ਲੁਧਿਆਣਾ ਦੇ ਕਾਰੋਬਾਰੀ ਵੱਲੋਂ ਖ਼ੁਦਕੁਸ਼ੀ ਮਾਮਲੇ ''ਚ ਨਵਾਂ ਮੋੜ, ਹੋਏ ਸਨਸਨੀਖੇਜ਼ ਖ਼ੁਲਾਸੇ

ਲੁਧਿਆਣਾ (ਰਾਜ): ਪ੍ਰਾਪਰਟੀ ਡੀਲਰ ਪਲਵਿੰਦਰ ਸਿੰਘ ਉਰਫ਼ ਰਿੰਪੀ ਅਨੇਜਾ ਵੱਲੋਂ ਮੌਤ ਨੂੰ ਗਲੇ ਲਗਾਉਣ ਦੇ ਮਾਮਲੇ ਨੇ ਹੁਣ ਇਕ ਨਵਾਂ ਅਤੇ ਭਿਆਨਕ ਮੋੜ ਲੈ ਲਿਆ ਹੈ। ਰਿੰਪੀ ਅਨੇਜਾ ਦੀ ਖੁਦਕੁਸ਼ੀ ਦੇ ਪਿੱਛੇ ਸਿਰਫ ਮਾਨਸਿਕ ਪਰੇਸ਼ਾਨੀ ਹੀ ਨਹੀਂ, ਸਗੋਂ ਲੁਧਿਆਣਾ ਇੰਪਰੂਵਮੈਂਟ ਟਰੱਸਟ ਵਿਚ ਹੋਇਆ ਕਰੋੜਾਂ ਦਾ 'ਪਲਾਟ ਸਕੈਮ' ਵੀ ਇਕ ਵੱਡੀ ਵਜ੍ਹਾ ਬਣ ਕੇ ਸਾਹਮਣੇ ਆ ਰਹੀ ਹੈ। ਚਰਚਾ ਹੈ ਕਿ ਸ਼ਹੀਦ ਭਗਤ ਸਿੰਘ ਨਗਰ ਦੇ ਪਲਾਟ ਨੰਬਰ 35-ਸੀ ਦੇ ਤਬਾਦਲੇ ਵਿਚ ਪਿਛਲੇ ਸਾਲ ਅਗਸਤ 2025 ਦੌਰਾਨ ਇਕ ਵੱਡੀ ਖੇਡ ਰਚੀ ਗਈ ਸੀ।

ਇਲਜ਼ਾਮ ਹੈ ਕਿ ਟਰੱਸਟ ਦੇ ਅਧਿਕਾਰੀਆਂ ਨੇ ਨਿਯਮਾਂ ਦੀਆਂ ਧੱਜੀਆਂ ਉਡਾਉਂਦੇ ਹੋਏ ਅਸਲੀ ਅਲਾਟੀ ਅਤੇ ਅਟਾਰਨੀ ਹੋਲਡਰ ਦੀ ਗੈਰ-ਮੌਜੂਦਗੀ ਵਿਚ ਹੀ ਕਰੋੜਾਂ ਦੇ ਇਸ ਪਲਾਟ ਨੂੰ ਰਸੂਖਦਾਰਾਂ ਦੇ ਨਾਂ ਟ੍ਰਾਂਸਫਰ ਕਰ ਦਿੱਤਾ। ਰਿੰਪੀ ਅਨੇਜਾ ਨੇ ਇਸ ਸਕੈਮ ਨੂੰ ਲੈ ਕੇ ਮੁੱਖ ਮੰਤਰੀ ਅਤੇ ਸਥਾਨਕ ਨਿਕਾਏ ਵਿਭਾਗ ਤੱਕ ਗੁਹਾਰ ਲਗਾਈ ਸੀ, ਪਰ ਰਸੂਖਦਾਰਾਂ ਦੀ ਪਹੁੰਚ ਕਾਰਨ ਮਾਮਲੇ ਨੂੰ ਠੰਡੇ ਬਸਤੇ ਵਿਚ ਪਾ ਦਿੱਤਾ ਗਿਆ। ਇਸ ਮਾਮਲੇ ਵਿਚ ਪੁਲਸ ਨੇ ਜਿਨ੍ਹਾਂ 10 ਲੋਕਾਂ ਦੇ ਖਿਲਾਫ਼ ਮਾਮਲਾ ਦਰਜ ਕੀਤਾ ਹੈ, ਉਨ੍ਹਾਂ ਵਿਚ ਸ਼ਹਿਰ ਦੇ ਨਾਮੀ ਹੋਟਲ ਮਾਲਕ, ਲੋਹਾ ਕਾਰੋਬਾਰੀ, ਸ਼ੇਅਰ ਬ੍ਰੋਕਰ ਅਤੇ ਵੱਡੇ ਕਾਲੋਨਾਈਜ਼ਰ ਸ਼ਾਮਲ ਹਨ। ਐੱਫ.ਆਈ.ਆਰ. ਵਿਚ ਇੰਪਰੂਵਮੈਂਟ ਟਰੱਸਟ ਦੇ ਸੁਪਰਡੈਂਟ ਅਤੇ ਈਓ (EO) ਦੇ ਪੀਏ ਹਰਪ੍ਰੀਤ ਸਿੰਘ ਦਾ ਨਾਂ ਮੁੱਖ ਤੌਰ 'ਤੇ ਸਾਹਮਣੇ ਆਇਆ ਹੈ, ਜਿਸ ਦਾ ਜ਼ਿਕਰ ਰਿੰਪੀ ਨੇ ਮਰਨ ਤੋਂ ਪਹਿਲਾਂ ਬਣਾਈ ਆਪਣੀ ਵੀਡੀਓ ਵਿਚ ਵੀ ਕੀਤਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਪਲਾਟ ਦੀ ਬਕਾਇਆ ਕਰੋੜਾਂ ਦੀ ਰਾਸ਼ੀ ਨੂੰ ਜਮ੍ਹਾਂ ਕਰਵਾਉਣ ਵਿਚ ਵੀ ਭਾਰੀ ਹੇਰਾਫੇਰੀ ਕੀਤੀ ਗਈ ਅਤੇ ਬਿਨਾਂ ਸਰਕਾਰੀ ਮਨਜ਼ੂਰੀ ਦੇ ਹੀ ਫਾਈਲਾਂ ਪਾਸ ਕਰ ਦਿੱਤੀਆਂ ਗਈਆਂ। ਜਿਵੇਂ ਹੀ ਐੱਫ.ਆਈ.ਆਰ. ਵਿਚ ਹਰਪ੍ਰੀਤ ਸਿੰਘ ਅਤੇ ਹੋਰ ਰਸੂਖਦਾਰਾਂ ਦੇ ਨਾਂ ਜਨਤਕ ਹੋਏ, ਟਰੱਸਟ ਦੇ ਦਫ਼ਤਰ ਵਿਚ ਹੜਕੰਪ ਮਚ ਗਿਆ ਅਤੇ ਕਈ ਕਲਰਕ ਤੇ ਸਟਾਫ ਮੈਂਬਰ ਡਿਊਟੀ ਵਿਚਾਲੇ ਹੀ ਛੱਡ ਕੇ ਰਫੂਚੱਕਰ ਹੋ ਗਏ।

ਮ੍ਰਿਤਕ ਦੀ ਪਤਨੀ ਜਸਲੀਨ ਕੌਰ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਤੀ ਪਿਛਲੇ ਕਈ ਦਿਨਾਂ ਤੋਂ ਮੁਲਜ਼ਮਾਂ ਵੱਲੋਂ ਤੰਗ ਪ੍ਰੇਸ਼ਾਨ ਕੀਤੇ ਜਾਣ ਕਾਰਨ ਟੁੱਟ ਚੁੱਕੇ ਸਨ। ਮੁਲਜ਼ਮਾਂ ਨੇ ਰਿੰਪੀ ਅਨੇਜਾ ਦੇ ਕਰੋੜਾਂ ਰੁਪਏ ਦੱਬ ਰੱਖੇ ਸਨ ਅਤੇ ਜਦੋਂ ਵੀ ਉਹ ਆਪਣੇ ਪੈਸੇ ਮੰਗਦੇ, ਤਾਂ ਮੁਲਜ਼ਮ ਉਨ੍ਹਾਂ ਨੂੰ 'ਮਰ ਜਾਣ' ਦੀ ਸਲਾਹ ਦੇ ਕੇ ਜ਼ਲੀਲ ਕਰਦੇ ਸਨ। 6 ਮਈ ਦੀ ਸ਼ਾਮ ਰਿੰਪੀ ਨੇ ਆਪਣੀ ਕਾਰ ਵਿਚ ਸਲਫਾਸ ਦੀਆਂ ਗੋਲੀਆਂ ਨਿਗਲਣ ਤੋਂ ਬਾਅਦ ਆਪਣੀ ਪਤਨੀ ਅਤੇ ਰਿਸ਼ਤੇਦਾਰਾਂ ਨੂੰ ਇਸ ਦੀ ਜਾਣਕਾਰੀ ਦਿੱਤੀ, ਜਿਸ ਤੋਂ ਬਾਅਦ ਉਨ੍ਹਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਪਰ ਉਦੋਂ ਤੱਕ ਬਹੁਤ ਦੇਰ ਹੋ ਚੁੱਕੀ ਸੀ। ਫਿਲਹਾਲ ਥਾਣਾ ਦੁਗਰੀ ਪੁਲਸ ਨੇ ਰਾਜੇਸ਼ ਬੰਸਲ, ਪੰਕਜ ਗੁਪਤਾ, ਵਿਨੋਦ ਸਿਆਲ, ਖੁਸ਼ਵੰਤ ਸਿੰਘ, ਸੰਜੂ ਗੋਇਲ ਅਤੇ ਪ੍ਰਾਪਰਟੀ ਡੀਲਰ ਰਿਸ਼ਮਜੀਤ ਗਾਬਾ ਸਮੇਤ ਹੋਰਾਂ ਦੇ ਖਿਲਾਫ਼ ਸ਼ਿਕੰਜਾ ਕੱਸ ਦਿੱਤਾ ਹੈ ਅਤੇ ਮਾਮਲੇ ਦੀ ਡੂੰਘਾਈ ਨਾਲ ਤਫਤੀਸ਼ ਕੀਤੀ ਜਾ ਰਹੀ ਹੈ।