ਅਗਨੀਵੀਰ ਭਰਤੀ ਪ੍ਰੀਖਿਆ ’ਚ ਨੌਜਵਾਨਾਂ ਨੇ ਲਗਾਏ ਹੇਰਾਫੇਰੀ ਦੇ ਦੋਸ਼, ਭਰਤੀ ਦਫਤਰ ’ਚ ਦਰਜ ਕਰਵਾਈ ਸ਼ਿਕਾਇਤ

ਚਰਖੀ ਦਾਦਰੀ– ਅਗਨੀਵੀਰ ਭਰਤੀ ਦੇ ਪਹਿਲੇ ਪੜਾਅ ’ਚ ਹੀ ਸਵਾਲ ਖੜ੍ਹੇ ਹੋ ਗਏ ਹਨ। ਭਰਤੀ ਪ੍ਰੀਖਿਆ ’ਚ ਸ਼ਾਮਲ ਨੌਜਵਾਨਾਂ ਨੇ ਭਰਤੀ ਪ੍ਰਕਿਰਿਆ ’ਚ ਹੇਰਾਫੇਰੀ ਦੇ ਦੋਸ਼ ਲਗਾਉਂਦੇ ਹੋ ਰੋਸ ਜ਼ਾਹਿਰ ਕੀਤਾ ਹੈ। ਨਤੀਜੇ ਆਉਣ ਤੋਂ ਬਾਅਦ ਭਰਤੀ ਦੇ ਨਤੀਜਿਆਂ ’ਚ ਕੈਟਾਗਰੀ ਵਾਈਜ਼ ਬਣਾਈ ਮੈਰਿਟ ’ਤੇ ਨੌਜਵਾਨਾਂ ਨੇ ਸਵਾਲ ਚੁੱਕੇ। ਚਾਰ ਜ਼ਿਲ੍ਹਿਆਂ ਦੇ ਨੌਜਵਾਨ ਇਕੱਠੇ ਹੋਏ ਅਤੇ ਭਰਤੀ ਦਫਤਰ ਪਹੁੰਚ ਕੇ ਆਪਣੀ ਸ਼ਿਕਾਇਤ ਦਰਜ ਕਰਵਾਈ। ਉੱਥੇ ਹੀ ਨੌਜਵਾਨਾਂ ਨੇ ਮਿੰਨੀ ਸਕੱਤਰੇਤ ਪਹੁੰਚ ਕੇ ਭਰਤੀ ਨਾਲ ਸੰਬੰਧਿਤ ਸੂਚਨਾ ਮੰਗੀ ਅਤੇ ਗੁੱਸਾ ਜ਼ਾਹਿਰ ਕਰਦੇ ਹੋਏ ਕੋਰਟ ’ਚ ਕੇਸ ਦਰਜ ਕਰਨ ਦਾ ਫੈਸਲਾ ਲਿਆ। 

ਜ਼ਿਕਰਯੋਗ ਹੈ ਕਿ 15 ਜਨਵਰੀ ਨੂੰ ਅਗਨੀਵੀਰ ਲਿਪਿਕ ਭਰਤੀ ਦੀ ਪ੍ਰੀਖਿਆ ਦਾ ਆਯੋਜਨ ਕੀਤਾ ਗਿਆ ਸੀ ਜਿਸਦੇ ਹਾਲ ਹੀ ’ਚ ਨਤੀਜੇ ਜਾਰੀ ਕੀਤੇ ਗਏ ਹਨ। ਭਾਰਤੀ ਪ੍ਰੀਖਿਆ ਦੇ ਨਤੀਜਿਆਂ ’ਚ ਚਰਖੀ ਦਾਦਰੀ ਭਰਤੀ ਦਫਤਰ ਅਧੀਨ ਆਉਣ ਵਾਲੇ ਜ਼ਿਲ੍ਹਾ ਚਰਖੀ ਦਾਦਰੀ, ਭਿਵਾਨੀ, ਮਹੇਂਦਰਗੜ੍ਹ ਅਤੇ ਰੇਵਾੜੀ ਦੇ ਨੌਜਵਾਨਾਂ ’ਚੋਂ ਸਭ ਤੋਂ ਜ਼ਿਆਦਾ 83 ਨੌਜਵਾਨ ਪ੍ਰੀਖਿਆ ਨਤੀਜਿਆਂ ’ਚ ਹੇਰਾਫੇਰੀ ਦੇ ਦੋਸ਼ ਲਗਾ ਰਹੇ ਹਨ। 

ਉੱਥੇ ਹੀ ਨੌਜਵਾਨ ਰੋਹਿਤ ਪਿਚੌਪਾ, ਰਾਕੇਸ਼ ਪਿਚੌਪਾ, ਸਾਹਿਲ ਜੁਈ, ਸਚਿਨ ਸੁਰਪੁਰਾ, ਦੀਪਕ ਬੁਢੇਡੀ, ਸੁਮਿਤ ਬੁਢੇਡੀ, ਰੋਹਿਤ ਸੋਹਸਡਾ, ਅੰਕਿਤ ਦੁਆਰਕਾ ਆਦਿ ਨੇ ਪਿਚੌਪਾ ਦੇ ਸਾਬਕਾ ਸਰਪੰਚ ਵਿਕਾਸ ਕੁਮਾਰ ਦੀ ਅਗਵਾਈ ’ਚ ਰੋਸ ਜਤਾਉਂਦੇ ਹੋਏ ਕਿਹਾ ਕਿ ਇਸ ਭਰਤੀ ’ਚ 181, 184 ਅਤੇ 186 ਅੰਕ ਲੈਣ ਵਾਲੇ ਨੌਜਵਾਨਾਂ ਦੀ ਚੋਣ ਹੋਈ ਹੈ ਜਦਕਿ 200 ਅੰਕ ਲੈਣ ਵਾਲੇ ਲੋਕਾਂ ਨੂੰ ਭਰਤੀ ਨਹੀਂ ਕੀਤਾ ਗਿਆ। ਨੌਜਵਾਨਾਂ ਨੇ ਕਿਹਾ ਕਿ ਭਰਤੀ ’ਚ ਹੇਰਾਫੇਰੀ ਕਰਕੇ ਉਨ੍ਹਾਂ ਦੇ ਸੁਫਨਿਆਂ ’ਤੇ ਪਾਣੀ ਫੇਰਿਆ ਜਾ ਰਿਹਾ ਹੈ। ਨੌਜਵਾਨਾਂ ਨੇ ਇਸ ਲਈ ਆਰ.ਟੀ.ਆਈ. ਰਾਹੀਂ ਕੇਂਦਰੀ ਜਨ ਸੂਚਨਾ ਅਧਿਕਾਰੀ ਕਮ ਕਰਨਲ ਆਨੰਦ ਸਾਕਲੇ ਤੋਂ ਭਰਤੀ ਨਾਲ ਸੰਬੰਧਿਤ ਜਾਣਕਾਰੀ ਮੰਗੀ ਹੈ। ਪਿਚੌਪਾ ਦੇ ਸਾਬਕਾ ਸਰਪੰਚ ਵਿਕਾਸ ਨੇ ਕਿਹਾ ਕਿ ਅਗਨੀਵੀਰ ਭਰਤੀ ਪ੍ਰਕਿਰਿਆ ’ਚ ਹੇਰਾਫੇਰੀ ਕਰਕੇ ਯੋਗ ਨੌਜਵਾਨਾਂ ਨੂੰ ਭਰਤੀ ਨਹੀਂ ਕੀਤਾ ਜਾ ਰਿਹਾ ਪਰ ਉਹ ਹੋਰ ਨੌਜਵਾਨਾਂ ਨਾਲ ਅਜਿਹਾ ਨਹੀਂ ਹੋਣ ਦੇਣਗੇ ਅਤੇ ਨੌਜਵਾਨਾਂ ਦੇ ਨਾਲ ਸ਼ੰਘਰਸ਼ ਕਰਕੇ ਉਨ੍ਹਾਂ ਨੂੰ ਨਿਆਂ ਦਿਲਾਵਾਂਗੇ।