ਦੇਸ਼ ਭਗਤੀ ਦੀ ਮਿਸਾਲ! ਪੰਜਵੀਂ ਪੀੜ੍ਹੀ ਦੇ ਲੈ. ਸਰਤਾਜ ਸਿੰਘ ਨੇ ਸੰਭਾਲੀ 128 ਸਾਲਾਂ ਦੀ ਵਿਰਾਸਤ

ਦੇਹਰਾਦੂਨ : ਭਾਰਤੀ ਫੌਜ 'ਚ ਸੇਵਾ ਨਿਭਾਉਣਾ ਮਾਣ ਵਾਲੀ ਗੱਲ ਹੈ, ਪਰ ਕੁਝ ਪਰਿਵਾਰ ਅਜਿਹੇ ਹਨ ਜਿਨ੍ਹਾਂ ਦੇ ਖੂਨ 'ਚ ਹੀ ਦੇਸ਼ ਭਗਤੀ ਦੌੜਦੀ ਹੈ। ਅਜਿਹੀ ਹੀ ਇੱਕ ਮਿਸਾਲ ਲੈਫਟੀਨੈਂਟ ਸਰਤਾਜ ਸਿੰਘ ਨੇ ਪੇਸ਼ ਕੀਤੀ ਹੈ, ਜੋ ਭਾਰਤੀ ਮਿਲਟਰੀ ਅਕੈਡਮੀ (IMA) ਤੋਂ ਪਾਸ ਆਊਟ ਹੋ ਕੇ ਆਪਣੇ ਪਰਿਵਾਰ ਦੀ ਪੰਜਵੀਂ ਪੀੜ੍ਹੀ ਵਜੋਂ ਫੌਜ ਵਿੱਚ ਸ਼ਾਮਲ ਹੋਏ ਹਨ। ਸਰਤਾਜ ਸਿੰਘ ਹੁਣ 20 ਜੇ.ਏ.ਟੀ. (JAT) ਰੈਜੀਮੈਂਟ 'ਚ ਸੇਵਾ ਨਿਭਾਉਣਗੇ।

1897 ਤੋਂ ਸ਼ੁਰੂ ਹੋਇਆ ਸੀ ਸਫ਼ਰ
ਇਸ ਪਰਿਵਾਰ ਦਾ ਫੌਜੀ ਇਤਿਹਾਸ 19ਵੀਂ ਸਦੀ ਦੇ ਅਖੀਰ 'ਚ ਸ਼ੁਰੂ ਹੋਇਆ ਸੀ।
• ਪਹਿਲੀ ਪੀੜ੍ਹੀ: ਸਰਤਾਜ ਦੇ ਪੜਦਾਦਾ ਦੇ ਪਿਤਾ, ਸਿਪਾਹੀ ਕਿਰਪਾਲ ਸਿੰਘ ਨੇ 1897 ਵਿੱਚ 36 ਸਿੱਖ ਰੈਜੀਮੈਂਟ ਵਿੱਚ ਅਫਗਾਨ ਮੁਹਿੰਮ ਦੌਰਾਨ ਸੇਵਾ ਨਿਭਾਈ ਸੀ।
• ਦੂਜੀ ਪੀੜ੍ਹੀ: ਪੜਦਾਦਾ ਸੂਬੇਦਾਰ ਅਜਮੇਰ ਸਿੰਘ ਨੇ ਦੂਜੀ ਵਿਸ਼ਵ ਜੰਗ ਵਿੱਚ ਹਿੱਸਾ ਲਿਆ ਅਤੇ ਉਨ੍ਹਾਂ ਨੂੰ ਬ੍ਰਿਟਿਸ਼ ਰਾਜ ਦੌਰਾਨ 'ਆਰਡਰ ਆਫ ਬ੍ਰਿਟਿਸ਼ ਇੰਡੀਆ' ਦੇ ਦੁਰਲੱਭ ਸਨਮਾਨ ਨਾਲ ਨਿਵਾਜਿਆ ਗਿਆ ਸੀ।
• ਤੀਜੀ ਪੀੜ੍ਹੀ: ਦਾਦਾ ਬ੍ਰਿਗੇਡੀਅਰ ਹਰਵੰਤ ਸਿੰਘ ਨੇ 1965 ਅਤੇ 1971 ਦੀਆਂ ਭਾਰਤ-ਪਾਕਿਸਤਾਨ ਜੰਗਾਂ ਵਿੱਚ ਅਹਿਮ ਭੂਮਿਕਾ ਨਿਭਾਈ।
• ਚੌਥੀ ਪੀੜ੍ਹੀ: ਸਰਤਾਜ ਦੇ ਪਿਤਾ ਬ੍ਰਿਗੇਡੀਅਰ ਉਪਿੰਦਰ ਪਾਲ ਸਿੰਘ ਅਤੇ ਚਾਚਾ ਕਰਨਲ ਹਰਵਿੰਦਰ ਪਾਲ ਸਿੰਘ (ਜਿਨ੍ਹਾਂ ਨੇ ਕਾਰਗਿਲ ਜੰਗ ਦੌਰਾਨ ਸਿਆਚਿਨ 'ਚ ਸੇਵਾ ਨਿਭਾਈ) ਨੇ ਇਸ ਪਰੰਪਰਾ ਨੂੰ ਅੱਗੇ ਵਧਾਇਆ।

ਪਿਤਾ ਦੀ ਰੈਜੀਮੈਂਟ 'ਚ ਹੀ ਹੋਈ ਨਿਯੁਕਤੀ
ਲੈਫਟੀਨੈਂਟ ਸਰਤਾਜ ਸਿੰਘ ਲਈ ਇਹ ਮਾਣ ਵਾਲੀ ਗੱਲ ਹੈ ਕਿ ਉਹ ਉਸੇ 20 ਜੇ.ਏ.ਟੀ. ਬਟਾਲੀਅਨ 'ਚ ਕਮਿਸ਼ਨ ਹੋਏ ਹਨ, ਜਿਸ ਵਿੱਚ ਉਨ੍ਹਾਂ ਦੇ ਪਿਤਾ ਬ੍ਰਿਗੇਡੀਅਰ ਉਪਿੰਦਰ ਪਾਲ ਸਿੰਘ ਨੇ ਸੇਵਾ ਨਿਭਾਈ ਸੀ। ਭਾਰਤੀ ਮਿਲਟਰੀ ਅਕੈਡਮੀ ਨੇ ਵੀ ਇਸ ਨੂੰ ਇੱਕ ਅਨੋਖਾ ਮਾਮਲਾ ਦੱਸਿਆ ਹੈ, ਜੋ ਫੌਜ ਦੀ ਰੈਜੀਮੈਂਟਲ ਪ੍ਰਣਾਲੀ ਅਤੇ ਪਰਿਵਾਰਾਂ ਦੇ ਗੂੜ੍ਹੇ ਸਬੰਧਾਂ ਨੂੰ ਦਰਸਾਉਂਦਾ ਹੈ।

ਨਾਨਕੇ ਪਰਿਵਾਰ ਦਾ ਵੀ ਵੱਡਾ ਯੋਗਦਾਨ
ਸਰਤਾਜ ਦਾ ਸਿਰਫ਼ ਦਾਦਕਾ ਹੀ ਨਹੀਂ, ਸਗੋਂ ਨਾਨਕਾ ਪਰਿਵਾਰ ਵੀ ਫੌਜੀ ਪਿਛੋਕੜ ਵਾਲਾ ਹੈ। ਉਨ੍ਹਾਂ ਦੇ ਨਾਨਕੇ ਪਰਿਵਾਰ ਵਿੱਚੋਂ ਕੈਪਟਨ ਹਰਭਗਤ ਸਿੰਘ, ਕੈਪਟਨ ਗੁਰਮੇਲ ਸਿੰਘ, ਕਰਨਲ ਗੁਰਸੇਵਕ ਸਿੰਘ ਅਤੇ ਕਰਨਲ ਇੰਦਰਜੀਤ ਸਿੰਘ ਵਰਗੇ ਅਧਿਕਾਰੀਆਂ ਨੇ ਪਹਿਲੀ ਅਤੇ ਦੂਜੀ ਵਿਸ਼ਵ ਜੰਗ ਸਮੇਤ 1971 ਦੀ ਜੰਗ ਵਿੱਚ ਦੇਸ਼ ਦੀ ਸੇਵਾ ਕੀਤੀ ਹੈ।

ਸਰਤਾਜ ਸਿੰਘ ਨੇ ਬਚਪਨ ਤੋਂ ਹੀ ਘਰ 'ਚ ਵਰਦੀ ਅਤੇ ਅਨੁਸ਼ਾਸਨ ਦੇਖਿਆ ਸੀ, ਜਿਸ ਕਾਰਨ ਦੇਸ਼ ਭਗਤੀ ਉਨ੍ਹਾਂ ਦੇ ਸੰਸਕਾਰਾਂ 'ਚ ਰਚੀ ਹੋਈ ਹੈ। ਹੁਣ ਉਹ ਇੱਕ ਅਧਿਕਾਰੀ ਵਜੋਂ ਆਪਣੇ ਪਰਿਵਾਰ ਦੀ ਸ਼ਾਨਦਾਰ ਵਿਰਾਸਤ ਨੂੰ ਨਵੀਆਂ ਉਚਾਈਆਂ 'ਤੇ ਲੈ ਕੇ ਜਾਣਗੇ।

ਮੁਲਾਜ਼ਮਾਂ ਦੀਆਂ ਵਧੀਆਂ ਤਨਖ਼ਾਹਾਂ! ਪੰਜਾਬ ਸਰਕਾਰ ਨੇ ਨਵੇਂ ਸਾਲ ਤੋਂ ਪਹਿਲਾਂ ਦਿੱਤਾ ਤੋਹਫ਼ਾ

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e