ਵੱਡੀ ਲਾਪਰਵਾਹੀ! ਬਿਨਾਂ ਪਰਮਿਟ ਦੇ 8 ਵਾਰ ਉਡਾਇਆ ਜਹਾਜ਼, DGCA ਨੇ ਠੋਕਿਆ 1.10 ਕਰੋੜ ਦਾ ਜੁਰਮਾਨਾ

ਨਵੀਂ ਦਿੱਲੀ: ਹਵਾਈ ਸਫ਼ਰ ਦੌਰਾਨ ਯਾਤਰੀਆਂ ਦੀ ਸੁਰੱਖਿਆ ਨਾਲ ਖਿਲਵਾੜ ਕਰਨ ਦੇ ਮਾਮਲੇ ਵਿੱਚ ਨਾਗਰਿਕ ਉੱਡਣ ਮਹਾਨਿਦੇਸ਼ਾਲਿਆ (DGCA) ਨੇ ਏਅਰ ਇੰਡੀਆ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਹੈ। ਸੁਰੱਖਿਆ ਮਾਪਦੰਡਾਂ ਦੀ ਅਣਦੇਖੀ ਕਰਨ 'ਤੇ ਏਅਰਲਾਈਨ 'ਤੇ ਲਗਭਗ 1.10 ਕਰੋੜ ਰੁਪਏ (110,350 ਡਾਲਰ) ਦਾ ਭਾਰੀ ਜੁਰਮਾਨਾ ਲਗਾਇਆ ਗਿਆ ਹੈ।

ਬਿਨਾਂ ਸਰਟੀਫਿਕੇਟ ਦੇ ਭਰੀ ਉਡਾਣ 
ਜਾਣਕਾਰੀ ਅਨੁਸਾਰ, ਇਹ ਮਾਮਲਾ ਪਿਛਲੇ ਸਾਲ ਨਵੰਬਰ ਦਾ ਹੈ, ਜਦੋਂ ਏਅਰ ਇੰਡੀਆ ਦੇ ਇੱਕ ਏਅਰਬੱਸ A320 ਜਹਾਜ਼ ਨੇ 24 ਤੋਂ 25 ਨਵੰਬਰ ਦੇ ਵਿਚਕਾਰ ਦਿੱਲੀ, ਬੈਂਗਲੁਰੂ, ਮੁੰਬਈ ਅਤੇ ਹੈਦਰਾਬਾਦ ਵਰਗੇ ਪ੍ਰਮੁੱਖ ਸ਼ਹਿਰਾਂ ਵਿਚਕਾਰ ਯਾਤਰੀਆਂ ਨੂੰ ਲੈ ਕੇ 8 ਵਾਰ ਉਡਾਣ ਭਰੀ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇਸ ਦੌਰਾਨ ਜਹਾਜ਼ ਕੋਲ ਲਾਜ਼ਮੀ 'ਏਅਰਵਰਦੀਨੈੱਸ ਰਿਵਿਊ ਸਰਟੀਫਿਕੇਟ' (ARC) ਨਹੀਂ ਸੀ, ਜੋ ਇਹ ਤਸਦੀਕ ਕਰਦਾ ਹੈ ਕਿ ਜਹਾਜ਼ ਉਡਾਣ ਭਰਨ ਲਈ ਪੂਰੀ ਤਰ੍ਹਾਂ ਫਿੱਟ ਅਤੇ ਸੁਰੱਖਿਅਤ ਹੈ।

ਏਅਰਲਾਈਨ ਨੇ ਮੰਨਿਆ 'ਸਿਸਟਮ ਫੇਲੀਅਰ' 
ਜਾਂਚ ਦੌਰਾਨ ਏਅਰ ਇੰਡੀਆ ਨੇ ਖੁਦ ਸਵੀਕਾਰ ਕੀਤਾ ਹੈ ਕਿ ਇਹ ਉਨ੍ਹਾਂ ਦੇ "ਸਿਸਟਮ ਦੀ ਅਸਫਲਤਾ" ਸੀ। ਰਿਪੋਰਟ ਮੁਤਾਬਕ, ਜਿਨ੍ਹਾਂ ਪਾਇਲਟਾਂ ਨੇ ਇਹ ਉਡਾਣਾਂ ਸੰਚਾਲਿਤ ਕੀਤੀਆਂ, ਉਨ੍ਹਾਂ ਨੇ ਉਡਾਣ ਭਰਨ ਤੋਂ ਪਹਿਲਾਂ ਨਿਰਧਾਰਤ ਮਿਆਰੀ ਸੰਚਾਲਨ ਪ੍ਰਕਿਰਿਆਵਾਂ (SOP) ਅਤੇ ਚੈੱਕਲਿਸਟ ਦੀ ਸਹੀ ਢੰਗ ਨਾਲ ਜਾਂਚ ਨਹੀਂ ਕੀਤੀ ਸੀ। ਜੇਕਰ ਨਿਯਮਾਂ ਦੀ ਪਾਲਣਾ ਕੀਤੀ ਜਾਂਦੀ, ਤਾਂ ਇਹ ਗਲਤੀ ਫੜੀ ਜਾ ਸਕਦੀ ਸੀ।

30 ਦਿਨਾਂ 'ਚ ਜਮ੍ਹਾ ਕਰਵਾਉਣਾ ਹੋਵੇਗਾ ਜੁਰਮਾਨਾ 
DGCA ਨੇ ਏਅਰ ਇੰਡੀਆ ਦੇ ਸੀ.ਈ.ਓ. (CEO) ਕੈਂਪਬੈੱਲ ਵਿਲਸਨ ਨੂੰ ਇਸ ਚੂਕ ਲਈ ਜ਼ਿੰਮੇਵਾਰ ਪ੍ਰਬੰਧਕ ਮੰਨਿਆ ਹੈ। ਰੈਗੂਲੇਟਰ ਨੇ ਕਿਹਾ ਕਿ ਅਜਿਹੀਆਂ ਲਾਪਰਵਾਹੀਆਂ ਨਾਲ ਹਵਾਈ ਸਫ਼ਰ 'ਤੇ ਲੋਕਾਂ ਦਾ ਭਰੋਸਾ ਘੱਟ ਹੋਇਆ ਹੈ। ਏਅਰਲਾਈਨ ਨੂੰ ਇਹ ਜੁਰਮਾਨਾ ਰਾਸ਼ੀ 30 ਦਿਨਾਂ ਦੇ ਅੰਦਰ ਜਮ੍ਹਾ ਕਰਵਾਉਣ ਦਾ ਹੁਕਮ ਦਿੱਤਾ ਗਿਆ ਹੈ।

ਪਹਿਲਾਂ ਵੀ ਮਿਲ ਚੁੱਕੀਆਂ ਹਨ ਚਿਤਾਵਨੀਆਂ 
ਟਾਟਾ ਗਰੁੱਪ ਦੀ ਮਲਕੀਅਤ ਵਾਲੀ ਏਅਰ ਇੰਡੀਆ ਲਈ ਇਹ ਘਟਨਾ ਚਿੰਤਾਜਨਕ ਹੈ, ਕਿਉਂਕਿ ਰੈਗੂਲੇਟਰ ਪਹਿਲਾਂ ਵੀ ਆਡਿਟ ਖਾਮੀਆਂ ਅਤੇ ਐਮਰਜੈਂਸੀ ਉਪਕਰਣਾਂ ਦੀ ਜਾਂਚ ਕੀਤੇ ਬਿਨਾਂ ਜਹਾਜ਼ ਉਡਾਉਣ ਲਈ ਏਅਰਲਾਈਨ ਨੂੰ ਚੇਤਾਵਨੀ ਦੇ ਚੁੱਕਾ ਹੈ। ਰਿਪੋਰਟ ਵਿੱਚ ਪਿਛਲੇ ਸਾਲ ਜੂਨ ਵਿੱਚ ਹੋਏ ਇੱਕ ਦਰਦਨਾਕ ਹਾਦਸੇ ਦਾ ਵੀ ਜ਼ਿਕਰ ਕੀਤਾ ਗਿਆ ਹੈ, ਜਿਸ ਵਿੱਚ 260 ਲੋਕਾਂ ਦੀ ਜਾਨ ਚਲੀ ਗਈ ਸੀ। ਅਜਿਹੇ ਗੰਭੀਰ ਪਿਛੋਕੜ ਦੇ ਬਾਵਜੂਦ, ਬਿਨਾਂ ਪਰਮਿਟ ਦੇ ਜਹਾਜ਼ ਉਡਾਉਣਾ ਸੁਰੱਖਿਆ ਪ੍ਰਣਾਲੀ 'ਤੇ ਵੱਡੇ ਸਵਾਲ ਖੜ੍ਹੇ ਕਰਦਾ ਹੈ।