ਭਾਰਤ ਤੇ ਰੂਸ ਨੇ ਇਕ ਵਾਰ ਫ਼ਿਰ ਮਿਲਾਇਆ 'ਹੱਥ ' ! ਮਾਸਕੋ 'ਚ ਇਤਿਹਾਸਕ ਡੀਲ 'ਤੇ ਹੋਏ ਦਸਤਖ਼ਤ

ਨਵੀਂ ਦਿੱਲੀ- ਭਾਰਤ ਦੀ ਹਿੰਦੁਸਤਾਨ ਐਰੋਨੌਟਿਕਸ ਲਿਮਟਿਡ (HAL) ਅਤੇ ਰੂਸ ਦੀ ਪਬਲਿਕ ਜੁਆਇੰਟ ਸਟਾਕ ਕੰਪਨੀ ਯੂਨਾਈਟਿਡ ਏਅਰਕ੍ਰਾਫਟ ਕਾਰਪੋਰੇਸ਼ਨ (PJSC-UAC) ਨੇ ਸਿਵਲ ਕਮਿਊਟਰ ਜੈੱਟ SJ-100 ਦੇ ਉਤਪਾਦਨ ਲਈ ਇੱਕ ਇਤਿਹਾਸਕ ਸਮਝੌਤਾ ਮੈਮੋਰੈਂਡਮ (ਐੱਮ.ਓ.ਯੂ.) 'ਤੇ ਹਸਤਾਖਰ ਕੀਤੇ ਹਨ। ਇਹ ਡੀਲ 27 ਅਕਤੂਬਰ 2025 ਨੂੰ ਰੂਸ ਦੇ ਮਾਸਕੋ ਸ਼ਹਿਰ ਵਿੱਚ ਪੂਰੀ ਹੋਈ। 

ਇਸ ਸਮਝੌਤੇ 'ਤੇ HAL ਦੀ ਤਰਫੋਂ ਪ੍ਰਭਾਤ ਰੰਜਨ ਅਤੇ PJSC-UAC ਰੂਸ ਦੀ ਤਰਫੋਂ ਓਲੇਗ ਬੋਗੋਮੋਲੋਵ ਨੇ ਦਸਤਖਤ ਕੀਤੇ। ਇਸ ਮਹੱਤਵਪੂਰਨ ਮੌਕੇ 'ਤੇ HAL ਦੇ ਸੀ.ਐੱਮ.ਡੀ. ਡਾ. ਡੀ.ਕੇ. ਸੁਨੀਲ ਅਤੇ PJSC-UAC ਦੇ ਡਾਇਰੈਕਟਰ ਜਨਰਲ ਵਾਦਿਮ ਬਡੇਕਾ ਵੀ ਮੌਜੂਦ ਸਨ। ਇਹ ਸਮਝੌਤਾ ਦੋਵਾਂ ਸੰਗਠਨਾਂ ਦਰਮਿਆਨ ਗੂੜ੍ਹੇ ਆਪਸੀ ਵਿਸ਼ਵਾਸ ਦਾ ਨਤੀਜਾ ਹੈ।

ਇਸ ਸਾਂਝੇਦਾਰੀ ਦੇ ਤਹਿਤ, ਹਿੰਦੁਸਤਾਨ ਐਰੋਨੌਟਿਕਸ ਲਿਮਟਿਡ ਨੂੰ ਘਰੇਲੂ ਗਾਹਕਾਂ ਲਈ SJ-100 ਜਹਾਜ਼ ਦਾ ਉਤਪਾਦਨ ਕਰਨ ਦਾ ਅਧਿਕਾਰ ਮਿਲੇਗਾ। SJ-100 ਇੱਕ ਟਵਿਨ-ਇੰਜਣ, ਨੈਰੋ-ਬਾਡੀ ਜਹਾਜ਼ ਹੈ। ਜਾਣਕਾਰੀ ਅਨੁਸਾਰ, ਇਸ ਜਹਾਜ਼ ਦੀਆਂ 200 ਤੋਂ ਵੱਧ ਯੂਨਿਟਾਂ ਪਹਿਲਾਂ ਹੀ ਤਿਆਰ ਕੀਤੀਆਂ ਜਾ ਚੁੱਕੀਆਂ ਹਨ ਅਤੇ ਵਰਤਮਾਨ ਵਿੱਚ 16 ਤੋਂ ਵੱਧ ਕਮਰਸ਼ੀਅਲ ਏਅਰਲਾਈਨ ਆਪਰੇਟਰ ਇਸ ਦਾ ਸੰਚਾਲਨ ਕਰ ਰਹੇ ਹਨ।

ਇਹ ਵੀ ਪੜ੍ਹੋ- ਵੱਡੀ ਖ਼ਬਰ ; ਇਕ ਹੋਰ ਜਹਾਜ਼ ਹੋ ਗਿਆ ਕ੍ਰੈਸ਼ ! ਸਾਰੇ ਸਵਾਰਾਂ ਦੀ ਹੋਈ ਮੌਤ

ਏਵੀਏਸ਼ਨ ਮਾਹਿਰਾਂ ਦਾ ਮੰਨਣਾ ਹੈ ਕਿ SJ-100 ਜਹਾਜ਼ ਭਾਰਤ ਸਰਕਾਰ ਦੀ 'ਉਡਾਨ' ਸਕੀਮ ਤਹਿਤ ਸ਼ਾਰਟ-ਹਾਲ ਕਨੈਕਟੀਵਿਟੀ ਲਈ ਇੱਕ 'ਗੇਮ ਚੇਂਜਰ' ਸਾਬਤ ਹੋਣ ਦੀ ਸਮਰੱਥਾ ਰੱਖਦਾ ਹੈ। ਇਹ ਸਾਂਝੇਦਾਰੀ ਭਾਰਤ ਦੇ ਹਵਾਬਾਜ਼ੀ ਉਦਯੋਗ ਲਈ ਇੱਕ ਵੱਡੀ ਪ੍ਰਾਪਤੀ ਹੈ। ਮਾਹਿਰਾਂ ਦੇ ਅਨੁਮਾਨ ਅਨੁਸਾਰ, ਆਉਣ ਵਾਲੇ ਦਸ ਸਾਲਾਂ ਵਿੱਚ ਭਾਰਤੀ ਹਵਾਬਾਜ਼ੀ ਖੇਤਰ ਨੂੰ ਖੇਤਰੀ ਕਨੈਕਟੀਵਿਟੀ ਲਈ ਇਸ ਸ਼੍ਰੇਣੀ ਦੇ 200 ਤੋਂ ਵੱਧ ਜੈੱਟਾਂ ਦੀ ਲੋੜ ਹੋਵੇਗੀ। ਇਸ ਤੋਂ ਇਲਾਵਾ ਹਿੰਦ ਮਹਾਸਾਗਰ ਖੇਤਰ ਵਿੱਚ ਨੇੜਲੇ ਅੰਤਰਰਾਸ਼ਟਰੀ ਸੈਰ-ਸਪਾਟਾ ਸਥਾਨਾਂ ਨੂੰ ਸੇਵਾ ਦੇਣ ਲਈ 350 ਵਾਧੂ ਜਹਾਜ਼ਾਂ ਦੀ ਜ਼ਰੂਰਤ ਹੋਵੇਗੀ।

HAL ਅਤੇ UAC ਵਿਚਕਾਰ ਇਹ ਸਹਿਯੋਗ ਭਾਰਤ ਵਿੱਚ ਪੂਰੇ ਯਾਤਰੀ ਜਹਾਜ਼ ਦਾ ਉਤਪਾਦਨ ਕਰਨ ਦਾ ਪਹਿਲਾ ਮੌਕਾ ਹੋਵੇਗਾ। ਇਸ ਤੋਂ ਪਹਿਲਾਂ, HAL ਨੇ 1961 ਵਿੱਚ AVRO HS-748 ਦਾ ਉਤਪਾਦਨ ਸ਼ੁਰੂ ਕੀਤਾ ਸੀ, ਜਿਸ ਨੂੰ 1988 ਵਿੱਚ ਬੰਦ ਕਰ ਦਿੱਤਾ ਗਿਆ ਸੀ। ਇਹ ਕਦਮ ਸਿਵਲ ਏਵੀਏਸ਼ਨ ਸੈਕਟਰ ਵਿੱਚ 'ਆਤਮਨਿਰਭਰ ਭਾਰਤ' ਦੇ ਸੁਪਨੇ ਨੂੰ ਸਾਕਾਰ ਕਰਨ ਦੀ ਦਿਸ਼ਾ ਵਿੱਚ ਮਹੱਤਵਪੂਰਨ ਹੈ। ਇਸ ਉਤਪਾਦਨ ਨਾਲ ਨਾ ਸਿਰਫ਼ ਨਿੱਜੀ ਖੇਤਰ ਨੂੰ ਮਜ਼ਬੂਤੀ ਮਿਲੇਗੀ, ਸਗੋਂ ਏਵੀਏਸ਼ਨ ਉਦਯੋਗ ਵਿੱਚ ਵੱਡੇ ਪੱਧਰ 'ਤੇ ਪ੍ਰਤੱਖ ਅਤੇ ਅਪ੍ਰਤੱਖ ਰੁਜ਼ਗਾਰ ਦੇ ਮੌਕੇ ਵੀ ਪੈਦਾ ਹੋਣਗੇ।

ਇਹ ਵੀ ਪੜ੍ਹੋ- 27ਵੇਂ ਦਿਨ 'ਚ ਦਾਖ਼ਲ ਹੋਇਆ ਅਮਰੀਕੀ ਸ਼ਟਡਾਊਨ ! ਹਜ਼ਾਰਾਂ ਫਲਾਈਟਾਂ ਲੇਟ, ਸੈਂਕੜੇ ਹੋਈਆਂ ਰੱਦ