ਸਾਬਕਾ ਸੰਸਦ ਮੈਂਬਰ ਮਹਿੰਦਰ ਸਿੰਘ ਕੇ. ਪੀ., ਸਰਵਣ ਸਿੰਘ ਨੇ ਟਿਕਟ 'ਤੇ ਠੋਕਿਆ ਦਾਅਵਾ

Thursday, Feb 07, 2019 - 10:33 AM (IST)

ਸਾਬਕਾ ਸੰਸਦ ਮੈਂਬਰ ਮਹਿੰਦਰ ਸਿੰਘ ਕੇ. ਪੀ., ਸਰਵਣ ਸਿੰਘ ਨੇ ਟਿਕਟ 'ਤੇ ਠੋਕਿਆ ਦਾਅਵਾ

ਜਲੰਧਰ (ਚੋਪੜਾ) - 2019 ਲੋਕ ਸਭਾ ਚੋਣਾਂ 'ਚ ਜਲੰਧਰ ਹਲਕੇ ਦੀ ਸਥਿਤੀ ਦਿਲਚਸਪ ਮੋੜ 'ਤੇ ਪਹੁੰਚ ਗਈ ਹੈ। ਸੂਬਾ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਤੇ ਸਾਬਕਾ ਸੰਸਦ ਮੈਂਬਰ ਮਹਿੰਦਰ ਸਿੰਘ ਕੇ. ਪੀ., ਸਾਬਕਾ ਵਿਧਾਇਕ ਸਰਵਣ ਸਿੰਘ ਫਿਲੌਰ ਨੇ ਜਲੰਧਰ ਤੋਂ ਚੋਣ ਲੜਨ ਲਈ ਆਪਣੀ ਦਾਅਵੇਦਾਰੀ ਠੋਕ ਦਿੱਤੀ ਹੈ। ਦੋਵਾਂ ਆਗੂਆਂ ਨੇ ਕਾਂਗਰਸ ਭਵਨ ਚੰਡੀਗੜ੍ਹ 'ਚ ਦਾਅਵੇਦਾਰੀ ਦੀ ਅਰਜ਼ੀ ਸੌਂਪੀ, ਜਿਸ ਤੋਂ ਬਾਅਦ ਅਜੇ ਤੱਕ ਜਲੰਧਰ ਤੋਂ ਦਾਅਵੇਦਾਰ ਦੇ ਤੌਰ 'ਤੇ ਖੁਦ ਨੂੰ ਪੇਸ਼ ਕਰ ਰਹੇ ਸੰਸਦ ਮੈਂਬਰ ਚੌਧਰੀ ਸੰਤੋਖ ਸਿੰਘ ਦੀਆਂ ਮੁਸ਼ਕਲਾਂ ਵਧ ਸਕਦੀਆਂ ਹਨ। ਮਹਿੰਦਰ ਸਿੰਘ ਕੇ. ਪੀ. ਜੋ ਵੈਸਟ ਵਿਧਾਨ ਸਭਾ ਹਲਕੇ ਤੋਂ ਪਹਿਲੀ ਵਾਰ 1985 'ਚ ਚੋਣਾਂ ਲੜ ਕੇ ਵਿਧਾਇਕ ਬਣੇ ਸਨ। ਉਨ੍ਹਾਂ 1995 ਤੇ 2002 'ਚ ਵੀ ਇਸ ਸੀਟ 'ਤੇ ਝੰਡਾ ਲਹਿਰਾਉਂਦਿਆਂ ਵਿਧਾਨ ਸਭਾ 'ਚ ਆਪਣੀ ਥਾਂ ਬਣਾਈ।

2009 'ਚ ਕੇ. ਪੀ. 'ਤੇ ਵਿਸ਼ਵਾਸ ਜਤਾਉਂਦਿਆਂ ਪਾਰਟੀ ਨੇ ਉਨ੍ਹਾਂ ਨੂੰ ਲੋਕ ਸਭਾ ਚੋਣਾਂ 'ਚ ਉਤਾਰਿਆ ਤੇ ਕੇ. ਪੀ. ਨੇ ਇਸ ਚੋਣ 'ਚ ਜਿੱਤ ਹਾਸਿਲ ਕੀਤੀ ਤੇ ਉਹ ਜਲੰਧਰ ਤੋਂ ਸੰਸਦ ਮੈਂਬਰ ਚੁਣੇ ਗਏ। 2014 ਦੀਆਂ ਲੋਕ ਸਭਾ ਚੋਣਾਂ 'ਚ ਕਾਂਗਰਸ ਹਾਈਕਮਾਨ ਨੇ ਕੇ. ਪੀ. ਦੇ ਹਲਕੇ ਨੂੰ ਬਦਲਦਿਆਂ ਉਨ੍ਹਾਂ ਨੂੰ ਹੁਸ਼ਿਆਰਪੁਰ ਸ਼ਿਫਟ ਕਰ ਦਿੱਤਾ, ਜਿੱਥੇ ਉਹ ਚੋਣ ਹਾਰ ਗਏ ਸਨ। ਕੇ. ਪੀ. ਦੀ ਥਾਂ 'ਤੇ ਕਾਂਗਰਸ ਨੇ ਫਿਲੌਰ ਵਿਧਾਨ ਸਭਾ ਹਲਕੇ ਤੋਂ ਚੋਣ ਹਾਰ ਚੁੱਕੇ ਸੰਤੋਖ ਸਿੰਘ ਚੌਧਰੀ 'ਤੇ ਦਾਅ ਖੇਡਿਆ ਤੇ ਉਨ੍ਹਾਂ ਨੂੰ ਇਥੋਂ ਚੋਣ ਲੜਵਾਈ। ਸੰਤੋਖ ਚੌਧਰੀ ਨੇ ਅਕਾਲੀ ਦਲ ਦੇ ਉਮੀਦਵਾਰ  ਪਵਨ ਟੀਨੂੰ ਨੂੰ ਮਾਤ ਦਿੱਤੀ ਸੀ। ਹੁਣ ਆਲ ਇੰਡੀਆ ਕਾਂਗਰਸ ਵਰਕਿੰਗ ਕਮੇਟੀ ਦੇ ਮੈਂਬਰ  ਰਹੇ ਕੇ. ਪੀ. ਨੇ ਦੁਬਾਰਾ ਆਪਣੇ ਹੋਮ ਡਿਸਟ੍ਰਿਕਟ 'ਚ ਵਾਪਸੀ ਕਰਦਿਆਂ ਇਥੋਂ ਚੋਣ ਲੜਨ ਲਈ ਹਾਈਕਮਾਨ ਦੇ ਸਾਹਮਣੇ ਆਪਣਾ ਦਾਅਵਾ ਠੋਕਿਆ ਹੈ। ਕੇ. ਪੀ. ਦਾ ਕਹਿਣਾ ਹੈ ਕਿ ਜਲੰਧਰ ਉਨ੍ਹਾਂ ਦਾ ਸੰਸਦੀ ਖੇਤਰ ਹੈ, ਪਾਰਟੀ ਦੇ ਫੈਸਲੇ ਦਾ ਸਨਮਾਨ ਕਰਦਿਆਂ ਉਨ੍ਹਾਂ ਇਕ ਸੱਚੇ  ਸਿਪਾਹੀ ਵਾਂਗ ਹੁਸ਼ਿਆਰਪੁਰ ਤੋਂ ਚੋਣ ਲੜੀ ਸੀ। ਮੇਰੇ ਕੀਤੇ ਕੰਮਾਂ ਕਾਰਨ ਚੌਧਰੀ ਨੂੰ ਜਿੱਤ ਹਾਸਲ ਹੋਈ ਸੀ। ਹੁਣ 5 ਸਾਲਾਂ ਬਾਅਦ ਉਹ ਜਲੰਧਰ ਤੋਂ ਹੀ ਚੋਣ ਲੜਨਗੇ। 

2017 ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਅਕਾਲੀ ਦਲ ਦੀ ਦਲਿਤ ਰਾਜਨੀਤੀ ਦੇ ਕੱਦਵਾਰ ਆਗੂ ਸਰਵਣ ਸਿੰਘ ਫਿਲੌਰ ਨੇ ਤੱਕੜੀ ਨੂੰ ਛੱਡ ਕੇ ਹੱਥ ਦਾ ਪੱਲਾ ਫੜ ਲਿਆ ਸੀ। 1997 ਤੋਂ ਫਿਲੌਰ ਵਿਧਾਨ ਸਭਾ ਹਲਕੇ ਤੋਂ ਵਿਧਾਇਕ ਚੁਣੇ ਗਏ ਫਿਲੌਰ ਨੇ 1980, 1985, 1997, 2007 ਦੀਆਂ ਚੋਣਾਂ 'ਚ ਜਿੱਤ ਦਰਜ ਕਰਵਾਈ। 2012 'ਚ ਅਕਾਲੀ ਦਲ ਨੇ ਉਨ੍ਹਾਂ ਨੂੰ ਕਰਤਾਰਪੁਰ ਤੋਂ ਚੋਣ ਲੜਵਾਈ, ਜਿੱਥੇ ਉਨ੍ਹਾਂ ਕਾਂਗਰਸ ਦੇ ਆਗੂ ਚੌਧਰੀ ਜਗਜੀਤ ਸਿੰਘ ਨੂੰ ਹਰਾਇਆ ਸੀ। ਫਿਲੌਰ ਨੇ ਕਾਂਗਰਸ ਜੁਆਇਨ ਕਰਨ ਤੋਂ ਬਾਅਦ ਫਿਲੌਰ ਵਿਧਾਨ ਸਭਾ ਹਲਕੇ ਤੋਂ 2017 ਦੀਆਂ ਵਿਧਾਨ ਸਭਾ ਚੋਣਾਂ ਲੜੀਆਂ ਸਨ ਪਰ ਕਾਂਗਰਸ  ਹਾਈਕਮਾਨ ਨੇ ਫਿਲੌਰ ਦੇ ਦਾਅਵੇ ਨੂੰ ਨਜ਼ਰਅੰਦਾਜ਼ ਕਰਦਿਆਂ ਸੰਸਦ ਮੈਂਬਰ ਚੌਧਰੀ ਦੇ ਪੁੱਤਰ ਵਿਕਰਮਜੀਤ ਚੌਧਰੀ ਨੂੰ ਟਿਕਟ ਦੇ ਦਿੱਤੀ। ਉਹ ਅਕਾਲੀ ਦਲ ਦੇ ਉਮੀਦਵਾਰ ਬਲਦੇਵ ਸਿੰਘ ਖਹਿਰਾ ਹੱਥੋਂ ਹਾਰ ਗਏ ਸਨ। 

ਇਸ ਤੋਂ ਇਲਾਵਾ ਹੁਣ ਵੈਸਟ ਵਿਧਾਨ ਸਭਾ ਹਲਕੇ ਤੋਂ ਵਿਧਾਇਕ  ਸੁਸ਼ੀਲ ਰਿੰਕੂ ਵੀ ਟਿਕਟ ਲੈਣ ਦੀ ਦੌੜ ਵਿਚ ਸ਼ਾਮਲ ਹਨ। ਇਸ ਤੋਂ ਪਹਿਲਾਂ ਕੌਂਸਲਰ ਰਹੇ ਰਿੰਕੂ ਨੇ ਵਿਧਾਇਕ ਬਣਨ ਤੋਂ ਬਾਅਦ ਦੋ ਸਾਲਾਂ 'ਚ ਆਪਣੀ ਕਾਰਜਸ਼ੈਲੀ ਨਾਲ ਆਮ ਜਨਤਾ ਖਾਸ ਤੌਰ 'ਤੇ ਦਲਿਤ ਸਮਾਜ 'ਚ ਆਪਣੀ ਵਧੀਆ ਪੈਠ ਬਣਾਈ ਹੈ। ਜਲੰਧਰ ਤੋਂ ਹੀ ਸਾਬਕਾ ਸੰਸਦ ਮੈਂਬਰ ਰਹੇ ਤੇ ਸਾਬਕਾ ਕੈਬਨਿਟ ਮੰਤਰੀ ਰਾਣਾ ਗੁਰਜੀਤ ਸਿੰਘ ਦਾ ਸੱਜਾ ਹੱਥ ਮੰਨੇ  ਜਾਂਦੇ ਰਿੰਕੂ ਨੂੰ ਕੈਪਟਨ ਖੇਮੇ ਦਾ ਪੂਰਾ ਆਸ਼ੀਰਵਾਦ ਹਾਸਲ ਹੈ ਤੇ ਉਹ ਵੀ ਟਿਕਟ ਹਾਸਲ ਕਰਨ ਨੂੰ ਲੈ ਕੇ ਪੂਰੀ ਤਰ੍ਹਾਂ ਆਸਵੰਦ ਹਨ ਤੇ ਲਗਾਤਾਰ ਇਸ ਸਬੰਧ 'ਚ ਆਪਣੀਆਂ ਸਰਗਰਮੀਆਂ ਵਧਾ ਰਹੇ ਹਨ। ਕਿਉਂਕਿ 7 ਫਰਵਰੀ ਨੂੰ ਲੋਕ ਸਭਾ ਚੋਣਾਂ ਲਈ ਟਿਕਟ ਅਪਲਾਈ ਕਰਨ  ਦਾ ਅੰਤਿਮ ਦਿਨ ਹੈ। ਹੁਣ ਦੇਖਣਾ ਹੋਵੇਗਾ ਕਿ ਇਨ੍ਹਾਂ ਤੋਂ ਇਲਾਵਾ ਹੋਰ ਕਿਹੜੇ-ਕਿਹੜੇ ਆਗੂ ਚੋਣ ਲੜਨ ਨੂੰ ਲੈ ਕੇ ਹਾਈਕਮਾਨ ਦੇ ਸਾਹਮਣੇ ਆਪਣੀ ਦਾਅਵੇਦਾਰੀ ਪੇਸ਼ ਕਰਦੇ ਹਨ। ਜਿਸ  ਢੰਗ ਨਾਲ ਜਲੰਧਰ ਹਲਕੇ ਲਈ ਮਜ਼ਬੂਤ ਦਾਅਵੇਦਾਰੀਆਂ ਸਾਹਮਣੇ ਆਈਆਂ ਹਨ ਉਸ ਤੋਂ ਲੱਗਦਾ ਹੈ ਕਿ  ਮੌਜੂਦਾ ਸੰਸਦ ਮੈਂਬਰ ਲਈ ਟਿਕਟ ਹਾਸਿਲ ਕਰਨਾ ਤੇ ਚੋਣ ਲੜਨਾ ਕੋਈ ਸੌਖਾ ਕੰਮ ਨਹੀਂ ਹੋਵੇਗਾ।


author

rajwinder kaur

Content Editor

Related News