ਜਾਣਾ ਚਾਹੁੰਦੇ ਹੋ ਵਿਦੇਸ਼ ਤਾਂ ਚੱਕੋ Passport, ਇਨ੍ਹਾਂ ਦੇਸ਼ਾਂ ਲਈ ਨਹੀਂ ਲੱਗਦਾ Visa

ਨਵੀਂ ਦਿੱਲੀ- ਭਾਰਤੀ ਸੈਲਾਨੀਆਂ ਲਈ ਵਿਦੇਸ਼ ਯਾਤਰਾ ਹੁਣ ਪਹਿਲਾਂ ਨਾਲੋਂ ਕਿਤੇ ਜ਼ਿਆਦਾ ਆਸਾਨ ਅਤੇ ਸੁਵਿਧਾਜਨਕ ਹੋਣ ਜਾ ਰਹੀ ਹੈ। ਹੈਨਲੀ ਪਾਸਪੋਰਟ ਇੰਡੈਕਸ 2026 ਦੀ ਤਾਜ਼ਾ ਰੈਂਕਿੰਗ ਅਨੁਸਾਰ, ਭਾਰਤੀ ਪਾਸਪੋਰਟ ਦੀ ਸਥਿਤੀ 'ਚ ਵੱਡਾ ਸੁਧਾਰ ਹੋਇਆ ਹੈ। ਭਾਰਤ 10 ਅੰਕਾਂ ਦੀ ਛਾਲ ਮਾਰ ਕੇ ਹੁਣ 75ਵੇਂ ਸਥਾਨ 'ਤੇ ਪਹੁੰਚ ਗਿਆ ਹੈ। ਇਸ ਸੁਧਾਰ ਸਦਕਾ ਹੁਣ ਭਾਰਤੀ ਪਾਸਪੋਰਟ ਧਾਰਕ ਦੁਨੀਆ ਦੇ 56 ਦੇਸ਼ਾਂ 'ਚ ਬਿਨਾਂ ਵੀਜ਼ਾ ਜਾਂ 'ਵੀਜ਼ਾ ਆਨ ਅਰਾਈਵਲ' (ਪਹੁੰਚਣ 'ਤੇ ਵੀਜ਼ਾ) ਦੀ ਸਹੂਲਤ ਨਾਲ ਸਫ਼ਰ ਕਰ ਸਕਦੇ ਹਨ।

ਇਨ੍ਹਾਂ ਦੇਸ਼ਾਂ 'ਚ ਮਿਲੇਗੀ ਵੀਜ਼ਾ-ਮੁਕਤ ਐਂਟਰੀ 

ਭਾਰਤੀ ਸੈਲਾਨੀ ਹੁਣ ਕਈ ਦੇਸ਼ਾਂ 'ਚ ਸਿਰਫ਼ ਆਪਣਾ ਪਾਸਪੋਰਟ ਦਿਖਾ ਕੇ ਦਾਖਲ ਹੋ ਸਕਦੇ ਹਨ।

ਏਸ਼ੀਆ: ਭੂਟਾਨ, ਕਜ਼ਾਕਿਸਤਾਨ, ਮਕਾਊ, ਮਲੇਸ਼ੀਆ ਅਤੇ ਨੇਪਾਲ।
ਅਫਰੀਕਾ: ਅੰਗੋਲਾ, ਮਾਰੀਸ਼ਸ, ਰਵਾਂਡਾ ਅਤੇ ਸੇਨੇਗਲ।
ਕੈਰੇਬੀਅਨ ਦੇਸ਼: ਬਾਰਬਾਡੋਸ, ਜਮਾਇਕਾ, ਡੋਮਿਨਿਕਾ ਅਤੇ ਗ੍ਰੇਨਾਡਾ।
ਹੋਰ: ਓਸ਼ੀਨੀਆ 'ਚ ਫਿਜੀ, ਕੁੱਕ ਆਈਲੈਂਡਜ਼ ਅਤੇ ਮਾਈਕ੍ਰੋਨੇਸ਼ੀਆ, ਜਦਕਿ ਮੱਧ ਪੂਰਬ 'ਚ ਕਤਰ ਵੀ ਇਸ ਸੂਚੀ 'ਚ ਸ਼ਾਮਲ ਹੈ।

ਵੀਜ਼ਾ ਆਨ ਅਰਾਈਵਲ ਅਤੇ ਈ-ਵੀਜ਼ਾ ਦੀ ਸਹੂਲਤ 

ਕਈ ਦੇਸ਼ਾਂ ਨੇ ਭਾਰਤੀਆਂ ਲਈ ਵੀਜ਼ਾ ਪ੍ਰਕਿਰਿਆ ਨੂੰ ਬਹੁਤ ਸਰਲ ਬਣਾ ਦਿੱਤਾ ਹੈ:

ਈ-ਵੀਜ਼ਾ (ETA): ਕੀਨੀਆ, ਸੇਸ਼ੇਲਸ ਅਤੇ ਸੇਂਟ ਕਿਟਸ ਵਰਗੇ ਦੇਸ਼ਾਂ ਵਿੱਚ ਆਨਲਾਈਨ 'ਇਲੈਕਟ੍ਰਾਨਿਕ ਟ੍ਰੈਵਲ ਆਥੋਰਾਈਜ਼ੇਸ਼ਨ' ਰਾਹੀਂ ਕੁਝ ਹੀ ਘੰਟਿਆਂ 'ਚ ਵੀਜ਼ਾ ਮਿਲ ਜਾਂਦਾ ਹੈ।
ਵੀਜ਼ਾ ਆਨ ਅਰਾਈਵਲ: ਕੰਬੋਡੀਆ, ਇੰਡੋਨੇਸ਼ੀਆ, ਲਾਓਸ, ਮਾਲਦੀਵ, ਮਿਆਂਮਾਰ, ਸ਼੍ਰੀਲੰਕਾ, ਥਾਈਲੈਂਡ ਅਤੇ ਤਿਮੋਰ-ਲੇਸਤੇ ਵਰਗੇ ਏਸ਼ੀਆਈ ਦੇਸ਼ਾਂ ਵਿੱਚ ਹਵਾਈ ਅੱਡੇ 'ਤੇ ਪਹੁੰਚਦੇ ਹੀ ਵੀਜ਼ਾ ਮਿਲ ਜਾਂਦਾ ਹੈ। ਅਫਰੀਕੀ ਦੇਸ਼ਾਂ ਜਿਵੇਂ ਕਿ ਤਨਜ਼ਾਨੀਆ, ਜ਼ਿੰਬਾਬਵੇ, ਮੈਡਾਗਾਸਕਰ ਅਤੇ ਮੋਜ਼ੰਬੀਕ 'ਚ ਵੀ ਇਹ ਸਹੂਲਤ ਉਪਲੱਬਧ ਹੈ।

ਵਿਸ਼ਵ ਰੈਂਕਿੰਗ 'ਚ ਕੌਣ ਹੈ ਸਭ ਤੋਂ ਅੱਗੇ?

ਹੈਨਲੀ ਪਾਸਪੋਰਟ ਇੰਡੈਕਸ, ਜੋ ਕਿ 199 ਪਾਸਪੋਰਟਾਂ ਅਤੇ 227 ਦੇਸ਼ਾਂ ਦੀ ਰੈਂਕਿੰਗ ਕਰਦਾ ਹੈ, ਦੇ ਅਨੁਸਾਰ ਸਿੰਗਾਪੁਰ ਦਾ ਪਾਸਪੋਰਟ ਦੁਨੀਆ 'ਚ ਸਭ ਤੋਂ ਸ਼ਕਤੀਸ਼ਾਲੀ ਹੈ, ਜੋ 192 ਦੇਸ਼ਾਂ 'ਚ ਵੀਜ਼ਾ-ਮੁਕਤ ਐਂਟਰੀ ਪ੍ਰਦਾਨ ਕਰਦਾ ਹੈ। ਜਾਪਾਨ ਅਤੇ ਦੱਖਣੀ ਕੋਰੀਆ 187 ਦੇਸ਼ਾਂ ਨਾਲ ਦੂਜੇ ਸਥਾਨ 'ਤੇ ਹਨ। ਵਿਸ਼ਵ ਦੀਆਂ ਹੋਰ ਸ਼ਕਤੀਆਂ ਵਿੱਚੋਂ ਯੂਨਾਈਟਿਡ ਕਿੰਗਡਮ (UK) 7ਵੇਂ ਅਤੇ ਸੰਯੁਕਤ ਰਾਜ ਅਮਰੀਕਾ (USA) 10ਵੇਂ ਸਥਾਨ 'ਤੇ ਹੈ। ਇਸ ਨਵੀਂ ਰੈਂਕਿੰਗ ਨਾਲ ਭਾਰਤੀ ਸੈਲਾਨੀਆਂ ਲਈ ਲੰਬੀਆਂ ਵੀਜ਼ਾ ਪ੍ਰਕਿਰਿਆਵਾਂ ਅਤੇ ਮੁਸ਼ਕਲਾਂ ਤੋਂ ਛੁਟਕਾਰਾ ਮਿਲੇਗਾ, ਜਿਸ ਨਾਲ ਹੁਣ ਵਿਦੇਸ਼ੀ ਸੈਰ-ਸਪਾਟਾ ਹੋਰ ਵਧਣ ਦੀ ਉਮੀਦ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e