Reel ਦੇਖ ਕੇ ਆਰਡਰ ਕਰ ''ਤਾ ਸੋਲਰ ਪੈਨਲ, ਫਿਰ ਵਪਾਰੀ ਨਾਲ ਹੋ ਗਈ 19.35 ਲੱਖ ਰੁਪਏ ਦੀ ਠੱਗੀ

ਭਾਵਨਗਰ : ਗੁਜਰਾਤ ਦੇ ਭਾਵਨਗਰ ਵਿੱਚ ਸੋਸ਼ਲ ਮੀਡੀਆ 'ਤੇ ਸਸਤੇ ਸੋਲਰ ਪੈਨਲਾਂ ਦਾ ਇਸ਼ਤਿਹਾਰ ਦੇਖ ਕੇ ਖਰੀਦਦਾਰੀ ਕਰਨ ਦੀ ਕੋਸ਼ਿਸ਼ ਇੱਕ ਵਪਾਰੀ ਨੂੰ ਭਾਰੀ ਪੈ ਗਈ। ਸੋਲਰ ਰੂਫ਼ਟਾਪ ਦਾ ਕਾਰੋਬਾਰ ਕਰਨ ਵਾਲੇ ਭਗੀਰਥਭਾਈ ਸਾਈਬਰ ਠੱਗੀ ਦਾ ਸ਼ਿਕਾਰ ਹੋ ਗਏ ਹਨ। ਮੁੰਬਈ ਦੀ ਇੱਕ ਕਥਿਤ ਕੰਪਨੀ ਦੇ ਨੁਮਾਇੰਦੇ ਨੇ ਸਸਤੇ ਭਾਅ 'ਤੇ ਅਡਾਨੀ ਸੋਲਰ ਪੈਨਲ ਦੇਣ ਦਾ ਭਰੋਸਾ ਦੇ ਕੇ ਵਪਾਰੀ ਤੋਂ 19.35 ਲੱਖ ਰੁਪਏ ਲੈ ਲਏ, ਪਰ ਪੈਸੇ ਮਿਲਣ ਤੋਂ ਬਾਅਦ ਸਾਮਾਨ ਦੀ ਡਿਲੀਵਰੀ ਨਹੀਂ ਕੀਤੀ।

ਇਹ ਮਾਮਲਾ 1 ਸਤੰਬਰ ਤੋਂ ਸ਼ੁਰੂ ਹੋਇਆ, ਜਦੋਂ ਭਗੀਰਥਭਾਈ ਨੇ ਇੰਸਟਾਗ੍ਰਾਮ 'ਤੇ 'ਅਡਾਨੀ ਟੌਪ-ਕੌਨ ਸੋਲਰ ਪੀਵੀ ਮੋਡਿਊਲ' ਵੇਚਣ ਨਾਲ ਜੁੜੀ ਇੱਕ ਰੀਲ ਦੇਖੀ। ਗੁਜਰਾਤ ਵਿੱਚ ਇਹਨਾਂ ਸੋਲਰ ਪੈਨਲਾਂ ਦੀ ਕਮੀ ਹੋਣ ਕਾਰਨ ਉਨ੍ਹਾਂ ਨੇ ਇਸ ਇਸ਼ਤਿਹਾਰ ਵਿੱਚ ਦਿਲਚਸਪੀ ਦਿਖਾਈ। ਇਸ ਤੋਂ ਬਾਅਦ 4 ਸਤੰਬਰ ਨੂੰ ਉਨ੍ਹਾਂ ਨੇ ਰੀਲ ਵਿੱਚ ਦਿੱਤੇ ਮੋਬਾਈਲ ਨੰਬਰ 'ਤੇ ਸੰਪਰਕ ਕੀਤਾ।

ਸੰਪਰਕ ਕਰਨ 'ਤੇ ਅਮਨ ਸਿੰਘ ਨਾਂ ਦੇ ਵਿਅਕਤੀ ਨੇ 'ਸਨਰੂਫ਼ ਐਨਰਜੀ ਸੋਲਿਊਸ਼ਨ ਪ੍ਰਾਈਵੇਟ ਲਿਮਟਿਡ' ਦੇ ਨਾਂ 'ਤੇ 49.60 ਲੱਖ ਰੁਪਏ ਦਾ ਰੇਟ ਪ੍ਰਸਤਾਵ ਭੇਜਿਆ। ਉਸ ਨੇ ਦੱਸਿਆ ਕਿ 40 ਫੀਸਦੀ ਐਡਵਾਂਸ ਰਕਮ ਦੇਣ 'ਤੇ 15 ਦਿਨਾਂ ਦੇ ਅੰਦਰ ਸੋਲਰ ਪੈਨਲ ਪਹੁੰਚਾ ਦਿੱਤੇ ਜਾਣਗੇ। ਭਰੋਸਾ ਕਰਕੇ ਵਪਾਰੀ ਨੇ 7 ਸਤੰਬਰ ਨੂੰ 19.35 ਲੱਖ ਰੁਪਏ ਆਨਲਾਈਨ ਟ੍ਰਾਂਸਫਰ ਕਰ ਦਿੱਤੇ।

ਤੈਅ ਸਮਾਂ ਬੀਤਣ ਤੋਂ ਬਾਅਦ ਵੀ ਜਦੋਂ ਸਾਮਾਨ ਨਹੀਂ ਪਹੁੰਚਿਆ, ਤਾਂ ਵਪਾਰੀ ਡਿਲੀਵਰੀ ਦਾ ਇੰਤਜ਼ਾਰ ਕਰਦੇ ਰਹੇ। 14 ਸਤੰਬਰ ਨੂੰ ਵਪਾਰੀਆਂ ਦੇ ਇੱਕ ਗਰੁੱਪ ਵਿੱਚ ਆਏ ਮੈਸੇਜਾਂ ਅਤੇ ਅਖਬਾਰ ਦੀਆਂ ਕਤਰਨਾਂ ਤੋਂ ਪਤਾ ਲੱਗਾ ਕਿ ਰਾਜਕੋਟ ਦੇ ਭਾਵੇਸ਼ਭਾਈ, ਡੀਸਾ ਦੇ ਰੋਹਿਤਕੁਮਾਰ ਅਤੇ ਧਾਰਮਿਕਭਾਈ ਸਮੇਤ ਹੋਰ ਵੀ ਕਈ ਵਿਕਰੇਤਾਵਾਂ ਤੋਂ ਇਸੇ ਤਰ੍ਹਾਂ ਐਡਵਾਂਸ ਰਕਮ ਲਈ ਗਈ ਸੀ ਪਰ ਸੋਲਰ ਪੈਨਲ ਨਹੀਂ ਭੇਜੇ ਗਏ। ਜਦੋਂ ਭਗੀਰਥਭਾਈ ਨੇ ਅਮਨ ਸਿੰਘ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ, ਤਾਂ ਉਸ ਨੇ ਫੋਨ ਚੁੱਕਣਾ ਬੰਦ ਕਰ ਦਿੱਤਾ।

ਠੱਗੀ ਦਾ ਅਹਿਸਾਸ ਹੋਣ 'ਤੇ ਵਪਾਰੀ ਨੇ ਭਾਵਨਗਰ ਸਾਈਬਰ ਕ੍ਰਾਈਮ ਥਾਣੇ ਵਿੱਚ ਸ਼ਿਕਾਇਤ ਦਰਜ ਕਰਵਾਈ। ਪੁਲਸ ਨੇ ਅਮਨ ਸਿੰਘ ਦੇ ਖਿਲਾਫ਼ ਭਾਰਤੀ ਨਿਆਂ ਸੰਹਿਤਾ ਦੀਆਂ ਧਾਰਾਵਾਂ 318(2), 318(4), 319(2) ਅਤੇ ਆਈ.ਟੀ. ਐਕਟ ਦੀ ਧਾਰਾ 66(ਡੀ) ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਸ ਹੁਣ ਪੈਸਿਆਂ ਦੇ ਲੈਣ-ਦੇਣ, ਸੋਸ਼ਲ ਮੀਡੀਆ ਇਸ਼ਤਿਹਾਰ ਅਤੇ ਦੋਸ਼ੀ ਨਾਲ ਜੁੜੇ ਹੋਰ ਪਹਿਲੂਆਂ ਦੀ ਬਾਰੀਕੀ ਨਾਲ ਜਾਂਚ ਕਰ ਰਹੀ ਹੈ।