ਬੇਕਾਬੂ ਕਾਰ ਨੇ ਮਚਾਇਆ ਕਹਿਰ, ਠੇਕੇਦਾਰ ਸਮੇਤ 3 ਦੀ ਮੌਤ

ਗੁਰੂਗ੍ਰਾਮ - ਗੁਰੂਗ੍ਰਾਮ ਵਿੱਚ ਦੁਆਰਕਾ ਐਕਸਪ੍ਰੈਸਵੇਅ ਦੀ ਸਰਵਿਸ ਲੇਨ 'ਤੇ ਸ਼੍ਰੀਰਾਮ ਚੌਕ ਨੇੜੇ ਇੱਕ ਦਰਦਨਾਕ ਸੜਕ ਹਾਦਸਾ ਵਾਪਰਿਆ ਹੈ। ਇੱਥੇ ਡਿਵਾਈਡਰ ਨੂੰ ਸੁਰੱਖਿਅਤ ਕਰਨ ਲਈ ਲੋਹੇ ਦੀ ਗ੍ਰਿਲ ਲਗਾ ਰਹੇ ਮਜ਼ਦੂਰਾਂ 'ਤੇ ਦਿੱਲੀ ਤੋਂ ਆ ਰਹੀ ਇੱਕ ਬੇਕਾਬੂ ਸਫੇਦ ਸ਼ੈਵਰਲੇ ਬੀਟ ਕਾਰ ਚੜ੍ਹ ਗਈ। ਇਸ ਹਾਦਸੇ ਵਿੱਚ ਠੇਕੇਦਾਰ ਸਮੇਤ ਕੁੱਲ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਹੈ।

ਹਾਦਸੇ ਦੇ ਸਮੇਂ ਚਾਰ ਲੋਕ ਗ੍ਰਿਲ ਦੇ ਪੈਂਚ ਕਸਣ ਅਤੇ ਉਸ ਨੂੰ ਫੜਨ ਦਾ ਕੰਮ ਕਰ ਰਹੇ ਸਨ। ਤੇਜ਼ ਰਫ਼ਤਾਰ ਕਾਰ ਨੂੰ ਬੇਕਾਬੂ ਹੁੰਦਿਆਂ ਦੇਖ ਕੇ ਉੱਥੇ ਹਫੜਾ-ਦਫੜੀ ਮਚ ਗਈ। ਕਾਰ ਨੇ ਕ੍ਰੈਸ਼ ਬੈਰੀਅਰ ਕੋਲ ਖੜ੍ਹੇ ਦੋ ਮਜ਼ਦੂਰਾਂ ਨੂੰ ਸਿੱਧੀ ਟੱਕਰ ਮਾਰ ਦਿੱਤੀ, ਜਿਸ ਨਾਲ ਉਨ੍ਹਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। 

ਬਾਕੀ ਦੋ ਲੋਕਾਂ, ਜਿਨ੍ਹਾਂ ਵਿੱਚ ਠੇਕੇਦਾਰ ਸੁਨੀਲ ਚੰਦ ਵੀ ਸ਼ਾਮਲ ਸਨ, ਨੇ ਆਪਣੀ ਜਾਨ ਬਚਾਉਣ ਲਈ ਐਕਸਪ੍ਰੈਸਵੇਅ ਦੇ ਵਿਚਕਾਰ ਬਣੀ ਹਰੀ ਪੱਟੀ (ਗ੍ਰੀਨ ਬੈਲਟ) ਉੱਪਰੋਂ ਛਲਾਂਗ ਲਗਾ ਦਿੱਤੀ। ਪਰ ਬੇਕਾਬੂ ਕਾਰ ਨੇ ਦਿਸ਼ਾ ਬਦਲ ਕੇ ਉਨ੍ਹਾਂ ਨੂੰ ਵੀ ਆਪਣੀ ਲਪੇਟ ਵਿੱਚ ਲੈ ਲਿਆ। ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਸੁਨੀਲ ਚੰਦ ਨੂੰ ਇਲਾਜ ਲਈ ਹਸਪਤਾਲ ਦਾਖਲ ਕਰਵਾਇਆ ਗਿਆ ਸੀ, ਜਿੱਥੇ ਸ਼ੁੱਕਰਵਾਰ ਨੂੰ ਇਲਾਜ ਦੌਰਾਨ ਉਨ੍ਹਾਂ ਦੀ ਵੀ ਮੌਤ ਹੋ ਗਈ।

ਪੁਲਸ ਅਨੁਸਾਰ ਕਾਰ ਚਲਾ ਰਿਹਾ ਨੌਜਵਾਨ 20 ਸਾਲਾ ਵੇਦਨ ਖੰਨਾ ਹੈ, ਜੋ ਦਿੱਲੀ ਯੂਨੀਵਰਸਿਟੀ ਦਾ ਵਿਦਿਆਰਥੀ ਹੈ। ਹਾਦਸੇ ਵਿੱਚ ਉਸ ਨੂੰ ਵੀ ਸੱਟਾਂ ਲੱਗੀਆਂ ਹਨ ਅਤੇ ਉਸ ਨੂੰ ਇਲਾਜ ਲਈ ਫੋਰਟਿਸ ਹਸਪਤਾਲ ਰੈਫਰ ਕੀਤਾ ਗਿਆ ਹੈ। ਪੁਲਸ ਵੱਲੋਂ ਪੂਰੇ ਘਟਨਾਕ੍ਰਮ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਹਾਦਸੇ ਨਾਲ ਜੁੜੇ ਤੱਥ ਇਕੱਠੇ ਕੀਤੇ ਜਾ ਰਹੇ ਹਨ।