ਝੌਂਪੜੀ ’ਚ ਲੱਗੀ ਅੱਗ ਕਾਰਨ ਸਭ ਕੁਝ ਸੜ ਕੇ ਸੁਆਹ

ਅਬੋਹਰ (ਸੁਨੀਲ) : ਸਥਾਨਕ ਕੈਲਾਸ਼ ਨਗਰ ਢਾਣੀ 'ਚ ਖੇਤ ’ਚ ਝੌਂਪੜੀ ਅੰਦਰ ਰਹਿਣ ਵਾਲੇ ਇਕ ਪਰਿਵਾਰ ’ਤੇ ਦੁੱਖਾਂ ਦਾ ਪਹਾੜ ਡਿੱਗ ਪਿਆ, ਜਦੋਂ ਸਿਰਫ ਪੰਜ ਮਿੰਟਾਂ ’ਚ ਉਨ੍ਹਾਂ ਦੀ ਝੌਂਪੜੀ ਸੜ ਕੇ ਸੁਆਹ ਹੋ ਗਈ ਅਤੇ ਉਸ ’ਚ ਰੱਖਿਆ ਸਾਰਾ ਸਮਾਨ ਵੀ ਸੜ ਗਿਆ। ਇੱਥੋਂ ਤੱਕ ਕਿ ਖਾਣੇ ਦਾ ਦਾਣਾ ਵੀ ਨਹੀਂ ਬਚਿਆ। ਜਦੋਂ ਇਹ ਘਟਨਾ ਵਾਪਰੀ ਤਾਂ ਪਰਿਵਾਰ ਦੇ ਮੈਂਬਰ ਬਾਹਰ ਸੌਂ ਰਹੇ ਸਨ, ਜਦੋਂ ਕਿ ਬੱਚੇ ਸਕੂਲ ਗਏ ਹੋਏ ਸਨ। ਜਾਣਕਾਰੀ ਅਨੁਸਾਰ ਅਜੈ ਕੁਮਾਰ ਅਤੇ ਉਸ ਦੀ ਪਤਨੀ ਕਾਂਤਾ ਆਪਣੇ ਪੁੱਤਰ ਅਤੇ ਧੀ ਨਾਲ ਇਸ ਢਾਣੀ ਦੇ ਇਕ ਖੇਤ ’ਚ ਇਕ ਝੌਂਪੜੀ 'ਚ ਰਹਿੰਦੇ ਹਨ ਅਤੇ ਖੇਤ ’ਚ ਸਬਜ਼ੀਆਂ ਉਗਾ ਕੇ ਆਪਣਾ ਗੁਜ਼ਾਰਾ ਕਰਦੇ ਹਨ।

ਸਵੇਰੇ ਉਨ੍ਹਾਂ ਦੇ ਬੱਚੇ ਸਕੂਲ ਗਏ ਸਨ ਅਤੇ ਦੁਪਹਿਰ ਇਕ ਵਜੇ ਦੇ ਕਰੀਬ ਗਰਮੀ ਕਾਰਨ ਪਤੀ-ਪਤਨੀ ਦੋਵੇਂ ਝੌਂਪੜੀ ਦੀ ਬਜਾਏ ਇਕ ਦਰੱਖਤ ਹੇਠਾਂ ਸੌਂ ਰਹੇ ਸਨ, ਜਦੋਂ ਅਚਾਨਕ ਝੌਂਪੜੀ ਨੂੰ ਅੱਗ ਲੱਗ ਗਈ। ਇਹ ਅੱਗ ਇੰਨੀ ਭਿਆਨਕ ਸੀ ਕਿ ਸਿਰਫ ਪੰਜ ਮਿੰਟਾਂ ਵਿਚ ਹੀ ਉਨ੍ਹਾਂ ਦੀ ਝੌਂਪੜੀ ਸੜ ਕੇ ਸੁਆਹ ਹੋ ਗਈ ਅਤੇ ਉਨ੍ਹਾਂ ਦਾ ਘਰੇਲੂ ਸਮਾਨ, ਭੋਜਨ ਰਾਸ਼ਨ, ਕੱਪੜੇ, ਦਸਤਾਵੇਜ਼ ਆਦਿ ਸੜ ਕੇ ਸੁਆਹ ਹੋ ਗਏ। ਹਾਲਾਂਕਿ ਉਨ੍ਹਾਂ ਨੇ ਬਾਲਟੀਆਂ ਨਾਲ ਪਾਣੀ ਪਾ ਕੇ ਅੱਗ ’ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਸਭ ਕੁੱਝ ਸੜ ਗਿਆ। ਖੁਸ਼ਕਿਸਮਤੀ ਨਾਲ ਉਸ ਸਮੇਂ ਝੌਂਪੜੀ ’ਚ ਕੋਈ ਨਹੀਂ ਸੀ। ਪੀੜਤ ਪਰਿਵਾਰ ਨੇ ਪ੍ਰਸ਼ਾਸਨ ਅਤੇ ਸਮਾਜ ਭਲਾਈ ਸੰਸਥਾਵਾਂ ਨੂੰ ਮਦਦ ਦੀ ਅਪੀਲ ਕੀਤੀ ਹੈ।