ਹੁਣ ਨਹੀਂ ਪਵੇਗੀ ਟੋਲ ਪਲਾਜ਼ਾ ''ਤੇ ਰੁਕਣ ਦੀ ਲੋੜ ! ਸ਼ੁਰੂ ਹੋਇਆ ਦੇਸ਼ ਦਾ ਪਹਿਲਾ ''ਸਟਾਪ-ਫ੍ਰੀ'' MLFF ਸਿਸਟਮ, ਇੰਝ ਕਰਦੈ ਕੰਮ

ਨੈਸ਼ਨਲ ਡੈਸਕ : ਦੇਸ਼ ਵਿੱਚ ਹਾਈਵੇਅ ਦੇ ਸਫ਼ਰ ਨੂੰ ਤੇਜ਼ ਅਤੇ ਸੁਖਾਲਾ ਬਣਾਉਣ ਲਈ ਭਾਰਤੀ ਰਾਸ਼ਟਰੀ ਰਾਜਮਾਰਗ ਅਥਾਰਟੀ (NHAI) ਨੇ ਇੱਕ ਵੱਡੀ ਪਹਿਲ ਕੀਤੀ ਹੈ। ਗੁਜਰਾਤ ਵਿੱਚ NH-48 ਦੇ ਸੂਰਤ-ਭਰੂਚ ਸੈਕਸ਼ਨ 'ਤੇ ਸਥਿਤ ਚੌਰਿਆਸੀ ਟੋਲ ਪਲਾਜ਼ਾ 'ਤੇ ਦੇਸ਼ ਦਾ ਪਹਿਲਾ ਮਲਟੀ-ਲੇਨ ਫ੍ਰੀ ਫਲੋ (MLFF) ਯਾਨੀ ਬਿਨਾਂ ਰੁਕਾਵਟ ਵਾਲਾ ਟੋਲ ਸਿਸਟਮ ਸ਼ੁਰੂ ਕੀਤਾ ਗਿਆ ਹੈ।
 ਇਸ ਨਵੇਂ ਸਿਸਟਮ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਹੈ ਕਿ ਹੁਣ ਵਾਹਨਾਂ ਨੂੰ ਟੋਲ ਟੈਕਸ ਦੇਣ ਲਈ ਲਾਈਨਾਂ ਵਿੱਚ ਖੜ੍ਹੇ ਹੋਣ ਜਾਂ ਰੁਕਣ ਦੀ ਲੋੜ ਨਹੀਂ ਪਵੇਗੀ। ਇਹ ਤਕਨੀਕ ਆਟੋਮੈਟਿਕ ਨੰਬਰ ਪਲੇਟ ਰਿਕੋਗਨੀਸ਼ਨ (ANPR) ਅਤੇ FASTag 'ਤੇ ਅਧਾਰਤ ਹੈ। ਜਿਵੇਂ ਹੀ ਕੋਈ ਵਾਹਨ ਟੋਲ ਪੁਆਇੰਟ ਤੋਂ ਗੁਜ਼ਰਦਾ ਹੈ, ਸਿਸਟਮ ਆਪਣੇ ਆਪ ਉਸਦੀ ਨੰਬਰ ਪਲੇਟ ਨੂੰ ਸਕੈਨ ਕਰ ਲੈਂਦਾ ਹੈ ਅਤੇ FASTag ਰਾਹੀਂ ਟੈਕਸ ਕੱਟ ਲਿਆ ਜਾਂਦਾ ਹੈ।

ਪਹਿਲੇ ਹੀ ਦਿਨ ਮਿਲਿਆ ਭਰਵਾਂ ਹੁੰਗਾਰਾ
 ਸੜਕੀ ਆਵਾਜਾਈ ਅਤੇ ਰਾਜਮਾਰਗ ਮੰਤਰਾਲੇ ਅਨੁਸਾਰ, ਇਸ ਪ੍ਰਣਾਲੀ ਦੇ ਲਾਗੂ ਹੋਣ ਦੇ ਪਹਿਲੇ ਹੀ ਦਿਨ ਲਗਭਗ 41,500 ਵਾਹਨ ਬਿਨਾਂ ਰੁਕਾਵਟ ਦੇ ਇਸ ਟੋਲ ਪੁਆਇੰਟ ਤੋਂ ਗੁਜ਼ਰੇ ਹਨ। ਇਸ ਨਾਲ ਨਾ ਸਿਰਫ਼ ਟ੍ਰੈਫਿਕ ਜਾਮ ਤੋਂ ਮੁਕਤੀ ਮਿਲੇਗੀ, ਸਗੋਂ ਸਫ਼ਰ ਦਾ ਸਮਾਂ ਅਤੇ ਬਾਲਣ (ਈਂਧਨ) ਦੀ ਵੀ ਬਚਤ ਹੋਵੇਗੀ। ਇਸ ਤੋਂ ਇਲਾਵਾ, ਵਾਹਨਾਂ ਦੇ ਨਿਰੰਤਰ ਚੱਲਣ ਨਾਲ ਪ੍ਰਦੂਸ਼ਣ ਵਿੱਚ ਵੀ ਕਮੀ ਆਵੇਗੀ।

ਸਾਵਧਾਨੀ: FASTag ਵਿੱਚ ਬੈਲੇਂਸ ਰੱਖਣਾ ਹੈ ਜ਼ਰੂਰੀ
 ਹਾਈਵੇਅ ਵਰਤੋਂਕਾਰਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਆਪਣੇ FASTag ਵਿੱਚ ਲੋੜੀਂਦਾ ਬੈਲੇਂਸ ਜ਼ਰੂਰ ਰੱਖਣ। ਜੇਕਰ ਬੈਲੇਂਸ ਘੱਟ ਹੋਣ ਕਾਰਨ ਟੋਲ ਨਹੀਂ ਕੱਟਿਆ ਜਾਂਦਾ, ਤਾਂ ਈ-ਨੋਟਿਸ ਜਾਰੀ ਕੀਤਾ ਜਾਵੇਗਾ। ਜੇਕਰ 72 ਘੰਟਿਆਂ ਦੇ ਅੰਦਰ ਭੁਗਤਾਨ ਨਹੀਂ ਕੀਤਾ ਜਾਂਦਾ, ਤਾਂ ਦੁੱਗਣਾ ਸ਼ੁਲਕ ਦੇਣਾ ਪੈ ਸਕਦਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e