ਦਿੱਲੀ ਤੋਂ ਬਦਮਾਸ਼ ਗ੍ਰਿਫ਼ਤਾਰ, 6 ਲੱਖ ਰੁਪਏ ਦਾ ਸੀ ਇਨਾਮ
Wednesday, Nov 11, 2020 - 12:49 PM (IST)
ਨਵੀਂ ਦਿੱਲੀ- ਦਿੱਲੀ 'ਚ ਸ਼ਾਹਦਰਾ ਦੇ ਸੁਭਾਸ਼ ਪਾਰਕ 'ਚ ਪੁਲਸ ਨਾਲ ਮੁਕਾਬਲੇ ਤੋਂ ਬਾਅਦ ਬੁੱਧਵਾਰ ਸਵੇਰੇ ਇਕ ਅਪਰਾਧੀ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਸ ਦੇ ਸਿਰ 'ਤੇ 6 ਲੱਖ ਰੁਪਏ ਦਾ ਇਨਾਮ ਐਲਾਨ ਸੀ। ਪੁਲਸ ਡਿਪਟੀ ਕਮਿਸ਼ਨਰ ਪੀ.ਐੱਸ. ਕੁਸ਼ਵਾਹ ਨੇ ਦੱਸਿਆ ਕਿ ਇਕ ਗੁਪਤ ਸੂਚਨਾ ਦੇ ਆਧਾਰ 'ਤੇ ਕਾਰਵਾਈ ਕਰਦੇ ਹੋਏ ਦਿੱਲੀ ਪੁਲਸ ਦੇ ਵਿਸ਼ੇਸ਼ ਸੈੱਲ ਨੇ ਹਾਸਿਮ ਉਰਫ਼ ਬਾਬਾ ਦੇ ਘਰ ਨੇੜੇ ਗ੍ਰਿਫ਼ਤਾਰੀ ਲਈ ਜਾਲ ਵਿਛਾਇਆ।
ਉਨ੍ਹਾਂ ਨੇ ਦੱਸਿਆ,''ਹਾਸਿਮ ਨੂੰ ਸਵੇਰੇ 5.45 ਵਜੇ ਉਸ ਦੀ ਪ੍ਰੇਮਿਕਾ ਦੇ ਘਰ ਤੋਂ ਬਾਹਰ ਆਉਂਦੇ ਦੇਖਿਆ ਗਿਆ। ਉਸ ਨੇ ਪੁਲਸ ਦੀ ਮੌਜੂਦਗੀ ਨੂੰ ਦੇਖਦੇ ਹੋਏ ਪੁਲਸ ਦਲ 'ਤੇ ਗੋਲੀ ਚੱਲਾ ਦਿੱਤੀ, ਜਿਸ ਤੋਂ ਬਾਅਦ ਕੁਝ ਸਮੇਂ ਲਈ ਦੋਹਾਂ ਪਾਸਿਓਂ ਗੋਲੀਬਾਰੀ ਹੋਈ।'' ਹਾਸਿਮ ਦੇ ਖੱਬੇ ਪੈਰ 'ਚ ਗੋਲੀ ਲੱਗੀ ਹੈ ਅਤੇ ਉਸ ਨੂੰ ਜਗ ਪ੍ਰਵੇਸ਼ ਹਸਪਤਾਲ 'ਚ ਲਿਜਾਇਆ ਗਿਆ। ਸ਼ੁਰੂਆਤੀ ਇਲਾਜ ਤੋਂ ਬਾਅਦ ਉਸ ਨੂੰ ਰਾਮ ਮਨੋਹਰ ਲੋਹੀਆ ਹਸਪਤਾਲ ਭੇਜਿਆ ਗਿਆ। ਉਨ੍ਹਾਂ ਨੇ ਦੱਸਿਆ ਕਿ ਹਾਸਿਮ ਕੋਲੋਂ 9 ਐੱਮ.ਐੱਮ. ਪਿਸਤੌਲ, 5 ਗੋਲੀਆਂ ਅਤੇ ਮੋਟਰਸਾਈਕਲ ਜ਼ਬਤ ਹੋਈ।
