ਹੌਸਲੇ ਨੂੰ ਸਲਾਮ; 26 ਸਾਲਾ ਮਾਂ 4 ਦਿਨ ਦੇ ਬੱਚੇ ਨੂੰ ਲੈ ਕੇ ਇਮਤਿਹਾਨ ਦੇਣ ਪੁੱਜੀ

ਅਗਰਤਲਾ- ਤ੍ਰਿਪੁਰਾ ਦੇ ਧਲਾਈ ਜ਼ਿਲ੍ਹੇ ਦੀ 26 ਸਾਲਾ ਫਰਜ਼ਾਨਾ ਬੇਗਮ ਆਪਣੀ ਗੋਦ ਵਿਚ ਚਾਰ ਦਿਨ ਦੇ ਬੱਚੇ ਨੂੰ ਲੈ ਕੇ 12ਵੀਂ ਦੀ ਪ੍ਰੀਖਿਆ ਦੇ ਰਹੀ ਹੈ। ਇਮਤਿਹਾਨ ਹਾਲ ’ਚ ਫਰਜ਼ਾਨਾ ਆਪਣੇ ਸਬਰ ਅਤੇ ਹਿੰਮਤ ਦੇ ਬਲ 'ਤੇ ‘ਮੰਜ਼ਿਲ ਉਨ੍ਹਾਂ ਨੂੰ ਮਿਲਦੀ ਹੈ, ਜਿਨ੍ਹਾਂ ਦੇ ਸੁਫ਼ਨਿਆਂ ’ਚ ਜਾਨ ਹੁੰਦੀ ਹੈ, ਖੰਭਾਂ ਨਾਲ ਕੁਝ ਨਹੀਂ ਹੁੰਦਾ, ਹੌਸਲਿਆਂ ਨਾਲ ਉਡਾਣ ਹੁੰਦੀ ਹੈ’’ ਦੀਆਂ ਲਾਈਨਾਂ ਨੂੰ ਮੂਰਤੀਮਾਨ ਕਰਦੀ ਨਜ਼ਰ ਆਈ। ਫਰਜ਼ਾਨਾ ਨੇ ਮੰਗਲਵਾਰ ਨੂੰ ਕਮਾਲਪੁਰ ਸ਼ਹਿਰ ’ਚ ਰਾਜਨੀਤੀ ਸ਼ਾਸਤਰ ਦਾ ਦੂਜਾ ਪੇਪਰ ਹੱਲ ਕੀਤਾ। ਫਰਜ਼ਾਨਾ ਦੇ ਜਜ਼ਬੇ ਨੂੰ ਦੇਖਦਿਆਂ ਸਕੂਲ ਪ੍ਰਸ਼ਾਸਨ ਨੇ ਵੀ ਉਸ ਵੱਲ ਮਦਦ ਦਾ ਹੱਥ ਵਧਾਇਆ ਅਤੇ ਫਰਜ਼ਾਨਾ ਦੀ ਮਾਂ ਨੂੰ ਉਸ ਦੇ ਨਾਲ ਇਮਤਿਹਾਨ ਹਾਲ ਤੱਕ ਜਾਣ ਦਿੱਤਾ।

ਤ੍ਰਿਪੁਰਾ ਬੋਰਡ ਆਫ਼ ਸੈਕੰਡਰੀ ਐਜੂਕੇਸ਼ਨ (ਟੀ.ਬੀ.ਐਸ.ਈ.) ਵੱਲੋਂ ਜਾਰੀ ਬਿਆਨ ਵਿਚ ਕਿਹਾ ਗਿਆ ਹੈ ਕਿ ਫਰਜ਼ਾਨਾ ਨੇ 6 ਮਈ ਨੂੰ ਇਕ ਬੱਚੇ ਨੂੰ ਜਨਮ ਦਿੱਤਾ ਸੀ ਅਤੇ ਇਸ ਕਾਰਨ ਉਹ ਪ੍ਰੀਖਿਆਵਾਂ ਦੀ ਸ਼ੁਰੂਆਤ ਵਿਚ ਟਰਮ-2 ਦੇ ਕੁਝ ਪੇਪਰਾਂ ਤੋਂ ਖੁੰਝ ਗਈ ਸੀ। ਫਰਜ਼ਾਨਾ ਇਸ ਗੱਲ ਨੂੰ ਲੈ ਕੇ ਕਾਫੀ ਤਣਾਅ ਵਿਚ ਸੀ ਕਿ ਉਸ ਦੇ ਬੱਚੇ ਨੂੰ ਜਨਮ ਦੇਣ ਦੀ ਤਾਰੀਖ ਬੋਰਡ ਪ੍ਰੀਖਿਆਵਾਂ ਦੇ ਵਿਚਕਾਰ ਹੈ। ਫਰਜ਼ਾਨਾ ਕਮਾਲਪੁਰ ਦੇ ਕ੍ਰਿਸ਼ਨਚੰਦਰ ਸਕੂਲ ਦੀ ਵਿਦਿਆਰਥਣ ਹੈ। ਮੰਗਲਵਾਰ ਨੂੰ ਰਾਜਨੀਤੀ ਸ਼ਾਸਤਰ ਦੇ ਦੂਜੇ ਪੇਪਰ ਦੌਰਾਨ ਕਮਰਾ ਪ੍ਰੀਖਿਆਰਥੀ ਸਵਰਪਾ ਚੌਧਰੀ ਨੇ ਕਿਹਾ, "ਫਰਜ਼ਾਨਾ ਦੀਆਂ ਅਣਥੱਕ ਕੋਸ਼ਿਸ਼ਾਂ ਤੋਂ ਬਾਅਦ ਵੀ ਉਹ ਪਿਛਲੀਆਂ ਦੋ ਤਾਰੀਖਾਂ ਨੂੰ ਹੋਈਆਂ ਪ੍ਰੀਖਿਆਵਾਂ ਨਹੀਂ ਦੇ ਸਕੀ ਪਰ 9 ਮਈ ਨੂੰ ਵਾਪਸ ਆਉਣ ਤੋਂ ਬਾਅਦ ਉਹ ਬਿਹਤਰ ਸਥਿਤੀ ਵਿਚ ਸੀ। ਹਰ ਸਮਾਜਿਕ ਬੰਦਿਸ਼, ਰੀਤੀ ਰਿਵਾਜ ਨੂੰ ਠੁਕਰਾਉਂਦੇ ਹੋਏ ਮੰਗਲਵਾਰ ਨੂੰ ਇਮਤਿਹਾਨ ਹਾਲ ਵਿਚ ਬੈਠ ਕੇ ਰਾਜਨੀਤੀ ਸ਼ਾਸਤਰ ਦੀ ਪ੍ਰੀਖਿਆ ਦਿੱਤੀ।

ਜਦੋਂ ਫਰਜ਼ਾਨਾ ਆਪਣੇ ਚਾਰ ਦਿਨਾਂ ਦੇ ਬੱਚੇ ਨੂੰ ਗੋਦ ਵਿਚ ਲੈ ਕੇ ਇਮਤਿਹਾਨ ਦੇਣ ਆਈ ਤਾਂ ਸਾਰੇ ਅਧਿਆਪਕਾਂ ਖਾਸ ਕਰ ਕੇ ਸੈਂਟਰ ਨਿਰੀਖਕ ਲਈ ਇਹ ਸਭ ਹੈਰਾਨੀ ਭਰਿਆ ਸੀ। ਫਰਜ਼ਾਨਾ ਦੇ ਜਜ਼ਬੇ ਨੂੰ ਦੇਖਦਿਆਂ ਸਕੂਲ ਪ੍ਰਸ਼ਾਸਨ ਨੇ ਤੁਰੰਤ ਟੀ. ਬੀ. ਐਸ. ਈ ਅਧਿਕਾਰੀਆਂ ਤੋਂ ਇਜਾਜ਼ਤ ਲੈ ਕੇ ਉਸ ਲਈ ਸਾਰੇ ਲੋੜੀਂਦੇ ਪ੍ਰਬੰਧ ਕੀਤੇ। ਉਸ ਲਈ ਵੱਖਰੇ ਪ੍ਰੀਖਿਆ ਹਾਲ ਵਿਚ ਪ੍ਰੀਖਿਆ ਦੇਣ ਲਈ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਸਨ। ਅਧਿਕਾਰੀਆਂ ਨੇ ਫਰਜ਼ਾਨਾ ਦੀ ਮਾਂ ਨੂੰ ਉਸ ਦੇ ਬੱਚੇ ਅਤੇ ਫਰਜ਼ਾਨਾ ਦੀ ਦੇਖਭਾਲ ਲਈ ਪ੍ਰੀਖਿਆ ਹਾਲ ਵਿਚ ਬੈਠਣ ਦੀ ਇਜਾਜ਼ਤ ਵੀ ਦਿੱਤੀ।

ਇਮਤਿਹਾਨ ਦੇਣ ਤੋਂ ਬਾਅਦ ਫਰਜ਼ਾਨਾ ਨੇ ਪੱਤਰਕਾਰਾਂ ਨੂੰ ਕਿਹਾ, “ਮੈਂ ਖੁਸ਼ ਹਾਂ ਕਿ ਹੁਣ ਮੈਂ ਆਪਣੇ ਸਾਰੇ ਵਿਕਲਪਿਕ ਪੇਪਰਾਂ ਲਈ ਬੈਠ ਸਕਾਂਗੀ। ਹਾਲਾਂਕਿ ਮੈਂ ਬੰਗਾਲੀ ਅਤੇ ਅੰਗਰੇਜ਼ੀ ਦੇ ਪੇਪਰ ਨਹੀਂ ਦੇ ਸਕੀ। ਪਿਛਲੇ ਕੁਝ ਮਹੀਨਿਆਂ ’ਚ ਮੈਂ ਗਰਭਅਵਸਥਾ ਕਾਰਨ ਬਹੁਤ ਦੁੱਖ ਝੱਲਿਆ ਹੈ ਅਤੇ ਇਸ 'ਤੇ ਪ੍ਰੀਖਿਆ ਦਾ ਸਮਾਂ ਦੇਖ ਕੇ ਮੈਂ ਬਹੁਤ ਨਿਰਾਸ਼ ਸੀ ਪਰ ਹੁਣ ਮੈਂ ਬੋਰਡ ਦੀ ਪ੍ਰੀਖਿਆ ਦੇਣ ਦੇ ਨਾਲ-ਨਾਲ ਮਾਂ ਬਣਨ ਦੇ ਅਹਿਸਾਸ ਦਾ ਆਨੰਦ ਮਾਣ ਰਹੀ ਹਾਂ। ਜਦੋਂ ਮੈਂ ਆਪਣੇ ਪਰਿਵਾਰ ਅਤੇ ਬੱਚੇ ਦੀ ਦੇਖ-ਭਾਲ ਕਰ ਰਹੀ ਸੀ ਤਾਂ ਮੇਰੇ ’ਚ ਇਹ ਵਿਸ਼ਵਾਸ ਜਾਗਿਆ ਕਿ ਮੈਂ ਅੱਗੇ ਦੀ ਪੜ੍ਹਾਈ ਕਰ ਸਕਦਾ ਹਾਂ।