ਬਿਹਾਰ ’ਚ ਫਿਰ ਬਣਨੀ ਚਾਹੀਦੀ ਹੈ ‘ਚੰਗੇ ਸ਼ਾਸਨ ਦੀ ਸਰਕਾਰ’ : ਮੋਦੀ

ਭਾਗਲਪੁਰ/ਅਰਰੀਆ, (ਭਾਸ਼ਾ)- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਵੀਰਵਾਰ ਨੂੰ ਕਿਹਾ ਕਿ ਬਿਹਾਰ ਦੀ ਜਨਤਾ, ਖਾਸ ਕਰ ਕੇ ਮਾਵਾਂ ਅਤੇ ਧੀਆਂ, ਵੱਡੀ ਗਿਣਤੀ ’ਚ ਵੋਟਾਂ ਪਾ ਰਹੀਆਂ ਹਨ, ਤਾਂ ਜੋ ਰਾਸ਼ਟਰੀ ਜਨਤਾ ਦਲ (ਰਾਜਦ) ਦੇ ‘ਜੰਗਲ ਰਾਜ’ ਨੂੰ ਵਾਪਸ ਆਉਣ ਤੋਂ ਰੋਕਿਆ ਜਾ ਸਕੇ।

ਉਨ੍ਹਾਂ ਕਿਹਾ, ‘‘ਬਿਹਾਰ ’ਚ ਫਿਰ ਇਕ ਵਾਰ ‘ਚੰਗੇ ਸ਼ਾਸਨ ਦੀ ਸਰਕਾਰ’ ਬਣਾਈ ਜਾਣੀ ਚਾਹੀਦੀ ਹੈ। ਲੋਕ 'ਜੰਗਲ ਰਾਜ' ਕਰਨ ਵਾਲਿਆਂ ਨੂੰ ਜਵਾਬ ਦੇਣਗੇ।" ਬਿਹਾਰ ਦੇ ਭਾਗਲਪੁਰ ’ਚ ਇੱਕ ਚੋਣ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ, ਪ੍ਰਧਾਨ ਮੰਤਰੀ ਨੇ ਰਾਜਦ ਅਤੇ ਕਾਂਗਰਸ 'ਤੇ ਤਿੱਖਾ ਹਮਲਾ ਕਰਦਿਆਂ ਕਿਹਾ ਕਿ ਇਨ੍ਹਾਂ ਪਾਰਟੀਆਂ ਨੇ ਬਿਹਾਰ ਦੇ ਗਰੀਬਾਂ ਅਤੇ ਔਰਤਾਂ ਦੇ ਹਿੱਤਾਂ 'ਤੇ ਕਦੇ ਵਿਚਾਰ ਨਹੀਂ ਕੀਤਾ।

ਉਨ੍ਹਾਂ ਕਿਹਾ, "ਰਾਜਦ ਅਤੇ ਕਾਂਗਰਸ ਨੇ ਕਦੇ ਵੀ ਔਰਤਾਂ ਲਈ ਖਾਤੇ ਖੋਲ੍ਹਣ ਬਾਰੇ ਨਹੀਂ ਸੋਚਿਆ। ਅੱਜ, ਉਹ ਪੋਸਟਰਾਂ ’ਚ ਇਕੱਠੇ ਦਿਖਾਈ ਦਿੰਦੇ ਹਨ, ਪਰ ਇੱਕ ਦੂਜੇ ਦੇ ਚਿਹਰੇ ਵੱਲ ਦੇਖਣ ਲਈ ਵੀ ਤਿਆਰ ਨਹੀਂ ਹਨ। ਕਾਂਗਰਸ ਨੇਤਾ ਦਾ ਚਿਹਰਾ ਵੀ ਰਾਜਦ ਪੋਸਟਰਾਂ ਤੋਂ ਗਾਇਬ ਹੈ।" ਰਾਹੁਲ ਗਾਂਧੀ 'ਤੇ ਅਸਿੱਧੇ ਤੌਰ 'ਤੇ ਨਿਸ਼ਾਨਾ ਸਾਧਦੇ ਹੋਏ ਮੋਦੀ ਨੇ ਕਿਹਾ, "ਰਾਜਦ ਨੇ ਬੰਦੂਕ ਦੀ ਨੋਕ 'ਤੇ ਕਾਂਗਰਸ ਤੋਂ ਮੁੱਖ ਮੰਤਰੀ ਅਹੁਦੇ ਦੀ ਉਮੀਦਵਾਰੀ ਖੋਹ ਲਈ, ਅਤੇ ਕਾਂਗਰਸ ਨੂੰ ਇਹ ਪਸੰਦ ਨਹੀਂ ਆਇਆ। ਸੱਤਾ ਦੇ ਸੰਘਰਸ਼ ’ਚ, ਦੋਵੇਂ ਪਾਰਟੀਆਂ, ਰਾਜਦ ਅਤੇ ਕਾਂਗਰਸ, ਇੱਕ ਦੂਜੇ ਨੂੰ ਖਤਮ ਕਰਨ 'ਤੇ ਤੁਲੀਆਂ ਹੋਈਆਂ ਹਨ।"

ਉਨ੍ਹਾਂ ਕਿਹਾ ਕਿ ਰਾਸ਼ਟਰੀ ਲੋਕਤੰਤਰੀ ਗਠਜੋੜ (ਐਨਡੀਏ) ਸਰਕਾਰ "ਇੱਕ ਜ਼ਿਲ੍ਹਾ, ਇੱਕ ਉਤਪਾਦ" ਯੋਜਨਾ ਰਾਹੀਂ ਬਿਹਾਰ ਦੇ ਹਰ ਜ਼ਿਲ੍ਹੇ ਤੋਂ ਸਥਾਨਕ ਉਤਪਾਦਾਂ ਨੂੰ ਉਤਸ਼ਾਹਿਤ ਕਰ ਰਹੀ ਹੈ। ਪ੍ਰਧਾਨ ਮੰਤਰੀ ਨੇ ਸਵਾਲ ਕੀਤਾ, "'ਸਵਦੇਸ਼ੀ' ਅਤੇ 'ਸਵੈ-ਨਿਰਭਰਤਾ' ਵਰਗੇ ਸ਼ਬਦ ਕਾਂਗਰਸ ਦੇ ਸ਼ਬਦਕੋਸ਼ ’ਚ ਨਹੀਂ ਹਨ। ਉਨ੍ਹਾਂ ਦੀ ਗਰੀਬਾਂ ਨਾਲ ਕੀ ਦੁਸ਼ਮਣੀ ਹੈ?" ਰਾਜਦ 'ਤੇ ਨਿਸ਼ਾਨਾ ਸਾਧਦੇ ਹੋਏ ਉਨ੍ਹਾਂ ਕਿਹਾ, "ਜੰਗਲ ਰਾਜ ਦੇ ਸਕੂਲ ’ਚ, 'ਏ' ਦਾ ਅਰਥ 'ਅਗਵਾ' ਹੈ ਅਤੇ 'ਐਫ' ਦਾ ਅਰਥ 'ਫਿਰੌਤੀ' ਹੈ।"

ਕਾਂਗਰਸ 'ਤੇ ਛੱਠ ਤਿਉਹਾਰ ਦਾ ਅਪਮਾਨ ਕਰਨ ਦਾ ਦੋਸ਼ ਲਗਾਉਂਦੇ ਹੋਏ, ਪ੍ਰਧਾਨ ਮੰਤਰੀ ਮੋਦੀ ਨੇ ਕਿਹਾ, "ਇਹ ਬਿਹਾਰ ਦਾ ਅਪਮਾਨ ਹੈ। ਉਹ ਤੁਸ਼ਟੀਕਰਨ ਦੀ ਕੋਸ਼ਿਸ਼ ’ਚ ਬਿਹਾਰ ਦੇ ਵਿਸ਼ਵਾਸ ਦਾ ਮਜ਼ਾਕ ਉਡਾ ਰਹੇ ਹਨ। ਹੁਣ, ਇਹੀ ਲੋਕ ਘੁਸਪੈਠੀਆਂ ਨੂੰ ਬਚਾਉਣ ’ਚ ਰੁੱਝੇ ਹੋਏ ਹਨ।" ਪ੍ਰਧਾਨ ਮੰਤਰੀ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਬਿਹਾਰ ’ਚ ਵਿਕਾਸ, ਸੁਰੱਖਿਆ ਅਤੇ ਚੰਗੇ ਸ਼ਾਸਨ ਵਾਲੀ ਸਰਕਾਰ ਨੂੰ ਮੁੜ ਸੱਤਾ ’ਚ ਲਿਆਉਣ।