ਹਲਦਵਾਨੀ ਨਾਲ ਜੁੜੇ ਦਿੱਲੀ ਧਮਾਕੇ ਦੇ ਤਾਰ, ਡਾ. ਉਮਰ ਦੇ ਫੋਨ ਤੋਂ ਮਿਲਿਆ ਸੁਰਾਗ

ਹਲਦਵਾਨੀ (ਉੱਤਰਾਖੰਡ)  - ਰਾਸ਼ਟਰੀ ਰਾਜਧਾਨੀ ਦਿੱਲੀ ਵਿਚ ਲਾਲ ਕਿਲੇ ਦੇ ਨੇੜੇ ਹੋਏ ਬੰਬ ਧਮਾਕੇ ਦੇ ਤਾਰ ਉੱਤਰਾਖੰਡ ਦੇ ਹਲਦਵਾਨੀ ਜ਼ਿਲੇ ਨਾਲ ਜੁੜੇ ਹੋਏ ਹਨ। ਕੇਂਦਰੀ ਜਾਂਚ ਏਜੰਸੀ (ਐੱਨ. ਆਈ. ਏ.) ਦੀ ਇਕ ਟੀਮ ਦਿੱਲੀ ਅਤੇ ਉੱਤਰਾਖੰਡ ਪੁਲਸ ਦੇ ਸਹਿਯੋਗ ਨਾਲ ਹਲਦਵਾਨੀ ਜ਼ਿਲੇ ਦੇ ਬਨਭੂਲਪੁਰਾ ਖੇਤਰ ਤੋਂ ਬਿਲਾਲੀ ਮਸਜਿਦ ਦੇ ਇਮਾਮ ਅਤੇ ਉਸਦੇ ਇਕ ਸਾਥੀ ਨੂੰ ਗ੍ਰਿਫ਼ਤਾਰ ਕਰ ਕੇ ਦਿੱਲੀ ਲੈ ਗਈ ਹੈ।

ਅਧਿਕਾਰੀਆਂ ਨੇ ਦੱਿਸਆ ਕਿ ਦਿੱਲੀ ਪੁਲਸ ਨੂੰ ਲਾਲ ਕਿਲੇ ਦੇ ਬਾਹਰ ਹੋਏ ਧਮਾਕੇ ਦੇ ਮੁੱਖ ਮੁਲਜ਼ਮ ਡਾ. ਉਮਰ ਨਬੀ ਨਾਲ ਜੁੜੇ ਮੋਬਾਈਲ ਨੰਬਰ ਦੀ ਕਾਲ ਡਿਟੇਲ ਤੋਂ ਹਲਦਵਾਨੀ ਦਾ ਇਕ ਸੁਰਾਗ ਮਿਲਿਆ ਸੀ, ਜਿਸਦੇ ਆਧਾਰ ’ਤੇ ਇਹ ਕਾਰਵਾਈ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਬਿਲਾਲੀ ਮਸਜਿਦ ਦੇ ਇਮਾਮ ਮੁਹੰਮਦ ਆਸਿਫ਼ ਅਤੇ ਬਿਜਲੀ ਦਾ ਕੰਮ ਕਰਨ ਵਾਲੇ ਨਜ਼ਰ ਕਮਾਲ ਨੂੰ ਸ਼ੁੱਕਰਵਾਰ ਅੱਧੀ ਰਾਤ ਤੋਂ ਬਾਅਦ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।

ਇਸ ਦਰਮਿਆਨ, ਅਧਿਕਾਰੀਆਂ ਨੇ ਦੱਸਿਆ ਕਿ ਐੱਨ. ਆਈ. ਏ. ਅਤੇ ਉੱਤਰਾਖੰਡ ਪੁਲਸ ਦੀ ਇਕ ਟੀਮ ਨੈਨੀਤਾਲ ਦੀ ਇਕ ਮਸਜਿਦ ਵਿਚ ਕੁਝ ਲੋਕਾਂ ਤੋਂ ਪੁੱਛਗਿੱਛ ਕਰਨ ਲਈ ਵੀ ਗਈ ਸੀ। 10 ਨਵੰਬਰ ਨੂੰ ਲਾਲ ਕਿਲੇ ਦੇ ਬਾਹਰ ਧਮਾਕਿਆਂ ਨਾਲ ਲੱਦੀ ਆਈ-20 ਕਾਰ ਵਿਚ ਧਮਾਕਾ ਹੋਇਆ ਸੀ, ਜਿਸ ਨੂੰ ਡਾਕਟਰ ਉਮਰ-ਉਨ-ਨਬੀ ਚਲਾ ਰਿਹਾ ਸੀ। ਇਸ ਧਮਾਕੇ ਵਿਚ 15 ਲੋਕ ਮਾਰੇ ਗਏ ਅਤੇ ਕਈ ਹੋਰ ਜ਼ਖਮੀ ਹੋ ਗਏ ਸਨ।