ਖੁਦਾਈ ਦੌਰਾਨ ਨਿਕਲੇ ‘ਰਹੱਸਮਈ ਖ਼ਜ਼ਾਨੇ’ ਦਾ ਖੁੱਲ੍ਹਿਆ ਰਾਜ਼ ! ਹੈਰਾਨ ਕਰੇਗਾ ਮਾਮਲਾ

ਨੈਸ਼ਨਲ ਡੈਸਕ : ਰਾਜਸਥਾਨ ਦੇ ਟੋਂਕ ਜ਼ਿਲ੍ਹੇ ਵਿੱਚ ਬੀਤੇ ਦਿਨ ਖੁਦਾਈ ਦੌਰਾਨ ਮਿਲੇ ਇੱਕ ਰਹੱਸਮਈ ਘੜੇ ਨੇ ਇਲਾਕੇ ਵਿੱਚ ਸਨਸਨੀ ਫੈਲਾ ਦਿੱਤੀ ਸੀ, ਪਰ ਹੁਣ ਪੁਲਸ ਨੇ ਇਸ ਦੇ ਪਿੱਛੇ ਦੀ ਹੈਰਾਨ ਕਰਨ ਵਾਲੀ ਸੱਚਾਈ ਦਾ ਪਰਦਾਫਾਸ਼ ਕਰ ਦਿੱਤਾ ਹੈ। ਇਹ ਕੋਈ ਪ੍ਰਾਚੀਨ ਖ਼ਜ਼ਾਨਾ ਨਹੀਂ ਸੀ, ਸਗੋਂ ਤਾਂਤਰਿਕ ਦੇ ਭੇਸ ਵਿੱਚ ਰਚੀ ਗਈ ਠੱਗੀ ਦੀ ਇੱਕ ਵੱਡੀ ਸਾਜ਼ਿਸ਼ ਸੀ।

ਖੁਦਾਈ 'ਚ ਮਿਲਿਆ ਸੀ 150 ਕਿਲੋ ਦਾ ਘੜਾ 
ਟੋਂਕ ਦੇ ਸੀਂਦੜਾ ਪਿੰਡ ਵਿੱਚ ਚਾਰਾਗਾਹ ਦੀ ਜ਼ਮੀਨ 'ਤੇ ਪੂਜਾ ਦਾ ਸਾਮਾਨ ਮਿਲਣ ਤੋਂ ਬਾਅਦ ਪਿੰਡ ਵਾਸਿਆਂ ਨੂੰ ਸ਼ੱਕ ਹੋਇਆ ਕਿ ਜ਼ਮੀਨ ਵਿੱਚ ਖ਼ਜ਼ਾਨਾ ਹੋ ਸਕਦਾ ਹੈ। ਤਹਿਸੀਲਦਾਰ ਦੇ ਆਦੇਸ਼ 'ਤੇ ਜਦੋਂ ਜੇਸੀਬੀ ਨਾਲ ਖੁਦਾਈ ਕਰਵਾਈ ਗਈ, ਤਾਂ ਕਰੀਬ 100 ਤੋਂ 150 ਕਿਲੋ ਵਜ਼ਨੀ ਇੱਕ ਪੁਰਾਣਾ ਘੜਾ ਨਿਕਲਿਆ। ਇਸ ਘੜੇ ਦੇ ਅੰਦਰ ਸੋਨੇ ਵਰਗੀਆਂ ਇੱਟਾਂ ਅਤੇ ਬਿਸਕੁਟ ਦੇਖ ਕੇ ਹਰ ਕੋਈ ਹੈਰਾਨ ਰਹਿ ਗਿਆ ਸੀ।

ਪੁਲਸ ਨੇ ਦੋ ਮੁਲਜ਼ਮ ਕੀਤੇ ਕਾਬੂ
ਮਾਮਲੇ ਦੀ ਜਾਂਚ ਕਰਦਿਆਂ ਨਿਵਾਈ ਥਾਣਾ ਪੁਲਸ ਨੇ 4 ਜਨਵਰੀ ਦੀ ਰਾਤ ਨੂੰ ਇੱਕ ਕਾਰ ਨੂੰ ਘੇਰ ਕੇ ਮੁਕੇਸ਼ ਮੀਣਾ ਅਤੇ ਅਭਿਸ਼ੇਕ ਮੀਣਾ ਨਾਮ ਦੇ ਦੋ ਨੌਜਵਾਨਾਂ ਨੂੰ ਗ੍ਰਿਫਤਾਰ ਕੀਤਾ। ਇਨ੍ਹਾਂ ਕੋਲੋਂ 5 ਕਿਲੋ 242 ਗ੍ਰਾਮ ਨਕਲੀ ਸੋਨਾ ਬਰਾਮਦ ਹੋਇਆ ਹੈ। ਜਾਂਚ ਵਿੱਚ ਪਤਾ ਲੱਗਿਆ ਕਿ ਇਹ ਸੋਨਾ ਅਸਲ ਵਿੱਚ ਪਿੱਤਲ ਅਤੇ ਤਾਂਬੇ ਦਾ ਬਣਿਆ ਸੀ, ਜਿਸ 'ਤੇ ਸੋਨੇ ਦੀ ਪਰਤ ਚੜ੍ਹਾਈ ਗਈ ਸੀ ਤਾਂ ਜੋ ਇਹ ਅਸਲੀ ਲੱਗੇ।

ਠੱਗੀ ਦਾ ਅਨੋਖਾ ਤਰੀਕਾ 
ਪੁੱਛਗਿੱਛ ਦੌਰਾਨ ਮੁਲਜ਼ਮ ਮੁਕੇਸ਼ ਮੀਣਾ ਨੇ ਕਬੂਲਿਆ ਕਿ ਉਹ ਖੁਦ ਨੂੰ ਅਘੋਰੀ ਮਹਾਰਾਜ ਅਤੇ ਤਾਂਤਰਿਕ ਦੱਸ ਕੇ ਲੋਕਾਂ ਨੂੰ ਆਪਣੇ ਜਾਲ ਵਿੱਚ ਫਸਾਉਂਦਾ ਸੀ। ਇਹ ਠੱਗ ਪਹਿਲਾਂ ਹੀ ਨਕਲੀ ਸੋਨੇ ਨਾਲ ਭਰਿਆ ਘੜਾ ਜ਼ਮੀਨ ਵਿੱਚ ਦਬਾ ਦਿੰਦੇ ਸਨ ਅਤੇ ਫਿਰ ਤੰਤਰ-ਮੰਤਰ ਦਾ ਨਾਟਕ ਕਰਕੇ ਲੋਕਾਂ ਨੂੰ ਖ਼ਜ਼ਾਨਾ ਕੱਢ ਕੇ ਦਿਖਾਉਂਦੇ ਸਨ। ਉਹ ਪੀੜਤਾਂ ਨੂੰ ਘੜਾ 20 ਦਿਨਾਂ ਤੱਕ ਨਾ ਖੋਲ੍ਹਣ ਦੀ ਹਦਾਇਤ ਦਿੰਦੇ ਸਨ। ਜੇਕਰ ਬਾਅਦ ਵਿੱਚ ਸੋਨਾ ਨਕਲੀ ਨਿਕਲਦਾ, ਤਾਂ ਉਹ ਇਹ ਕਹਿ ਕੇ ਪੱਲਾ ਝਾੜ ਲੈਂਦੇ ਸਨ ਕਿ ਤੰਤਰ ਸਹੀ ਤਰ੍ਹਾਂ ਨਹੀਂ ਕੀਤਾ ਗਿਆ, ਇਸ ਲਈ ਸੋਨਾ ਪਿੱਤਲ ਬਣ ਗਿਆ।

ਅਮੀਰ ਅਤੇ ਪ੍ਰਭਾਵਸ਼ਾਲੀ ਲੋਕ ਸਨ ਨਿਸ਼ਾਨਾ 
ਪੁਲਸ ਅਨੁਸਾਰ ਇਹ ਗਿਰੋਹ ਖਾਸ ਤੌਰ 'ਤੇ ਸਰਕਾਰੀ ਕਰਮਚਾਰੀਆਂ ਅਤੇ ਪ੍ਰਭਾਵਸ਼ਾਲੀ ਲੋਕਾਂ ਨੂੰ ਨਿਸ਼ਾਨਾ ਬਣਾਉਂਦਾ ਸੀ ਤਾਂ ਜੋ ਬਦਨਾਮੀ ਦੇ ਡਰੋਂ ਉਹ ਪੁਲਿਸ ਕੋਲ ਸ਼ਿਕਾਇਤ ਨਾ ਕਰਨ। ਫਿਲਹਾਲ ਪੁਲਸ ਨੇ ਮੁਲਜ਼ਮਾਂ ਕੋਲੋਂ ਕਾਰ ਅਤੇ ਨਕਲੀ ਸੋਨਾ ਜ਼ਬਤ ਕਰ ਲਿਆ ਹੈ ਅਤੇ ਇਹ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਉਨ੍ਹਾਂ ਨੇ ਹੁਣ ਤੱਕ ਕਿੰਨੇ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾਇਆ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e