''ਹਥਿਆਰ ਰੱਖੋ, 5 ਬੱਚੇ ਪੈਦਾ ਕਰੋ...'': BJP MP ਦੀ ਹਿੰਦੂ ਨੌਜਵਾਨਾਂ ਨੂੰ ਅਪੀਲ

ਖਰਗੋਨ : ਭਾਰਤੀ ਜਨਤਾ ਪਾਰਟੀ (BJP) ਦੇ ਰਾਸ਼ਟਰੀ ਜਨਰਲ ਸਕੱਤਰ ਅਤੇ ਮੱਧ ਪ੍ਰਦੇਸ਼ ਦੇ ਖਰਗੋਨ-ਬੜਵਾਨੀ ਤੋਂ ਲੋਕ ਸਭਾ ਮੈਂਬਰ ਗਜੇਂਦਰ ਸਿੰਘ ਪਟੇਲ ਨੇ ਹਿੰਦੂ ਨੌਜਵਾਨਾਂ ਨੂੰ ਵਿਆਹ ਕਰਵਾਉਣ ਅਤੇ ਪੰਜ ਬੱਚੇ ਪੈਦਾ ਕਰਨ ਦੀ ਅਪੀਲ ਕੀਤੀ ਹੈ। ਇੱਕ ਪ੍ਰੋਗਰਾਮ ਨੂੰ ਸੰਬੋਧਨ ਕਰਦਿਆਂ ਬੀ.ਜੇ.ਪੀ. ਸੰਸਦ ਮੈਂਬਰ ਨੇ ਦਾਅਵਾ ਕੀਤਾ ਕਿ 'ਸਨਾਤਨੀਆਂ' ਦੀ ਜਨਮ ਦਰ ਘੱਟ ਕੇ 1.9 ਰਹਿ ਗਈ ਹੈ, ਜਦਕਿ ਦੂਜੇ ਭਾਈਚਾਰੇ ਦੀ ਜਨਮ ਦਰ 2.9 ਪ੍ਰਤੀਸ਼ਤ ਹੈ।

ਬੀ.ਜੇ.ਪੀ. MP ਗਜੇਂਦਰ ਪਟੇਲ ਨੇ ਕਿਹਾ ਕਿ 1947 ਤੋਂ 1967 ਦੇ ਵਿਚਕਾਰ ਲੋਕ 20, 21 ਜਾਂ 22 ਸਾਲ ਦੀ ਉਮਰ ਵਿੱਚ ਵਿਆਹ ਕਰਵਾ ਲੈਂਦੇ ਸਨ ਅਤੇ ਵੱਡੇ ਪਰਿਵਾਰ ਹੁੰਦੇ ਸਨ। ਹੁਣ ਨੌਜਵਾਨ 30, 35 ਜਾਂ 37 ਸਾਲ ਦੀ ਉਮਰ ਵਿੱਚ ਵਿਆਹ ਕਰਦੇ ਹਨ ਅਤੇ ਸਿਰਫ਼ ਇੱਕ ਬੱਚਾ ਪੈਦਾ ਕਰਦੇ ਹਨ। ਉਨ੍ਹਾਂ ਨੌਜਵਾਨਾਂ ਨੂੰ ਮੌਜੂਦਾ ਹਾਲਾਤ ਸਮਝਣ ਅਤੇ 5 ਬੱਚੇ ਪੈਦਾ ਕਰਨ ਲਈ ਕਿਹਾ।

ਉਨ੍ਹਾਂ ਸਮਾਜ ਅਤੇ ਪਰਿਵਾਰ ਨੂੰ ਮਜ਼ਬੂਤ ਕਰਨ ਲਈ ਜਿਮ ਅਤੇ ਪਰੰਪਰਾਗਤ ਕੁਸ਼ਤੀ ਦੇ ਅਖਾੜਿਆਂ ਨੂੰ ਉਤਸ਼ਾਹਿਤ ਕਰਨ ਦੀ ਲੋੜ ਦੱਸੀ। ਮਾਂ ਦੁਰਗਾ ਦੀ ਭਗਤੀ ਦੇ ਨਾਲ-ਨਾਲ ਤਾਕਤ ਦੀ ਲੋੜ 'ਤੇ ਜ਼ੋਰ ਦਿੰਦਿਆਂ ਉਨ੍ਹਾਂ ਹਥਿਆਰ ਰੱਖਣ ਦੀ ਗੱਲ ਵੀ ਆਖੀ।

ਨੌਜਵਾਨਾਂ ਵਿੱਚ ਵਧਦੇ ਨਸ਼ੇ ਅਤੇ ਦਿਖਾਵੇ 'ਤੇ ਚਿੰਤਾ ਪ੍ਰਗਟਾਉਂਦਿਆਂ ਗਜੇਂਦਰ ਪਟੇਲ ਨੇ ਆਪਣੀ '3D' ਮੁਹਿੰਮ ਦਾ ਜ਼ਿਕਰ ਕੀਤਾ, ਜਿਸ ਵਿੱਚ ਡੀਜੇ (DJ), ਡਰੱਗਜ਼ (Drugs) ਅਤੇ ਦਾਜ (Dowry) ਨੂੰ ਸਮਾਜ ਲਈ ਗੰਭੀਰ ਚੁਣੌਤੀ ਦੱਸਿਆ ਗਿਆ। ਉਨ੍ਹਾਂ ਦਾਅਵਾ ਕੀਤਾ ਕਿ ਡੀਜੇ 'ਤੇ ਨੱਚਣ ਵਾਲੇ ਲਗਭਗ 100 ਫੀਸਦੀ ਨੌਜਵਾਨ ਹਿੰਦੂ ਹਨ ਅਤੇ ਉਨ੍ਹਾਂ ਵਿੱਚੋਂ 60 ਫੀਸਦੀ ਨਸ਼ੇ ਦੇ ਪ੍ਰਭਾਵ ਹੇਠ ਹੁੰਦੇ ਹਨ। ਉਨ੍ਹਾਂ ਲੋਕਾਂ ਨੂੰ ਇਨ੍ਹਾਂ ਕੁਰੀਤੀਆਂ ਨੂੰ ਤਿਆਗ ਕੇ ਸਮਾਜ ਨੂੰ ਮਜ਼ਬੂਤ ਕਰਨ ਦੀ ਅਪੀਲ ਕੀਤੀ।