ਸਿਰਫਿਰੇ ਆਸ਼ਿਕ ਨੇ ਅਧਿਆਪਕਾ ਨੂੰ ਪੈਟਰੋਲ ਪਾ ਕੇ ਜ਼ਿੰਦਾ ਸਾੜਿਆ, 2 ਮਾਰਚ ਨੂੰ ਹੋਣਾ ਸੀ ਵਿਆਹ

ਪ੍ਰਤਾਪਗੜ੍ਹ- ਇਕ ਨਿੱਜੀ ਸਕੂਲ ਦੀ ਅਧਿਆਪਕਾ ਨੂੰ ਉਸ ਦੇ ਸਿਰਫਿਰੇ ਆਸ਼ਿਕ ਨੇ ਪੈਟਰੋਲ ਪਾ ਕੇ ਜ਼ਿੰਦਾ ਸਾੜ ਦਿੱਤਾ। ਅਧਿਆਪਕਾ ਦੀ ਸੜੀ ਹੋਈ ਲਾਸ਼ ਅਤੇ ਝੁਲਸਿਆ ਹੋਇਆ ਆਸ਼ਿਕ ਥਾਣਾ ਖੇਤਰ ਕੋਹੜੌਰ ਲੌਲੀ ਪੋਖਤਾਖਾਮ ਪਿੰਡ ਦੇ ਇਕ ਖੇਤ ਵਿਚੋਂ ਮਿਲਿਆ। ਮ੍ਰਿਤਕਾ ਦਾ ਵਿਆਹ 2 ਮਾਰਚ ਨੂੰ ਹੋਣ ਵਾਲਾ ਸੀ। ਇਹ ਦਰਦਨਾਕ ਘਟਨਾ ਉੱਤਰ ਪ੍ਰਦੇਸ਼ ਦੇ ਪ੍ਰਤਾਪਗੜ੍ਹ ਜ਼ਿਲ੍ਹੇ ਵਿਚ ਵਾਪਰੀ। 

ਪੁਲਸ ਸੂਤਰਾਂ ਨੇ ਦੱਸਿਆ ਕਿ ਅਧਿਆਪਕਾ ਨੀਤੂ ਯਾਦਵ (22) ਸਕੂਲ ਜਾ ਰਹੀ ਸੀ ਕਿ ਇਸੇ ਥਾਣਾ ਖੇਤਰ ਦੇ ਚੰਦੌਕਾ ਪਿੰਡ ਨਿਵਾਸੀ ਵਿਕਾਸ ਕੁਮਾਰ ਯਾਦਵ (29) ਨੇ ਰਸਤੇ ਵਿਚ ਉਸ ਨੂੰ ਰੋਕ ਕੇ ਉਸ ਦੇ ਉੱਪਰ ਪੈਟਰੋਲ ਪਾ ਕੇ ਜ਼ਿੰਦਾ ਸਾੜ ਦਿੱਤਾ। ਘਟਨਾ ਵਿਚ ਵਿਕਾਸ ਕੁਮਾਰ ਯਾਦਵ ਵੀ ਝੁਲਸ ਗਿਆ, ਜਿਸ ਨੂੰ ਗੰਭੀਰ ਹਾਲਤ ਵਿਚ ਜ਼ਿਲਾ ਹਸਪਤਾਲ ਦਾਖਲ ਕਰਵਾਇਆ ਗਿਆ। ਸਿਟੀ ਏਰੀਆ ਅਫਸਰ ਸ਼ਿਵ ਨਾਰਾਇਣ ਵੈਸ਼ਯ ਨੇ ਦੱਸਿਆ ਕਿ ਜਦੋਂ ਸਵੇਰੇ 9:30 ਵਜੇ ਘਟਨਾ ਦੀ ਜਾਣਕਾਰੀ ਮਿਲੀ ਤਾਂ ਕੋਹੜੌਰ ਥਾਣੇ ਦੀ ਪੁਲਸ ਉਸ ਜਗ੍ਹਾ ਪਹੁੰਚੀ ਜਿੱਥੇ ਨੀਤੂ ਯਾਦਵ ਦੀ ਲਾਸ਼ ਮਿਲੀ। ਘਟਨਾ ਵਾਲੀ ਥਾਂ ਤੋਂ ਪੈਟਰੋਲ ਨਾਲ ਭਰੀ ਇਕ ਬੋਤਲ, ਵਿਕਾਸ ਕੁਮਾਰ ਯਾਦਵ ਦਾ ਮੋਟਰਸਾਈਕਲ ਅਤੇ 2 ਮੋਬਾਈਲ ਫੋਨ ਬਰਾਮਦ ਕੀਤੇ ਗਏ। ਪਹਿਲੀ ਨਜ਼ਰੇ ਇਹ ਮਾਮਲਾ ਪ੍ਰੇਮ ਸਬੰਧਾਂ ਦਾ ਜਾਪਦਾ ਹੈ। ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8