ਇੰਸਪੈਕਟਰਾਂ ਦੀ ਕੁੱਟਮਾਰ ਕਰਨ ਵਾਲੇ ਟਰੱਕ ਡਰਾਇਵਰਾਂ ’ਤੇ ਮੁਕੱਦਮਾ ਦਰਜ

ਫ਼ਰੀਦਕੋਟ (ਰਾਜਨ) : ਐੱਫ.ਸੀ.ਆਈ ਦੇ ਇੰਸਪੈਕਟਰਾਂ ਦੀ ਕੁੱਟਮਾਰ ਕਰਨ ਦੇ ਦੋਸ਼ ਤਹਿਤ ਸਥਾਨਕ ਥਾਣਾ ਸਿਟੀ ਵਿਖੇ ਡਰਾਇਵਰ ਜੋਬਨ, ਪਾਲਾ ਅਤੇ ਸ਼ੂਟਰ ਸਾਰੇ ਵਾਸੀ ਨਾਨਕਸਰ ਬਸਤੀ ਫ਼ਰੀਦਕੋਟ ਅਤੇ ਚੌਥੇ ਨਾਮਾਲੂਮ ਵਿਅਕਤੀ ’ਤੇ ਮੁਕੱਦਮਾ ਦਰਜ ਕੀਤਾ ਗਿਆ ਹੈ। ਦੱਸਣਯੋਗ ਹੈ ਕਿ ਇਸ ਮਾਮਲੇ ਵਿਚ ਬੀਤੀ 27 ਮਈ ਨੂੰ ਜਥੇਬੰਦੀ ਦੇ ਪ੍ਰਧਾਨ ਵੱਲੋਂ ਪੁਲਸ ਵਿਭਾਗ ਨੂੰ ਚੇਤਾਵਨੀ ਦਿੱਤੀ ਗਈ ਸੀ ਕਿ ਜੇਕਰ ਪੁਲਸ ਵੱਲੋਂ ਕਾਰਵਾਈ ਨਾ ਕੀਤੀ ਗਈ ਤਾਂ ਜਥੇਬੰਦੀ ਕਰੜਾ ਐਕਸ਼ਨ ਲਵੇਗੀ।

ਪੁਲਸ ਨੂੰ ਦਿੱਤੇ ਬਿਆਨਾਂ ਵਿਚ ਇੰਸਪੈਕਟਰ ਕਮਲ ਤੋਮਰ ਪੁੱਤਰ ਰਾਜਿੰਦਰ ਸਿੰਘ ਹਾਲ ਵਾਸੀ ਫ਼ਰੀਦਕੋਟ ਨੇ ਦੱਸਿਆ ਕਿ ਜਦੋਂ ਉਹ ਆਪਣੇ ਸਾਥੀ ਇੰਸਪੈਕਟਰ ਬਲਦੇਵ ਸਿੰਘ ਰਾਣਾ, ਦਿਨੇਸ਼ ਕੁਮਾਰ ਅਤੇ ਸੂਰਿਆਦੇਵ ਯਾਦਵ ਸਮੇਤ ਡਿਊਟੀ ਖ਼ਤਮ ਕਰਕੇ ਇੱਥੋਂ ਦੀ ਭਾਨ ਸਿੰਘ ਕਾਲੋਨੀ ਵੱਲ ਜਾ ਰਹੇ ਸਨ ਤਾਂ ਜਦ ਉਹ ਗਲੀ ਨੰਬਰ 3 ਐੱਲ.ਆਈ.ਸੀ ਦਫਤਰ ਲਾਗੇ ਪੁੱਜੇ ਤਾਂ ਉਕਤ ਸਾਰਿਆਂ ਨੇ ਦਸਤੀ ਹਥਿਆਰਾਂ ਨਾਲ ਉਨ੍ਹਾਂ ਦੀ ਕੁੱਟਮਾਰ ਕੀਤੀ। ਬਿਆਨ ਕਰਤਾ ਨੇ ਦੱਸਿਆ ਕਿ ਵਜ੍ਹਾ ਰੰਜਿਸ਼ ਇਹ ਕਿ ਜਦੋਂ ਚੌਲਾਂ ਦੀ ਸਪੈਸ਼ਲ ਲੱਗਦੀ ਹੈ ਤਾਂ ਇਹ ਆਪਣੇ ਟਰੱਕਾਂ ਵਿਚੋਂ ਚੌਲਾਂ ਦੀ ਰਹਿੰਦ-ਖੂੰਹਦ ਸਾਫ ਨਹੀਂ ਕਰਦੇ ਸਨ ਅਤੇ ਬਿਆਨ ਕਰਤਾ ਤੇ ਉਸਦੇ ਸਾਥੀ ਇੰਸਪੈਕਟਰਾਂ ਵੱਲੋਂ ਇਨ੍ਹਾਂ ਨੂੰ ਟਰੱਕ ਸਾਫ ਕਰਨ ਲਈ ਕਿਹਾ ਜਾਂਦਾ ਸੀ ਜਿਸਦੀ ਰੰਜਿਸ਼ ਵਿਚ ਇਨ੍ਹਾਂ ਨੇ ਸਾਡੇ ਸੱਟਾਂ ਮਾਰੀਆਂ।