ਅਨੋਖਾ ਮਾਮਲਾ: ਮਰਿਆ ਮੁਰਗਾ ਲੈ ਕੇ ਥਾਣੇ ਪਹੁੰਚ ਗਿਆ ਵਿਅਕਤੀ, ਕਹਿੰਦਾ ਕਰੋ ਮਾਮਲਾ ਦਰਜ

ਨੈਸ਼ਨਲ ਡੈਸਕ - ਉੱਤਰ ਪ੍ਰਦੇਸ਼ ਦੇ ਕੌਸ਼ਾਂਬੀ ਜ਼ਿਲ੍ਹੇ 'ਚ ਇਕ ਨੌਜਵਾਨ ਦੇ ਮੁਰਗੇ ਨਾਲ ਪਿਆਰ ਦੀ ਅਜੀਬ ਕਹਾਣੀ ਸਾਹਮਣੇ ਆਈ ਹੈ। ਨੌਜਵਾਨ ਨੂੰ ਮੁਰਗੇ ਨਾਲ ਇੰਨਾ ਪਿਆਰ ਸੀ ਕਿ ਉਹ ਇਸ ਦੇ ਕਾਤਲ ਨੂੰ ਸਜ਼ਾ ਦਿਵਾਉਣ ਲਈ ਥਾਣੇ ਗਿਆ ਅਤੇ ਸ਼ਿਕਾਇਤ ਦਰਜ ਕਰਵਾਉਣ ਅਤੇ ਕਤਲ ਦਾ ਮਾਮਲਾ ਦਰਜ ਕਰਵਾਉਣ 'ਤੇ ਅੜ ਗਿਆ। ਸ਼ਿਕਾਇਤ ਮਿਲਣ ਤੋਂ ਬਾਅਦ ਪੁਲਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।

ਪਿਪਰੀ ਥਾਣਾ ਖੇਤਰ ਦੇ ਜਵਾਈ ਪਿੰਡ ਵਾਸੀ ਸ਼ਿਵਰਾਮ ਪੁੱਤਰ ਭਈਲਾਲ ਮਜ਼ਦੂਰੀ ਕਰਦਾ ਹੈ। ਦੋਸ਼ ਹੈ ਕਿ ਗੁਆਂਢੀ ਨੇ ਮੁਰਗੇ ਨੂੰ ਇੱਟ ਨਾਲ ਮਾਰ ਦਿੱਤਾ। ਇਸ ਕਾਰਨ ਮੁਰਗੇ ਦੀ ਮੌਤ ਹੋ ਗਈ। ਸੂਚਨਾ ਤੋਂ ਬਾਅਦ ਸ਼ਿਵਰਾਮ ਮੌਕੇ 'ਤੇ ਪਹੁੰਚੇ। ਜਦੋਂ ਉਹ ਇਸ ਦੀ ਸ਼ਿਕਾਇਤ ਕਰਨ ਆਪਣੇ ਗੁਆਂਢੀ ਦੇ ਘਰ ਪਹੁੰਚਿਆ ਤਾਂ ਮੁਲਜ਼ਮਾਂ ਨੇ ਉਸ ਨਾਲ ਦੁਰਵਿਵਹਾਰ ਕੀਤਾ ਅਤੇ ਕੁੱਟਮਾਰ ਕੀਤੀ। ਲੋਕਾਂ ਨੇ ਦਖਲ ਦੇ ਕੇ ਮਾਮਲਾ ਸ਼ਾਂਤ ਕਰਵਾਇਆ। ਨੌਜਵਾਨ ਮੁਲਜ਼ਮਾਂ ਖ਼ਿਲਾਫ਼ ਕਤਲ ਦਾ ਕੇਸ ਦਰਜ ਕਰਨ ਦੀ ਮੰਗ ਕਰ ਰਿਹਾ ਸੀ। 

ਇਹ ਹੈ ਨਿਯਮ
ਜਾਣਕਾਰੀ ਅਨੁਸਾਰ ਧਾਰਾ 429 ਤਹਿਤ 50 ਰੁਪਏ ਤੋਂ ਵੱਧ ਕੀਮਤ ਵਾਲੇ ਪਾਲਤੂ ਜਾਨਵਰ ਨੂੰ ਮਾਰਨਾ ਅਤੇ ਕਿਸੇ ਵੀ ਤਰ੍ਹਾਂ ਨਾਲ ਛੇੜਛਾੜ ਕਰਨਾ ਕਾਨੂੰਨੀ ਜੁਰਮ ਹੈ। ਇਸ ਤਹਿਤ ਦੋਸ਼ੀਆਂ ਲਈ ਪੰਜ ਸਾਲ ਤੱਕ ਦੀ ਸਜ਼ਾ ਦਾ ਪ੍ਰਬੰਧ ਹੈ। ਸ਼ਿਵਰਾਮ ਖੁਦ ਮੁਰਗੇ ਦੀ ਦੇਖਭਾਲ ਕਰਦਾ ਸੀ, ਮੁਰਗੇ ਲਈ ਭੋਜਨ ਤੋਂ ਲੈ ਕੇ ਪਾਣੀ ਤੱਕ ਦਾ ਹਰ ਪ੍ਰਬੰਧ ਕਰਦਾ ਸੀ। ਅਜਿਹੇ 'ਚ ਜਦੋਂ ਗੁਆਂਢੀ ਨੇ ਮੁਰਗੇ ਨੂੰ ਮਾਰਿਆ ਤਾਂ ਸ਼ਿਵਰਾਮ ਹੈਰਾਨ ਰਹਿ ਗਿਆ ਅਤੇ ਮੁਰਗੇ ਨੂੰ ਮਾਰਨ ਵਾਲੇ ਗੁਆਂਢੀ ਨੂੰ ਸਜ਼ਾ ਦੇਣਾ ਚਾਹੁੰਦਾ ਸੀ।

ਪੁਲਸ ਨੂੰ ਸ਼ਿਕਾਇਤ
ਸ਼ਿਵਰਾਮ ਦਾ ਕਹਿਣਾ ਹੈ ਕਿ ਉਹ ਕਈ ਮਹੀਨਿਆਂ ਤੋਂ ਮੁਰਗੇ ਦੀ ਦੇਖਭਾਲ ਕਰ ਰਿਹਾ ਸੀ ਅਤੇ ਇਸ ਨੂੰ ਬਹੁਤ ਪਿਆਰ ਨਾਲ ਪਾਲਦਾ ਸੀ। ਮੁਰਗੇ ਦੀ ਮੌਤ ਤੋਂ ਬਾਅਦ ਸ਼ਿਵਰਾਮ ਕਾਫੀ ਦੁਖੀ ਹੈ, ਜਿਸ ਤੋਂ ਬਾਅਦ ਉਸ ਨੇ ਪੁਲਸ ਕੋਲ ਜਾ ਕੇ ਸ਼ਿਕਾਇਤ ਕੀਤੀ। ਇਸ ਮਾਮਲੇ ਵਿੱਚ ਪਿਪਰੀ ਥਾਣਾ ਇੰਚਾਰਜ ਬਲਰਾਮ ਸਿੰਘ ਨੇ ਦੱਸਿਆ ਕਿ ਮੁਰਗਾ ਮਾਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਇਸ ਮਾਮਲੇ ਦੀ ਸ਼ਿਕਾਇਤ ਮਿਲੀ ਹੈ, ਸ਼ਿਕਾਇਤ ਦੇ ਆਧਾਰ 'ਤੇ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਇਸ ਮਾਮਲੇ 'ਚ ਕਾਰਵਾਈ ਕੀਤੀ ਜਾਵੇਗੀ।