50 ਹਜ਼ਾਰ ਦਾ ਇਨਾਮੀ ਗੈਂਗਸਟਰ ਮੋਂਟੀ ਐਨਕਾਊਂਟਰ ''ਚ ਢੇਰ, 36 ਸੰਗੀਨ ਮਾਮਲੇ ਸਨ ਦਰਜ

ਮੁਰਾਦਾਬਾਦ : ਉੱਤਰ ਪ੍ਰਦੇਸ਼ ਦੇ ਮੁਰਾਦਾਬਾਦ ਵਿੱਚ ਪੁਲਸ ਅਤੇ ਐਸ.ਟੀ.ਐਫ. (STF) ਨੇ ਇੱਕ ਸਾਂਝੇ ਆਪ੍ਰੇਸ਼ਨ ਦੌਰਾਨ ਉਧਮ ਸਿੰਘ ਗੈਂਗ ਦੇ ਸ਼ਾਰਪ ਸ਼ੂਟਰ ਆਸ਼ੂ ਚੱਢਾ ਉਰਫ ਮੋਂਟੀ ਨੂੰ ਮੁਕਾਬਲੇ ਵਿੱਚ ਮਾਰ ਗਿਰਾਇਆ ਹੈ। ਮੋਂਟੀ ਪੱਛਮੀ ਯੂਪੀ ਦਾ ਇੱਕ ਖਤਰਨਾਕ ਅਪਰਾਧੀ ਸੀ, ਜਿਸ 'ਤੇ 50 ਹਜ਼ਾਰ ਰੁਪਏ ਦਾ ਇਨਾਮ ਘੋਸ਼ਿਤ ਸੀ।

ਇਹ ਮੁਕਾਬਲਾ ਬੁੱਧਵਾਰ (1 ਅਪ੍ਰੈਲ) ਨੂੰ ਸਿਵਲ ਲਾਈਨਜ਼ ਥਾਣਾ ਖੇਤਰ ਵਿੱਚ ਹੋਇਆ। ਪੁਲਸ ਨੂੰ ਮਿਲੀ ਸਹੀ ਖੁਫੀਆ ਜਾਣਕਾਰੀ ਤੋਂ ਬਾਅਦ ਜਦੋਂ ਘੇਰਾਬੰਦੀ ਕੀਤੀ ਗਈ ਤਾਂ ਮੋਂਟੀ ਨੇ ਬਚਣ ਲਈ ਪੁਲਸ ਟੀਮ 'ਤੇ ਆਧੁਨਿਕ ਹਥਿਆਰਾਂ ਨਾਲ ਅੰਧਾਧੁੰਦ ਗੋਲੀਆਂ ਚਲਾਈਆਂ। ਆਤਮ-ਰੱਖਿਆ ਵਿੱਚ ਕੀਤੀ ਗਈ ਜਵਾਬੀ ਫਾਇਰਿੰਗ ਵਿੱਚ ਮੋਂਟੀ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਿਆ। ਉਸ ਨੂੰ ਤੁਰੰਤ ਜ਼ਿਲ੍ਹਾ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਇਸ ਮੁਕਾਬਲੇ ਦੌਰਾਨ ਮੋਂਟੀ ਦਾ ਇੱਕ ਸਾਥੀ ਭੱਜਣ ਵਿੱਚ ਕਾਮਯਾਬ ਰਿਹਾ, ਜਿਸ ਦੀ ਭਾਲ ਜਾਰੀ ਹੈ।

ਐਸ.ਐਸ.ਪੀ. ਸਤਪਾਲ ਅੰਤਿਲ ਅਨੁਸਾਰ, 15 ਮਾਰਚ ਨੂੰ ਮੋਂਟੀ ਨੇ ਮੁਰਾਦਾਬਾਦ ਦੇ ਇੱਕ ਵੱਡੇ ਨਿਰਯਾਤਕ ਤੋਂ 5 ਕਰੋੜ ਰੁਪਏ ਦੀ ਰੰਗਦਾਰੀ ਮੰਗੀ ਸੀ ਅਤੇ ਹੱਤਿਆ ਦੀ ਧਮਕੀ ਦਿੱਤੀ ਸੀ। ਦਬਾਅ ਬਣਾਉਣ ਲਈ ਬਦਮਾਸ਼ਾਂ ਨੇ ਫੈਕਟਰੀ 'ਤੇ ਫਾਇਰਿੰਗ ਵੀ ਕੀਤੀ ਸੀ, ਜਿਸ ਤੋਂ ਬਾਅਦ ਪੁਲਸ ਅਤੇ ਐਸ.ਟੀ.ਐਫ. ਦੀਆਂ ਟੀਮਾਂ ਉਸ ਦੀ ਭਾਲ ਵਿੱਚ ਜੁਟੀਆਂ ਹੋਈਆਂ ਸਨ।

ਮੋਂਟੀ ਨੇ ਸਾਲ 2010 ਵਿੱਚ ਇੱਕ ਕਤਲ ਦੀ ਵਾਰਦਾਤ ਨਾਲ ਜ਼ੁਰਮ ਦੀ ਦੁਨੀਆ ਵਿੱਚ ਕਦਮ ਰੱਖਿਆ ਸੀ ਅਤੇ ਜੇਲ੍ਹ ਵਿੱਚ ਉਸ ਦੀ ਮੁਲਾਕਾਤ ਉਧਮ ਸਿੰਘ ਗੈਂਗ ਦੇ ਗੁਰਗਿਆਂ ਨਾਲ ਹੋਈ ਸੀ। ਉਸ ਦੇ ਖਿਲਾਫ ਗਾਜ਼ੀਆਬਾਦ, ਹਾਪੁੜ, ਮੇਰਠ, ਬੁਲੰਦਸ਼ਹਿਰ ਅਤੇ ਮੁਰਾਦਾਬਾਦ ਦੇ ਵੱਖ-ਵੱਖ ਥਾਣਿਆਂ ਵਿੱਚ ਕਤਲ, ਲੁੱਟ ਅਤੇ ਗੈਂਗਸਟਰ ਐਕਟ ਦੇ 36 ਸੰਗੀਨ ਮਾਮਲੇ ਦਰਜ ਸਨ. ਜੇਲ੍ਹ ਤੋਂ ਬਾਹਰ ਆਉਣ ਤੋਂ ਬਾਅਦ ਉਹ ਲਗਾਤਾਰ ਵਪਾਰੀਆਂ ਅਤੇ ਆਮ ਲੋਕਾਂ ਲਈ ਸਿਰਦਰਦ ਬਣਿਆ ਹੋਇਆ ਸੀ।

ਮੁਕਾਬਲੇ ਵਾਲੀ ਥਾਂ ਦੀ ਤਲਾਸ਼ੀ ਦੌਰਾਨ ਪੁਲਿਸ ਨੇ ਇੱਕ ਸਵਿਫਟ ਕਾਰ, .32 ਬੋਰ ਦੀ ਪਿਸਤੌਲ, ਇੱਕ ਰਿਵਾਲਵਰ, 12 ਬੋਰ ਦੀ ਬੰਦੂਕ ਅਤੇ ਦਰਜਨਾਂ ਕਾਰਤੂਸ ਬਰਾਮਦ ਕੀਤੇ ਹਨ। ਮੁਕਾਬਲੇ ਦੌਰਾਨ ਐਸ.ਟੀ.ਐਫ. ਟੀਮ ਦੀਆਂ ਬੁਲੇਟਪਰੂਫ ਜੈਕਟਾਂ 'ਤੇ ਵੀ ਗੋਲੀਆਂ ਲੱਗੀਆਂ, ਜੋ ਇਸ ਖਤਰਨਾਕ ਅਪਰਾਧੀ ਦੇ ਹਿੰਸਕ ਇਰਾਦਿਆਂ ਨੂੰ ਦਰਸਾਉਂਦੀਆਂ ਹਨ।