ਲੰਡਨ ਤੋਂ ਮੁੰਬਈ ਪੁੱਜਾ ਛਤਰਪਤੀ ਸ਼ਿਵਾਜੀ ਦਾ ਮਾਰੂ ਹਥਿਆਰ ''ਵਾਘ ਨਖ'', ਸਤਾਰਾ ਦੇ ਮਿਊਜ਼ੀਅਮ ''ਚ ਲੱਗੇਗੀ ਪ੍ਰਦਰਸ਼ਨੀ
Wednesday, Jul 17, 2024 - 08:43 PM (IST)
ਨਵੀਂ ਦਿੱਲੀ- ਮਹਾਰਾਸ਼ਟਰ ਦੇ ਸਤਾਰਾ ਦੀ ਹਵਾ 'ਚ ਉਤਸੁਕਤਾ ਦੀ ਲਹਿਰ ਦੌੜ ਰਹੀ ਹੈ। ਰੰਗ-ਬਿਰੰਗੇ ਝੰਡੇ ਹਵਾ ਵਿਚ ਲਹਿਰਾ ਰਹੇ ਹਨ ਅਤੇ ਸੜਕਾਂ 'ਤੇ ਉਤਸ਼ਾਹ ਦੀ ਲਹਿਰ ਹੈ। ਇਸ ਖੁਸ਼ੀ ਦਾ ਕਾਰਨ ਛਤਰਪਤੀ ਸ਼ਿਵਾਜੀ ਮਹਾਰਾਜ ਦੇ ਮਹਾਨ ਹਥਿਆਰ 'ਵਾਘ ਨਖ' ਦੀ ਘਰ ਵਾਪਸੀ ਹੈ।
ਸਦੀਆਂ ਤੋਂ, ਮਰਾਠਾ ਬਾਦਸ਼ਾਹ ਦੁਆਰਾ ਵਰਤੇ ਗਏ ਮਾਰੂ ਹਥਿਆਰ ਨੂੰ ਲੰਡਨ ਵਿਚ ਦੂਰ ਇਕ ਅਜਾਇਬ ਘਰ ਵਿਚ ਰੱਖਿਆ ਗਿਆ ਸੀ। ਹੁਣ ਮਹਾਰਾਸ਼ਟਰ ਸਰਕਾਰ ਦੁਆਰਾ ਸਾਲਾਂ ਦੀਆਂ ਕੋਸ਼ਿਸ਼ਾਂ ਤੋਂ ਬਾਅਦ ਵਾਘ ਨਖ ਨੂੰ ਆਖਰਕਾਰ ਸਤਾਰਾ ਲਿਆਂਦਾ ਜਾ ਰਿਹਾ ਹੈ।
19 ਜੁਲਾਈ ਨੂੰ ਸਤਾਰਾ ਲਿਆਂਦਾ ਜਾਵੇਗਾ 'ਵਾਘ ਨਖ'
ਸਤਾਰਾ ਦੇ ਸਰਪ੍ਰਸਤ ਮੰਤਰੀ ਸ਼ੰਭੂਰਾਜ ਦੇਸਾਈ ਨੇ ਨਿੱਜੀ ਤੌਰ 'ਤੇ ਛਤਰਪਤੀ ਸ਼ਿਵਾਜੀ ਮਹਾਰਾਜ ਅਜਾਇਬ ਘਰ ਵਿੱਚ ਸੁਰੱਖਿਆ ਪ੍ਰਬੰਧਾਂ ਦੀ ਨਿਗਰਾਨੀ ਕੀਤੀ, ਜਿੱਥੇ ਅਗਲੇ ਸੱਤ ਮਹੀਨਿਆਂ ਲਈ ਵਾਘ ਨਖ ਨੂੰ ਪ੍ਰਦਰਸ਼ਿਤ ਕੀਤਾ ਜਾਵੇਗਾ। ਇਸ ਵਿਸ਼ੇਸ਼ ਹਥਿਆਰ ਨੂੰ ਬੁਲੇਟਪਰੂਫ ਸ਼ੀਸ਼ੇ ਵਿੱਚ ਰੱਖਿਆ ਜਾਣਾ ਹੈ ਅਤੇ ਇਸ ਦੇ ਲਈ ਸੁਰੱਖਿਆ ਪ੍ਰਬੰਧ ਵੀ ਸਖ਼ਤ ਕਰ ਦਿੱਤੇ ਗਏ ਹਨ।
ਛਤਰਪਤੀ ਸ਼ਿਵਾਜੀ ਮਹਾਰਾਜ ਦੁਆਰਾ ਵੱਡੇ ਪੱਧਰ 'ਤੇ ਵਰਤੇ ਗਏ ਹਥਿਆਰ ਨੂੰ 19 ਜੁਲਾਈ ਨੂੰ ਸਤਾਰਾ ਲਿਆਂਦਾ ਜਾਵੇਗਾ। ਫਿਲਹਾਲ ਇਹ ਮੁੰਬਈ ਪਹੁੰਚ ਗਿਆ ਹੈ। ਸਤਾਰਾ ਦੇ ਸਰਪ੍ਰਸਤ ਮੰਤਰੀ ਸ਼ੰਭੂਰਾਜ ਦੇਸਾਈ ਨੇ ਕਿਹਾ, "ਵਾਘ ਨਖ ਦੀ ਵਾਪਸੀ ਮਹਾਰਾਸ਼ਟਰ ਲਈ ਇੱਕ ਮਹਾਨ ਪ੍ਰੇਰਨਾ ਹੈ। ਅਸੀਂ ਸਤਾਰਾ ਵਿਚ ਇਸਦੀ ਵਿਰਾਸਤ ਦੇ ਅਨੁਸਾਰ ਜਸ਼ਨਾਂ ਨਾਲ ਇਸਦਾ ਸਵਾਗਤ ਕਰਾਂਗੇ।"
