਾਇਆ ਗਰਭਪਾਤ, 8 ਸਾਲਾਂ ਦੀ ਧੀ ਸਮੇਤ ਘਰੋਂ ਕੱਢਿਆ
03/06/2021 4:20:04 PM
ਲੁਧਿਆਣਾ (ਵਰਮਾ) : ਇੱਥੇ ਜ਼ਾਲਮ ਸਹੁਰਿਆਂ ਵੱਲੋਂ ਪਹਿਲਾਂ ਵਿਆਹੁਤਾ ਦਾ ਧੋਖੇ ਨਾਲ ਗਰਭਪਾਤ ਕਰਵਾ ਦਿੱਤਾ ਗਿਆ ਅਤੇ ਫਿਰ ਉਸ ਨੂੰ 8 ਸਾਲਾਂ ਦੀ ਧੀ ਸਮੇਤ ਘਰੋਂ ਬਾਹਰ ਕੱਢ ਦਿੱਤਾ। ਘਰੇਲੂ ਹਿੰਸਾ ਦੀ ਸ਼ਿਕਾਰ ਨੀਤੂ ਸ਼ਰਮਾ ਵਾਸੀ ਨਿਊ ਵਿਸ਼ਾਲ ਨਗਰ ਨੇ 15 ਜਨਵਰੀ, 2020 ਨੂੰ ਪੁਲਸ ਨੂੰ ਇਸ ਸਬੰਧੀ ਲਿਖਤੀ ਸ਼ਿਕਾਇਤ ਦਿੱਤੀ। ਉਸ ਨੇ ਸ਼ਿਕਾਇਤ 'ਚ ਆਪਣੇ ਪਤੀ, ਸੱਸ, ਸਹੁਰਾ, ਨਨਾਣ, ਅਤੇ ਨਣਦੋਈ ਖ਼ਿਲਾਫ਼ ਦਾਜ ਲਈ ਮਾਨਸਿਕ ਅਤੇ ਸਰੀਰਕ ਤੌਰ ’ਤੇ ਤੰਗ-ਪਰੇਸ਼ਾਨ ਕਰਨ ਦੇ ਗੰਭੀਰ ਦੋਸ਼ ਲਗਾਏ ਹਨ। ਪੁਲਸ ਕਮਿਸ਼ਨਰ ਨੇ ਪੀੜਤਾ ਦੀ ਸ਼ਿਕਾਇਤ ਨੂੰ ਥਾਣਾ ਵੂਮੈੱਨ ਸੈੱਲ ਦੀ ਪੁਲਸ ਕੋਲ ਜਾਂਚ ਕਰਨ ਲਈ ਭੇਜ ਦਿੱਤਾ। ਪੁਲਸ ਨੇ ਜਾਂਚ ਤੋਂ ਬਾਅਦ ਏ. ਐੱਸ. ਆਈ. ਸੁਖਦੇਵ ਸਿੰਘ ਨੇ ਨੀਤੂ ਸ਼ਰਮਾ ਦੇ ਪਤੀ ਮੋਹਿਤ ਸ਼ਰਮਾ, ਸਹੁਰਾ ਕੈਲਾਸ਼ ਸ਼ਰਮਾ, ਸੱਸ ਰਾਜ ਰਾਣੀ ਵਾਸੀ ਸ਼ਿਵਾਲਿਕ ਐਵੇਨਿਊ ਰੋਪੜ ਖ਼ਿਲਾਫ਼ ਪਰਚਾ ਦਰਜ ਕਰ ਲਿਆ ਹੈ।
ਜਾਣੋ ਕੀ ਹੈ ਮਾਮਲਾ
ਵਿਆਹ ਤੋਂ 8 ਸਾਲ ਤੱਕ ਸਹੁਰੇ ਵਾਲਿਆਂ ਦੇ ਹਰ ਜ਼ੁਲਮ ਨੂੰ ਸਹਿਣ ਕਰਨ ਵਾਲੀ ਨੀਤੂ ਸ਼ਰਮਾ ਨੇ ਸਹੁਰਾ ਪਰਿਵਾਰ ’ਤੇ ਦੋਸ਼ ਲਗਾਉਂਦੇ ਹੋਏ ਦੱਸਿਆ ਕਿ ਉਸ ਦਾ ਵਿਆਹ 26 ਅਕਤੂਬਰ, 2012 ਨੂੰ ਮੋਹਿਤ ਸ਼ਰਮਾ ਦੇ ਨਾਲ ਬੜੀ ਧੂਮਧਾਮ ਨਾਲ ਹੋਇਆ ਸੀ। ਵਿਆਹ 'ਚ ਉਸ ਦੇ ਪੇਕਿਆਂ ਨੇ ਆਪਣੀ ਹੈਸੀਅਤ ਤੋਂ ਜ਼ਿਆਦਾ ਦਾਜ ਦਿੱਤਾ ਸੀ। ਇਸ ਦੇ ਬਾਵਜੂਦ ਸਹੁਰੇ ਵਿਆਹ ਤੋਂ 10 ਦਿਨ ਬਾਅਦ ਹੀ ਉਸ ਨੂੰ ਦਾਜ ਘੱਟ ਲਿਆਉਣ ਲਈ ਪਰੇਸ਼ਾਨ ਕਰਨ ਲੱਗੇ। ਸਮਾਂ ਬੀਤਣ 'ਤੇ ਉਸ ਨੇ ਇਕ ਧੀ ਨੂੰ ਜਨਮ ਦਿੱਤਾ ਤਾਂ ਸਹੁਰਿਆਂ ਨੇ ਉਸ ’ਤੇ ਹੋਰ ਜ਼ੁਲਮ ਕਰਨੇ ਸ਼ੁਰੂ ਕਰ ਦਿੱਤੇ। ਉਹ ਆਪਣੀ ਧੀ ਖ਼ਾਤਰ ਸਹੁਰਿਆਂ ਦੇ ਜ਼ੁਲਮ ਸਹਿੰਦੀ ਰਹੀ।
ਦੂਜੀ ਵਾਰ ਜਦੋਂ ਉਹ ਗਰਭਵਤੀ ਹੋਈ ਤਾਂ ਸਹੁਰਿਆਂ ਨੇ ਧੋਖੇ ਨਾਲ ਦਵਾਈ ਖਿਲਾ ਕੇ ਉਸ ਦਾ ਗਰਭਪਾਤ ਕਰਵਾ ਦਿੱਤਾ। ਪੀੜਤਾ ਨੇ ਦੱਸਿਆ ਕਿ ਜਦੋਂ ਇਹ ਗੱਲਾਂ ਉਸ ਨੇ ਆਪਣੇ ਪੇਕਿਆਂ ਨੂੰ ਦੱਸੀਆਂ ਤਾਂ ਉਨ੍ਹਾਂ ਨੇ ਸਹੁਰਿਆਂ ਨੂੰ ਧੀ ਨਾਲ ਕੁੱਟਮਾਰ ਕਰਨ ਸਬੰਧੀ ਪੁੱਛਿਆ। ਇਸ ਦੌਰਾਨ ਸਹੁਰਿਆਂ ਨੇ ਉਸ ਦੇ ਪੇਕਿਆਂ ਨਾਲ ਭੱਦੀ ਭਾਸ਼ਾ ਦੀ ਵਰਤੋਂ ਕਰਦਿਆਂ ਉਨ੍ਹਾਂ ਨੂੰ ਘਰੋਂ ਕੱਢ ਦਿੱਤਾ। ਉਨ੍ਹਾਂ ਦੇ ਜਾਣ ਤੋਂ ਬਾਅਦ ਫਿਰ ਸਹੁਰਿਆਂ ਨੇ ਉਸ ਨਾਲ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਤਾਂ ਉਹ ਆਪਣੇ ਪੇਕੇ ਵਾਪਸ ਆ ਗਈ। ਫਿਰ ਉਸ ਦੇ ਸਹੁਰੇ ਪੰਚਾਇਤੀ ਫ਼ੈਸਲੇ ਤੋਂ ਬਾਅਦ ਉਸ ਨੂੰ ਆਪਣੇ ਨਾਲ ਵਾਪਸ ਲੈ ਗਏ। ਕੁੱਝ ਦਿਨਾਂ ਬਾਅਦ ਫਿਰ ਦਾਜ ਦੇ ਲੋਭੀ ਸਹੁਰੇ ਉਸ ਨੂੰ ਪਰੇਸ਼ਾਨ ਕਰਨ ਲੱਗੇ ਅਤੇ ਉਸ ਨੂੰ ਉਸ ਦੀ 8 ਸਾਲਾ ਧੀ ਸਮੇਤ ਘਰੋਂ ਬਾਹਰ ਕੱਢ ਦਿੱਤਾ।
