ਗਰਮੀ ਕੱਢਣ ਲੱਗੀ ਵੱਟ ! ਪਿਘਲ ਗਈ ਏਅਰਪੋਰਟ ਦੇ ਰਨਵੇ ਦੀ ਲੁੱਕ, ਫਲਾਈਟਾਂ ਨੂੰ ਕਰਨਾ ਪਿਆ ਡਾਇਵਰਟ

ਨੈਸ਼ਨਲ ਡੈਸਕ : ਮੱਧ ਪ੍ਰਦੇਸ਼ ਦੇ ਇੰਦੌਰ ਵਿੱਚ ਸਥਿਤ ਦੇਵੀ ਅਹਿਲਿਆਬਾਈ ਹੋਲਕਰ ਹਵਾਈ ਅੱਡੇ 'ਤੇ ਸੋਮਵਾਰ ਨੂੰ ਅਚਾਨਕ ਵਧੀ ਗਰਮੀ ਕਾਰਨ ਰਨਵੇ ਦਾ ਇੱਕ ਹਿੱਸਾ ਪਿਘਲਣ ਦੀ ਖ਼ਬਰ ਸਾਹਮਣੇ ਆਈ ਹੈ। ਇਸ ਘਟਨਾ ਕਾਰਨ ਹਵਾਈ ਅੱਡੇ 'ਤੇ ਉਤਰਨ ਵਾਲੀਆਂ ਦੋ ਯਾਤਰੀ ਉਡਾਣਾਂ ਨੂੰ ਸੂਬੇ ਦੀ ਰਾਜਧਾਨੀ ਭੋਪਾਲ ਵੱਲ ਮੋੜਨਾ ਪਿਆ।

ਮੁਰੰਮਤ ਦੌਰਾਨ ਵਾਪਰੀ ਘਟਨਾ 
ਹਵਾਈ ਅੱਡੇ ਦੇ ਜਨਸੰਪਰਕ ਅਧਿਕਾਰੀ ਰਾਮਸਵਰੂਪ ਯਾਦਵ ਨੇ ਦੱਸਿਆ ਕਿ ਰਨਵੇ ਦੀ ਰੀ-ਕਾਰਪੇਟਿੰਗ (ਮੁਰੰਮਤ) ਦਾ ਕੰਮ ਹਰ ਰੋਜ਼ ਰਾਤ 11 ਵਜੇ ਤੋਂ ਸਵੇਰੇ 5 ਵਜੇ ਦੇ ਵਿਚਕਾਰ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਦੱਸਿਆ ਕਿ ਸ਼ਹਿਰ ਵਿੱਚ ਤਾਪਮਾਨ ਅਚਾਨਕ ਵਧਣ ਕਾਰਨ ਨਿਯਮਤ ਨਿਰੀਖਣ ਦੌਰਾਨ ਇਹ ਪਾਇਆ ਗਿਆ ਕਿ ਰਨਵੇ ਦੇ ਇੱਕ ਹਿੱਸੇ 'ਤੇ ਵਿਛਾਈ ਗਈ ਕੋਲਤਾਰ (ਬਿਟੂਮਨ) ਦੀ ਪਰਤ ਪਿਘਲ ਗਈ ਹੈ ਅਤੇ ਤੈਅ ਮਾਪਦੰਡਾਂ ਮੁਤਾਬਕ ਢਿੱਲੀ ਪੈ ਗਈ ਹੈ।

ਯਾਤਰੀਆਂ ਨੂੰ ਹੋਈ ਪ੍ਰੇਸ਼ਾਨੀ
 ਰਨਵੇ ਦੀ ਖਰਾਬੀ ਕਾਰਨ ਇੰਡੀਗੋ ਏਅਰਲਾਈਨਜ਼ ਦੀਆਂ ਦੋ ਉਡਾਣਾਂ ਦਿੱਲੀ-ਇੰਦੌਰ ਅਤੇ ਰਾਏਪੁਰ-ਇੰਦੌਰ ਨੂੰ ਇੰਦੌਰ ਦੀ ਬਜਾਏ ਭੋਪਾਲ ਹਵਾਈ ਅੱਡੇ 'ਤੇ ਉਤਾਰਿਆ ਗਿਆ। ਅਧਿਕਾਰੀਆਂ ਅਨੁਸਾਰ, ਨਿੱਜੀ ਏਅਰਲਾਈਨ ਕੰਪਨੀ ਇਨ੍ਹਾਂ ਯਾਤਰੀਆਂ ਨੂੰ ਭੋਪਾਲ ਤੋਂ ਉਨ੍ਹਾਂ ਦੀ ਅਸਲ ਮੰਜ਼ਿਲ ਇੰਦੌਰ ਤੱਕ ਲਿਆਉਣ ਲਈ ਲੋੜੀਂਦੇ ਪ੍ਰਬੰਧ ਕਰ ਰਹੀ ਹੈ।

20 ਮਿੰਟਾਂ ਵਿੱਚ ਕੀਤੀ ਗਈ ਮੁਰੰਮਤ 
ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਸਿਵਲ ਇੰਜੀਨੀਅਰਾਂ ਦੀ ਟੀਮ ਨੇ ਮੋਰਚਾ ਸੰਭਾਲਿਆ ਅਤੇ ਮਹਿਜ਼ 20 ਮਿੰਟਾਂ ਦੇ ਅੰਦਰ ਜ਼ਰੂਰੀ ਮੁਰੰਮਤ ਦਾ ਕੰਮ ਪੂਰਾ ਕਰ ਲਿਆ। ਰਨਵੇ ਠੀਕ ਹੋਣ ਤੋਂ ਬਾਅਦ ਇੰਦੌਰ ਹਵਾਈ ਅੱਡੇ 'ਤੇ ਜਹਾਜ਼ਾਂ ਦੀ ਆਵਾਜਾਈ ਆਮ ਵਾਂਗ ਬਹਾਲ ਕਰ ਦਿੱਤੀ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e