ਸ਼ਰਾਬ-ਸਿਗਰੇਟ ਨਹੀਂ, ਨੌਜਵਾਨਾਂ ਨੂੰ ਲੱਗਿਆ ''ਖੂਨ'' ਦਾ ਨਸ਼ਾ! ਸਾਹਮਣੇ ਆਏ 5 ਹੈਰਾਨ ਕਰਨ ਵਾਲੇ ਮਾਮਲੇ
Monday, Apr 13, 2026 - 10:01 PM (IST)
ਭੋਪਾਲ: ਮੱਧ ਪ੍ਰਦੇਸ਼ ਦੀ ਰਾਜਧਾਨੀ ਭੋਪਾਲ ਤੋਂ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਨੇ ਡਾਕਟਰਾਂ ਅਤੇ ਸਮਾਜ ਨੂੰ ਚਿੰਤਾ ਵਿੱਚ ਪਾ ਦਿੱਤਾ ਹੈ। ਭੋਪਾਲ ਦੇ ਸਭ ਤੋਂ ਵੱਡੇ ਸਰਕਾਰੀ ਹਸਪਤਾਲ, ਹਮੀਦੀਆ ਹਸਪਤਾਲ ਦੇ ਮਨੋਵਿਗਿਆਨ ਵਿਭਾਗ ਵਿੱਚ ਪਿਛਲੇ ਇੱਕ ਸਾਲ ਦੌਰਾਨ 5 ਅਜਿਹੇ ਨੌਜਵਾਨ ਇਲਾਜ ਲਈ ਪਹੁੰਚੇ ਹਨ, ਜਿਨ੍ਹਾਂ ਨੂੰ 'ਬਲੱਡ ਕੰਪੋਨੈਂਟਸ' (ਖੂਨ ਦੇ ਤੱਤ) ਲੈਣ ਦੀ ਲਤ ਲੱਗ ਚੁੱਕੀ ਹੈ।
ਡਾਕਟਰਾਂ ਅਨੁਸਾਰ, ਇਨ੍ਹਾਂ ਨੌਜਵਾਨਾਂ ਦੀ ਉਮਰ 18 ਤੋਂ 25 ਸਾਲ ਦੇ ਵਿਚਕਾਰ ਹੈ। ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਸੋਸ਼ਲ ਮੀਡੀਆ 'ਤੇ ਚੱਲ ਰਹੀਆਂ ਗਲਤ ਵੀਡੀਓਜ਼ ਤੋਂ ਪ੍ਰਭਾਵਿਤ ਹੋ ਕੇ ਇਹ ਨੌਜਵਾਨ ਪਲਾਜ਼ਮਾ ਜਾਂ ਹੋਰ ਬਲੱਡ ਕੰਪੋਨੈਂਟਸ ਨੂੰ ਤਾਕਤ ਵਧਾਉਣ, ਤਣਾਅ ਘਟਾਉਣ ਅਤੇ ਸਰੀਰ ਵਿੱਚ ਊਰਜਾ ਲਿਆਉਣ ਦਾ ਜ਼ਰੀਆ ਮੰਨ ਰਹੇ ਹਨ। ਮਾਹਿਰਾਂ ਅਨੁਸਾਰ ਇਹ ਸਿਰਫ਼ ਇੱਕ ਮਾਨਸਿਕ ਭਰਮ ਹੈ।
ਹਮੀਦੀਆ ਹਸਪਤਾਲ ਦੇ ਮਨੋਵਿਗਿਆਨੀ ਡਾ. ਜੈ ਪ੍ਰਕਾਸ਼ ਅਗਰਵਾਲ ਨੇ ਚੇਤਾਵਨੀ ਦਿੱਤੀ ਹੈ ਕਿ ਬਿਨਾਂ ਕਿਸੇ ਡਾਕਟਰੀ ਲੋੜ ਦੇ ਖੂਨ ਦੇ ਤੱਤ ਚੜ੍ਹਾਉਣਾ ਬੇਹੱਦ ਖਤਰਨਾਕ ਹੈ। ਇਸ ਦੇ ਗੰਭੀਰ ਨਤੀਜੇ ਹੋ ਸਕਦੇ ਹਨ, ਜਿਵੇਂ ਕਿ:
ਗੈਂਗਰੀਨ: ਗਲਤ ਤਰੀਕੇ ਨਾਲ ਇਨਫਿਊਜ਼ਨ ਲੈਣ ਨਾਲ ਸਰੀਰ ਦੇ ਅੰਗ ਸੜ ਸਕਦੇ ਹਨ।
ਗੰਭੀਰ ਬੀਮਾਰੀਆਂ: HIV ਅਤੇ ਹੈਪੇਟਾਈਟਿਸ ਵਰਗੀਆਂ ਨਾਮੁਰਾਦ ਬੀਮਾਰੀਆਂ ਦਾ ਖਤਰਾ ਵੱਧ ਜਾਂਦਾ ਹੈ।
ਅੰਗ ਫੇਲ ਹੋਣਾ: ਸਰੀਰ ਦੇ ਅੰਦਰੂਨੀ ਹਿੱਸਿਆਂ ਵਿੱਚ ਸੋਜ ਆ ਸਕਦੀ ਹੈ ਅਤੇ ਅੰਗ ਫੇਲ ਹੋ ਸਕਦੇ ਹਨ।
ਰਿਪੋਰਟ ਅਨੁਸਾਰ, ਜਦੋਂ ਪਰਿਵਾਰ ਵਾਲਿਆਂ ਨੇ ਇਨ੍ਹਾਂ ਨੌਜਵਾਨਾਂ ਦੀਆਂ ਗਤੀਵਿਧੀਆਂ 'ਤੇ ਰੋਕ ਲਗਾਈ, ਤਾਂ ਉਹ ਬਹੁਤ ਜ਼ਿਆਦਾ ਚਿੜਚਿੜੇ ਅਤੇ ਹਿੰਸਕ ਹੋ ਗਏ। ਹਾਲਤ ਵਿਗੜਨ 'ਤੇ ਹੀ ਉਨ੍ਹਾਂ ਨੂੰ ਕੌਂਸਲਿੰਗ ਲਈ ਮਾਹਿਰਾਂ ਕੋਲ ਲਿਆਂਦਾ ਗਿਆ। ਡਾਕਟਰਾਂ ਨੇ ਇਸ ਨੂੰ ਸਮਾਜ ਲਈ ਇੱਕ 'ਖਤਰੇ ਦੀ ਘੰਟੀ' ਕਰਾਰ ਦਿੱਤਾ ਹੈ।
