ਸੜਕ ''ਤੇ ''ਨਾਗਿਨ'' ਬਣ ਰੀਲਾਂ ਬਣਾਉਣ ਲੱਗੀਆਂ ਕੁੜੀਆਂ ! ਪੁਲਸ ਨੇ ''ਸਪੇਰਾ'' ਬਣ ਕੀਤੀ ਕਾਰਵਾਈ
Monday, Feb 23, 2026 - 05:42 PM (IST)
ਨੈਸ਼ਨਲ ਡੈਸਕ- ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋਣ ਦਾ ਭੂਤ ਅੱਜਕੱਲ੍ਹ ਲੋਕਾਂ ਦੇ ਸਿਰ ਚੜ੍ਹ ਕੇ ਬੋਲ ਰਿਹਾ ਹੈ, ਪਰ ਕਈ ਵਾਰ ਇਹ ਜਨੂਨ ਮੁਸੀਬਤ ਦਾ ਸਬੱਬ ਬਣ ਜਾਂਦਾ ਹੈ। ਅਜਿਹਾ ਹੀ ਇੱਕ ਮਾਮਲਾ ਲਖਨਊ-ਕਾਨਪੁਰ ਹਾਈਵੇਅ ਤੋਂ ਸਾਹਮਣੇ ਆਇਆ ਹੈ, ਜਿੱਥੇ ਦੋ ਮੁਟਿਆਰਾਂ ਨੂੰ ਵਿਚਕਾਰ ਸੜਕ 'ਤੇ 'ਨਾਗਿਨ ਡਾਂਸ' ਕਰਨਾ ਭਾਰੀ ਪੈ ਗਿਆ।
ਸ਼ਾਮ ਦੇ ਸਮੇਂ ਜਦੋਂ ਹਾਈਵੇਅ 'ਤੇ ਗੱਡੀਆਂ ਆਪਣੀ ਰਫ਼ਤਾਰ ਨਾਲ ਗੁਜ਼ਰ ਰਹੀਆਂ ਸਨ, ਤਾਂ ਦੋ ਮੁਟਿਆਰਾਂ ਨੇ ਅਚਾਨਕ ਵਿਚਕਾਰ ਸੜਕ 'ਤੇ ਰੀਲ ਬਣਾਉਣ ਲਈ ਨੱਚਣਾ ਸ਼ੁਰੂ ਕਰ ਦਿੱਤਾ। ਕੁਝ ਹੀ ਸਕਿੰਟਾਂ ਦੀ ਇਹ ਵੀਡੀਓ ਇੰਟਰਨੈੱਟ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਗਈ। ਪਰ ਟ੍ਰੈਫਿਕ ਨਿਯਮਾਂ ਦੀਆਂ ਧੱਜੀਆਂ ਉਡਾਉਣ ਵਾਲਾ ਇਹ ਕਾਰਨਾਮਾ ਯੂ.ਪੀ. ਪੁਲਸ ਦੀ ਨਜ਼ਰ ਤੋਂ ਬਚ ਨਹੀਂ ਸਕਿਆ।
ਉੱਤਰ ਪ੍ਰਦੇਸ਼ ਪੁਲਸ ਨੇ ਇਸ ਮਾਮਲੇ ਵਿੱਚ ਬੇਹੱਦ ਸਖ਼ਤ ਅਤੇ ਫਿਲਮੀ ਰੁਖ਼ ਅਪਣਾਇਆ ਹੈ। ਪੁਲਸ ਨੇ ਦੋਵਾਂ ਮੁਟਿਆਰਾਂ ਖਿਲਾਫ਼ FIR ਦਰਜ ਕਰ ਲਈ ਹੈ। ਇਸ ਦੇ ਨਾਲ ਹੀ ਪੁਲਿਸ ਨੇ ਸੋਸ਼ਲ ਮੀਡੀਆ 'ਤੇ ਇੱਕ 56 ਸਕਿੰਟ ਦੀ ਵੀਡੀਓ ਸਾਂਝੀ ਕੀਤੀ ਹੈ, ਜਿਸ ਵਿੱਚ ਫਿਲਮ 'ਨਾਗਿਨ' ਦਾ ਕਲਿੱਪ ਜੋੜ ਕੇ ਇੱਕ ਮਜ਼ੇਦਾਰ ਕੈਪਸ਼ਨ ਦਿੱਤਾ ਗਿਆ: "ਨਾਗਿਨ ਸਟੈੱਪ ਪਰਫੈਕਟ ਸੀ, ਪਰ ਲੋਕੇਸ਼ਨ ਫਲਾਪ। ਸਪੇਰਾ ਆਇਆ ਅਤੇ ਸ਼ੋਅ ਸਟਾਪ।"
ਪੁਲਸ ਨੇ ਸਾਫ਼ ਸੰਦੇਸ਼ ਦਿੱਤਾ ਹੈ ਕਿ ਸੜਕਾਂ ਸਟੇਜ ਨਹੀਂ ਹੁੰਦੀਆਂ ਅਤੇ ਰੋਡ ਸੇਫਟੀ ਨਿਯਮ ਸਾਰਿਆਂ ਦੀ ਜਾਨ ਬਚਾਉਣ ਲਈ ਬਣਾਏ ਗਏ ਹਨ। ਵਾਇਰਲ ਹੋਣ ਦੀ ਇੱਛਾ ਜੇਕਰ ਦੂਜਿਆਂ ਦੀ ਜ਼ਿੰਦਗੀ ਖ਼ਤਰੇ ਵਿੱਚ ਪਾਉਂਦੀ ਹੈ, ਤਾਂ ਕਾਨੂੰਨ ਦਾ ਡੰਡਾ ਚੱਲਣਾ ਲਾਜ਼ਮੀ ਹੈ। ਹੁਣ ਇਹ 'ਰੀਲਬਾਜ਼' ਮੁਟਿਆਰਾਂ ਪੁਲਸ ਦੇ ਸ਼ਿਕੰਜੇ ਵਿੱਚ ਹਨ।
