125 ਕਰੋੜ ਰੁਪਏ ਦੀ ਲਾਗਤ ਨਾਲ ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਦਾ ਹੋਇਆ ਮੁੜ-ਵਿਕਾਸ

ਜਲੰਧਰ/ਫਿਰੋਜ਼ਪੁਰ (ਮਹੇਸ਼ ਖੋਸਲਾ, ਮਲਹੋਤਰਾ, ਕੁਮਾਰ) - 125 ਕਰੋੜ ਰੁਪਏ ਦੀ ਲਾਗਤ ਨਾਲ ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਦਾ ਮੁੜ-ਵਿਕਾਸ ‘ਅੰਮ੍ਰਿਤ ਭਾਰਤ ਸਟੇਸ਼ਨ ਯੋਜਨਾ’ ਤਹਿਤ ਕੀਤਾ ਗਿਆ ਹੈ। ਇਹ ਮੁੜ-ਵਿਕਾਸ ਯੋਜਨਾ ਯਾਤਰੀਆਂ ਨੂੰ ਸੁਰੱਖਿਅਤ, ਸਹੂਲਤਾਂ ਭਰਪੂਰ ਅਤੇ ਆਧੁਨਿਕ ਯਾਤਰਾ ਤਜਰਬਾ ਦੇਣ ਦੇ ਉਦੇਸ਼ ਨਾਲ ਕੀਤੀ ਗਈ ਹੈ।

‘ਅੰਮ੍ਰਿਤ ਭਾਰਤ ਸਟੇਸ਼ਨ ਯੋਜਨਾ’ ਇਕ ਮਹੱਤਵਪੂਰਨ ਪਹਿਲ ਹੈ, ਜੋ ਭਾਰਤ ਵਿਚ ਰੇਲਵੇ ਪ੍ਰਣਾਲੀ ਦੀ ਵਰਤੋਂ ਕਰਨ ਵਾਲੇ ਲੱਖਾਂ ਲੋਕਾਂ ਨੂੰ ਲਾਭ ਪਹੁੰਚਾਏਗੀ। ਇਸ ਯੋਜਨਾ ਦਾ ਉਦੇਸ਼ ਯਾਤਰੀਆਂ ਨੂੰ ਸਾਰੀਆਂ ਆਧੁਨਿਕ ਸਹੂਲਤਾਂ ਨਾਲ ਲੈਸ ਅਤਿ-ਆਧੁਨਿਕ ਸਹੂਲਤਾਂ ਮੁਹੱਈਆ ਕਰਨਾ ਹੈ, ਜਿਸ ਨਾਲ ਉਨ੍ਹਾਂ ਦੇ ਯਾਤਰਾ ਤਜਰਬੇ ਵਿਚ ਵਾਧਾ ਹੋਵੇਗਾ। ਇਸ ਯੋਜਨਾ ਦਾ ਉਦੇਸ਼ ਰੇਲਵੇ ਸਟੇਸ਼ਨਾਂ ਨੂੰ ਨੇੜਲੇ ਇਲਾਕਿਆਂ ਨਾਲ ਜੋੜਨਾ ਅਤੇ ਯਾਤਰੀਆਂ ਨੂੰ ਬਿਹਤਰ ਪਹੁੰਚ ਮੁਹੱਈਆ ਕਰਨ ਲਈ ਇਨ੍ਹਾਂ ਇਲਾਕਿਆਂ ਦਾ ਵਿਕਾਸ ਕਰਨਾ ਹੈ। ਇਸ ਯੋਜਨਾ ਵਿਚ ਸੰਪਰਕ ਅਤੇ ਪਹੁੰਚ ਵਿਚ ਸੁਧਾਰ ਲਈ ਸੜਕਾਂ, ਫੁੱਟਪਾਥਾਂ ਅਤੇ ਹੋਰ ਬੁਨਿਆਦੀ ਢਾਂਚੇ ਦਾ ਵਿਕਾਸ ਸ਼ਾਮਲ ਹੈ। ਇਨ੍ਹਾਂ ਸਟੇਸ਼ਨਾਂ ਦਾ ਮੁੜ-ਵਿਕਾਸ ਦਿਵਿਆਂਗਜਨਾਂ ਲਈ ਸਹੂਲਤਾਂ ਦੇ ਨਾਲ-ਨਾਲ ਯਾਤਰੀਆਂ ਨੂੰ ਨਿਰਵਿਘਨ ਆਵਾਜਾਈ ਮੁਹੱਈਆ ਕਰਨ ਦੇ ਮਨੋਰਥ ਨਾਲ ਕੀਤਾ ਗਿਆ ਹੈ।

ਜਲੰਧਰ ਛਾਉਣੀ ਰੇਲਵੇ ਸਟੇਸ਼ਨ ਨੂੰ ਆਧੁਨਿਕ, ਵਾਤਾਵਰਣ-ਅਨੁਕੂਲ ਅਤੇ ਯਾਤਰੀ ਸਹੂਲਤਾਂ ਨਾਲ ਲੈਸ ਸਰੂਪ ਮੁਹੱਈਆ ਕੀਤਾ ਗਿਆ ਹੈ। ਮੁੜ-ਵਿਕਸਿਤ ਸਟੇਸ਼ਨ ਵਿਚ ਵਿਸ਼ਵ-ਪੱਧਰੀ ਯਾਤਰੀ ਸਹੂਲਤਾਂ ਦੇ ਨਾਲ ਆਧੁਨਿਕ ਏਅਰ ਕਨਕੋਰਸ, 2 ਨਵੇਂ ਫੁੱਟਓਵਰ ਬ੍ਰਿਜ, ਲਿਫਟ, ਐਸਕੇਲੇਟਰ, ਏਅਰ ਕੰਡੀਸ਼ਨਡ ਵੇਟਿੰਗ ਰੂਮ, ਡਿਜੀਟਲ ਸੂਚਨਾ ਪ੍ਰਣਾਲੀ, ਆਧੁਨਿਕ ਅਨਾਊਂਸਮੈਂਟ ਸਿਸਟਮ ਅਤੇ ਦੋਵਾਂ ਪਾਸਿਆਂ ਤੋਂ ਪਹੁੰਚਯੋਗ ਐਂਟਰੀ ਤੇ ਨਿਕਾਸ ਦੀ ਸਹੂਲਤ ਮੁਹੱਈਆ ਕਰਵਾਈ ਗਈ ਹੈ। ਸਟੇਸ਼ਨ ਕੰਪਲੈਕਸ ਵਿਚ ਵਿਸਤ੍ਰਿਤ ਪਾਰਕਿੰਗ, ਹਰਿਆਵਲ ਖੇਤਰ, ਇਲੈਕਟ੍ਰਿਕ ਵਾਹਨ ਚਾਰਜਿੰਗ ਦੀ ਵਿਵਸਥਾ, 90 ਕੇ. ਐੱਲ. ਡੀ. ਸਮਰੱਥਾ ਦਾ ਸੀਵਰੇਜ ਟ੍ਰੀਟਮੈਂਟ ਪਲਾਂਟ ਅਤੇ ਵਿਆਪਕ ਸੀ. ਸੀ. ਟੀ. ਵੀ. ਨਿਗਰਾਨੀ ਪ੍ਰਣਾਲੀ ਸਥਾਪਤ ਕੀਤੀ ਗਈ ਹੈ। ਸਟੇਸ਼ਨ ਨੂੰ ਗੋਲਡ ਰੇਟਿੰਗ ਦੇ ਅਨੁਕੂਲ ਗ੍ਰੀਨ ਬਿਲਡਿੰਗ ਵਜੋਂ ਵਿਕਸਿਤ ਕੀਤਾ ਗਿਆ ਹੈ।