ਕੇਦਾਰਨਾਥ ਧਾਮ ਦੇ ਕਿਵਾੜ ਸਰਦ ਰੁੱਤ ਲਈ ਹੋਏ ਬੰਦ

ਦੇਹਰਾਦੂਨ (ਭਾਸ਼ਾ)- ਉੱਤਰਾਖੰਡ ਦੇ ਉੱਚ ਗੜ੍ਹਵਾਲ ਹਿਮਾਲਿਆ ਖੇਤਰ 'ਚ ਸਥਿਤ ਵਿਸ਼ਵ ਪ੍ਰਸਿੱਧ ਕੇਦਾਰਨਾਥ ਧਾਮ ਦੇ ਕਿਵਾੜ ਵੀਰਵਾਰ ਨੂੰ ਭਾਈ ਦੂਜ ਮੌਕੇ ਸ਼ਰਧਾਲੂਆਂ ਲਈ ਬੰਦ ਕਰ ਦਿੱਤੇ ਗਏ। ਬਦਰੀਨਾਥ ਕੇਦਾਰਨਾਥ ਮੰਦਿਰ ਕਮੇਟੀ ਦੇ ਸੂਤਰਾਂ ਨੇ ਦੱਸਿਆ ਕਿ ਗਿਆਰ੍ਹਵੇਂ ਜਯੋਤਿਰਲਿੰਗ ਭਗਵਾਨ ਕੇਦਾਰਨਾਥ ਦੇ ਕਿਵਾੜ ਸਰਦ ਰੁੱਤ ਲਈ ਸਵੇਰੇ 8.30 ਵਜੇ ਵੈਦਿਕ ਜਾਪਾਂ ਦੇ ਵਿਚਕਾਰ ਵਿਧੀਵਤ ਪ੍ਰਾਰਥਨਾ ਕਰਨ ਤੋਂ ਬਾਅਦ ਬੰਦ ਕਰ ਦਿੱਤੇ ਗਏ ਸਨ। ਸੈਨਾ ਦੀ 11 ਮਰਾਠਾ ਰੈਜੀਮੈਂਟ ਦੇ ਬੈਂਡ ਦੀਆਂ ਗੂੰਜਦੀਆਂ ਆਵਾਜ਼ਾਂ ਵਿਚਕਾਰ ਕਿਵਾੜ ਬੰਦ ਕਰਨ ਮੌਕੇ ਮੰਦਰ ਕਮੇਟੀ ਦੇ ਪ੍ਰਧਾਨ ਅਜੇਂਦਰ ਅਜੈ, ਤੀਰਥ ਪੁਰੋਹਿਤ ਅਤੇ ਰੁਦਰਪ੍ਰਯਾਗ ਜ਼ਿਲ੍ਹਾ ਪ੍ਰਸ਼ਾਸਨ ਤੋਂ ਇਲਾਵਾ ਤਿੰਨ ਹਜ਼ਾਰ ਤੋਂ ਵੱਧ ਸ਼ਰਧਾਲੂ ਵੀ ਮੌਜੂਦ ਸਨ। ਇਸ ਦੌਰਾਨ ਕੇਦਾਰਨਾਥ ਧਾਮ ਸ਼ਰਧਾਲੂਆਂ ਵੱਲੋਂ ‘ਬਮ ਬਮ ਭੋਲੇ’ ਅਤੇ ‘ਜੈ ਕੇਦਾਰ’ ਦੇ ਜੈਕਾਰਿਆਂ ਨਾਲ ਗੂੰਜ ਉਠਿਆ। ਮੰਦਰ ਕਮੇਟੀ ਦੇ ਮੀਡੀਆ ਇੰਚਾਰਜ ਡਾ. ਹਰੀਸ਼ ਗੌੜ ਨੇ ਦੱਸਿਆ ਕਿ ਕੇਦਾਰਨਾਥ ਮੰਦਰ ਸਵੇਰੇ ਤਿੰਨ ਵਜੇ ਖੋਲ੍ਹੇ ਜਾਣ ਤੋਂ ਬਾਅਦ ਚਾਰ ਵਜੇ ਕਿਵਾੜ ਬੰਦ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਹੋ ਗਈ। ਪੁਜਾਰੀ ਟੀ. ਗੰਗਾਧਰ ਲਿੰਗ ਨੇ, ਭਗਵਾਨ ਕੇਦਾਰਨਾਥ ਦੇ ਸਵੈ-ਸ਼ੈਲੀ ਵਾਲੇ ਜੋਤਿਰਲਿੰਗ ਨੂੰ ਸਮਾਧੀ ਦੇ ਰੂਪ 'ਚ ਸ਼ਿੰਗਾਰਿਆ, ਇਸ ਨੂੰ ਬਾਘੰਬਰ, ਭ੍ਰਿੰਗਰਾਜ ਫੁੱਲ, ਭਸਮਾ, ਸਥਾਨਕ ਸੁੱਕੇ ਫੁੱਲਾਂ ਅਤੇ ਪੱਤਿਆਂ ਨਾਲ ਢੱਕ ਦਿੱਤਾ। ਇਸ ਤੋਂ ਬਾਅਦ ਭੈਰਵ ਨਾਥ ਦੇ ਸੱਦੇ ਨਾਲ ਪਾਵਨ ਅਸਥਾਨ ਅਤੇ ਮੁੱਖ ਗੇਟ ਨੂੰ ਸ਼ਰਧਾਲੂਆਂ ਲਈ ਬੰਦ ਕਰ ਦਿੱਤਾ ਗਿਆ ਅਤੇ ਭਗਵਾਨ ਸ਼ੰਕਰ ਦੀ ਪੰਚਮੁਖੀ ਡੋਲੀ ਉਖੀਮਠ ਦੇ ਓਮਕਾਰੇਸ਼ਵਰ ਮੰਦਰ ਲਈ ਰਵਾਨਾ ਹੋਈ। ਸਰਦੀਆਂ ਦੌਰਾਨ ਭਗਵਾਨ ਕੇਦਾਰਨਾਥ ਦੀ ਪੂਜਾ ਓਮਕਾਰੇਸ਼ਵਰ ਮੰਦਰ 'ਚ ਹੀ ਹੋਵੇਗੀ।

ਉਤਰਾਖੰਡ ਦੇ ਮੁੱਖ ਮੰਤਰੀ ਪੁਸ਼ਕਰ ਸਿੰਘ ਧਾਮੀ ਨੇ ਸ਼ਰਧਾਲੂਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਸ ਵਾਰ ਚਾਰਧਾਮ ਯਾਤਰਾ 'ਚ ਰਿਕਾਰਡ ਗਿਣਤੀ 'ਚ ਸ਼ਰਧਾਲੂ ਪੁੱਜੇ | ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਮਾਰਗਦਰਸ਼ ਹੇਠ ਨਵੀਂ ਕੇਦਾਰ ਪੁਰੀ ਹੋਂਦ 'ਚ ਆ ਚੁੱਕੀ ਹੈ, ਜਿੱਥੇ ਸ਼ਰਧਾਲੂਆਂ ਨੂੰ ਹਰ ਸੰਭਵ ਸਹੂਲਤ ਮੁਹੱਈਆ ਕਰਵਾਈ ਜਾ ਰਹੀ ਹੈ। ਧਾਮੀ ਨੇ ਕਿਹਾ ਕਿ ਹਾਲ ਹੀ 'ਚ ਪ੍ਰਧਾਨ ਮੰਤਰੀ ਨੇ ਗੌਰੀਕੁੰਡ-ਕੇਦਾਰਨਾਥ ਰੋਪਵੇਅ ਦਾ ਨੀਂਹ ਪੱਥਰ ਰੱਖਿਆ ਹੈ ਅਤੇ ਇਸ ਦੇ ਨਿਰਮਾਣ ਨਾਲ ਕੇਦਾਰਨਾਥ ਯਾਤਰਾ ਆਸਾਨ ਹੋ ਜਾਵੇਗੀ। ਇਸ ਤੋਂ ਪਹਿਲਾਂ ਚਾਰਧਾਮ ਵਜੋਂ ਜਾਣੇ ਜਾਂਦੇ ਗੜ੍ਹਵਾਲ ਹਿਮਾਲਿਆ ਦੇ ਪ੍ਰਸਿੱਧ ਮੰਦਰਾਂ 'ਚੋਂ ਇਕ ਗੰਗੋਤਰੀ ਧਾਮ ਦੇ ਕਿਵਾੜ ਬੁੱਧਵਾਰ ਨੂੰ ਸਰਦ ਰੁੱਤ ਲਈ ਅੰਨਕੂਟ ਤਿਉਹਾਰ 'ਤੇ ਬੰਦ ਕਰ ਦਿੱਤੇ ਗਏ ਸਨ। ਯਮੁਨੋਤਰੀ ਦੇ ਕਿਵਾੜ ਵੀ ਵੀਰਵਾਰ ਨੂੰ ਬੰਦ ਦਿੱਤੇ ਜਾਣਗੇ, ਜਦਕਿ ਬਦਰੀਨਾਥ ਦੇ ਕਿਵਾੜ 19 ਨਵੰਬਰ ਨੂੰ ਬੰਦ ਹੋਣਗੇ। ਸਰਦੀਆਂ 'ਚ ਬਰਫ਼ਬਾਰੀ ਅਤੇ ਕੜਾਕੇ ਦੀ ਠੰਢ ਕਾਰਨ ਚਾਰਧਾਮ ਦੇ ਦਰਵਾਜ਼ੇ ਸ਼ਰਧਾਲੂਆਂ ਲਈ ਹਰ ਸਾਲ ਅਕਤੂਬਰ-ਨਵੰਬਰ 'ਚ ਬੰਦ ਕਰ ਦਿੱਤੇ ਜਾਂਦੇ ਹਨ ਅਤੇ ਅਗਲੇ ਸਾਲ ਅਪ੍ਰੈਲ-ਮਈ 'ਚ ਮੁੜ ਖੋਲ੍ਹੇ ਜਾਂਦੇ ਹਨ। ਗੜ੍ਹਵਾਲ ਖੇਤਰ ਦੀ ਆਰਥਿਕ ਰੀੜ੍ਹ ਦੀ ਹੱਡੀ ਮੰਨੀ ਜਾਂਦੀ ਚਾਰਧਾਮ ਯਾਤਰਾ ਲਈ ਹਰ ਸਾਲ ਲੱਖਾਂ ਸ਼ਰਧਾਲੂ ਆਉਂਦੇ ਹਨ। ਇਸ ਸਾਲ ਛੇ ਮਹੀਨਿਆਂ ਦੇ ਯਾਤਰਾ ਸੀਜ਼ਨ ਦੌਰਾਨ 43 ਲੱਖ ਤੋਂ ਵੱਧ ਸ਼ਰਧਾਲੂ ਚਾਰਧਾਮ ਪਹੁੰਚੇ। ਕੇਦਾਰਨਾਥ 'ਚ 15,61,882 ਸ਼ਰਧਾਲੂਆਂ ਨੇ ਬਾਬਾ ਦੇ ਦਰ 'ਤੇ ਮੱਥਾ ਟੇਕਿਆ।