ਕਮਰੇ ਦੀ ਛੱਤ ਡਿੱਗਣ ਨਾਲ ਅੌਰਤ ਦੀ ਮੌਤ, 3 ਜ਼ਖ਼ਮੀ

 ਮੰਡੀ ਲੱਖੇਵਾਲੀ/ਸ੍ਰੀ ਮੁਕਤਸਰ ਸਾਹਿਬ (ਸੁਖਪਾਲ, ਪਵਨ) - ਬੀਤੀ ਰਾਤ ਡੇਢ ਵਜੇ ਦੇ ਕਰੀਬ ਪਿੰਡ ਲੱਖੇਵਾਲੀ ਵਿਖੇ ਮੀਂਹ ਆਉਣ ਕਰ ਕੇ ਇਕ ਘਰ ਦੇ ਕਮਰੇ ਵਿਚ ਸੁੱਤੇ ਹੋਏ 5 ਪਰਿਵਾਰਕ ਮੈਂਬਰਾਂ  ’ਤੇ  ਛੱਤ ਡਿੱਗ ਗਈ,  ਜਿਸ  ਕਾਰਨ  ਇਕ  ਔਰਤ  ਦੀ  ਮੌਤ, ਜਦਕਿ 3 ਵਿਅਕਤੀ ਜ਼ਖ਼ਮੀ ਹੋ ਗਏ। ਜਾਣਕਾਰੀ ਅਨੁਸਾਰ ਜਸਪਾਲ ਸਿੰਘ ਪੁੱਤਰ ਨੰਦ ਸਿੰਘ, ਉਸ ਦੀ ਪਤਨੀ ਹਰਜੀਤ ਕੌਰ ਅਤੇ 3 ਬੱਚੇ ਵੀ ਕਮਰੇ ਵਿਚ ਸਨ। ਛੱਤ ਹੇਠਾਂ ਆਉਣ ਕਰ ਕੇ ਹਰਜੀਤ ਕੌਰ (45 ਸਾਲ)  ਦੀ ਮੌਤ ਹੋ ਗਈ, ਜਦਕਿ ਜਸਪਾਲ ਸਿੰਘ ਤੋਂ ਇਲਾਵਾ 2 ਬੱਚੇ ਬੱਬੂ ਤੇ ਇੰਦਰਜੀਤ ਭੱਟੀ ਜ਼ਖ਼ਮੀ ਹੋ ਗਏ,  ਜੋ  ਕਿ  ਜ਼ੇਰੇ  ਇਲਾਜ  ਹਨ।  ਹਰਜੀਤ ਕੌਰ ਦੀ ਲਾਸ਼ ਨੂੰ ਵੀ ਸਿਵਲ ਹਸਪਤਾਲ ਵਿਖੇ ਪੋਸਟਮਾਰਟਮ ਲਈ ਲਿਅਾਂਦਾ ਗਿਆ ਹੈ। ਪਤਾ ਲੱਗਾ ਹੈ ਕਿ ਉਕਤ ਪਰਿਵਾਰ ਦੇ ਘਰ ਵਿਚ 2 ਕਮਰੇ ਹਨ। ਜਸਪਾਲ ਸਿੰਘ ਦੇ ਮਾਤਾ-ਪਿਤਾ ਵੀ ਉਸੇ ਘਰ ਵਿਚ ਰਹਿੰਦੇ ਹਨ ਅਤੇ ਉਸ ਦੀ ਭੈਣ, ਜਿਸ ਦੀ ਪਹਿਲਾਂ ਮੌਤ ਹੋ ਚੁੱਕੀ ਹੈ, ਦੇ 3 ਬੱਚੇ ਵੀ ਉਨ੍ਹਾਂ ਦੇ ਕੋਲ ਹੀ ਰਹਿੰਦੇ ਹਨ। ਜਸਪਾਲ ਸਿੰਘ ਅਤੇ ਉਸ ਦਾ ਪਰਿਵਾਰ ਦਿਹਾਡ਼ੀ ਮਜ਼ਦੂਰੀ ਕਰ ਕੇ ਆਪਣਾ ਗੁਜ਼ਾਰਾ ਕਰਦਾ ਸੀ।ਯੂਥ ਕਲੱਬ ਦੇ ਪ੍ਰਧਾਨ ਕੁਲਦੀਪ ਸਿੰਘ ਲੱਖੇਵਾਲੀ, ਬਸਪਾ ਆਗੂ ਸੁਖਵੇਦ ਸਿੰਘ ਲੱਖੇਵਾਲੀ, ਇਕਬਾਲ ਸਿੰਘ ਤੇ ਸਮੂਹ ਪਿੰਡ ਵਾਸੀਆਂ ਨੇ ਪੰਜਾਬ ਸਰਕਾਰ ਤੇ ਜ਼ਿਲਾ ਪ੍ਰਸ਼ਾਨ ਤੋਂ  ਮੰਗ ਕੀਤੀ ਹੈ ਕਿ ਉਕਤ ਗਰੀਬ ਪਰਿਵਾਰ ਦੀ ਆਰਥਿਕ ਤੌਰ ’ਤੇ ਮਦਦ ਕੀਤੀ ਜਾਵੇ।