ਅਚਾਨਕ ਧਰਤੀ 'ਤੇ ਛਾ ਜਾਵੇਗਾ ਹਨ੍ਹੇਰਾ, ਗਾਇਬ ਹੋ ਜਾਵੇਗੀ ਸੂਰਜ ਦੀ ਰੌਸ਼ਨੀ, ਧਰਤੀ 'ਤੇ ਦਿਸੇਗਾ ਅਨੋਖਾ ਨਜ਼ਾਰਾ

ਨੈਸ਼ਨਲ ਡੈਸਕ: ਧਰਤੀ 'ਤੇ ਲਗਭਗ 100 ਸਾਲਾਂ ਵਿੱਚ ਪਹਿਲੀ ਵਾਰ ਇੱਕ ਅਨੋਖੀ ਖਗੋਲੀ ਘਟਨਾ ਵਾਪਰਨ ਜਾ ਰਹੀ ਹੈ। ਵਿਗਿਆਨੀਆਂ ਅਨੁਸਾਰ, ਇਹ ਘਟਨਾ ਨਾ ਸਿਰਫ਼ ਵਿਗਿਆਨ ਲਈ ਮਹੱਤਵਪੂਰਨ ਹੋਵੇਗੀ, ਸਗੋਂ ਆਮ ਲੋਕਾਂ ਵਿੱਚ ਵੀ ਬਹੁਤ ਉਤਸ਼ਾਹ ਪੈਦਾ ਕਰੇਗੀ। ਇਹ ਘਟਨਾ ਹੈ, ਪੂਰਨ ਸੂਰਜ ਗ੍ਰਹਿਣ, ਜੋ ਕਿ 2 ਅਗਸਤ 2027 ਨੂੰ ਲੱਗੇਗਾ ਅਤੇ ਇਸਦੀ ਕੁੱਲ ਮਿਆਦ ਲਗਭਗ 6 ਮਿੰਟ 23 ਸਕਿੰਟ ਹੋਵੇਗੀ।

ਇਹ ਇੱਕ ਪੂਰਨ ਸੂਰਜ ਗ੍ਰਹਿਣ ਹੋਵੇਗਾ। ਇਹ ਉਦੋਂ ਵਾਪਰਦਾ ਹੈ ਜਦੋਂ ਚੰਦਰਮਾ ਸੂਰਜ ਅਤੇ ਧਰਤੀ ਦੇ ਬਿਲਕੁਲ ਵਿਚਕਾਰ ਸਿੱਧ ਵਿੱਚ ਆ ਜਾਂਦਾ ਹੈ। 2027 ਦਾ ਇਹ ਗ੍ਰਹਿਣ ਖਾਸ ਤੌਰ 'ਤੇ ਲੰਬਾ ਅਤੇ ਸਾਫ਼ ਹੋਵੇਗਾ ਕਿਉਂਕਿ ਉਸ ਸਮੇਂ ਚੰਦਰਮਾ ਧਰਤੀ ਦੇ ਸਭ ਤੋਂ ਨਜ਼ਦੀਕੀ ਬਿੰਦੂ 'ਤੇ ਹੋਵੇਗਾ, ਜਿਸਨੂੰ 'ਪੈਰੀਜੀ' ਕਿਹਾ ਜਾਂਦਾ ਹੈ। ਗ੍ਰਹਿਣ ਦੌਰਾਨ, ਚੰਦਰਮਾ ਸੂਰਜ ਨੂੰ ਪੂਰੀ ਤਰ੍ਹਾਂ ਢੱਕ ਲਵੇਗਾ, ਜਿਸ ਕਾਰਨ ਦਿਨ ਵੇਲੇ ਅਚਾਨਕ ਗਹਿਰਾ ਹਨੇਰਾ ਛਾ ਜਾਵੇਗਾ। ਇਸ ਸਮੇਂ ਸੂਰਜ 'ਡਾਇਮੰਡ ਰਿੰਗ' ਜਾਂ 'ਰਿੰਗ ਆਫ਼ ਫਾਇਰ' ਵਰਗਾ ਨਜ਼ਰ ਆ ਸਕਦਾ ਹੈ।

ਇਸ ਅਚਾਨਕ ਹਨੇਰੇ ਕਾਰਨ ਤਾਪਮਾਨ ਵਿੱਚ ਲਗਭਗ 5 ਤੋਂ 10 ਡਿਗਰੀ ਸੈਲਸੀਅਸ ਦੀ ਗਿਰਾਵਟ ਦਰਜ ਕੀਤੀ ਜਾ ਸਕਦੀ ਹੈ। ਤਾਪਮਾਨ ਦੀ ਗਿਰਾਵਟ ਤੋਂ ਇਲਾਵਾ, ਹਵਾਵਾਂ ਦੀ ਦਿਸ਼ਾ ਵਿੱਚ ਵੀ ਬਦਲਾਅ ਹੋਵੇਗਾ, ਅਤੇ ਇਸ ਦੌਰਾਨ ਪੰਛੀਆਂ ਅਤੇ ਹੋਰ ਜੀਵ-ਜੰਤੂਆਂ ਦੇ ਵਿਹਾਰ ਵਿੱਚ ਅਸਾਧਾਰਨ ਗੱਲਾਂ ਦੇਖਣ ਨੂੰ ਮਿਲ ਸਕਦੀਆਂ ਹਨ। ਕਈ ਵਿਗਿਆਨੀ ਇਸਨੂੰ ਧਰਤੀ ਅਤੇ ਜੀਵਾਂ ਲਈ ਇੱਕ ਕੁਦਰਤੀ ਪ੍ਰਯੋਗ ਮੰਨਦੇ ਹਨ, ਜੋ ਕੁਦਰਤ ਦੀਆਂ ਪ੍ਰਤੀਕ੍ਰਿਆਵਾਂ ਨੂੰ ਸਮਝਣ ਵਿੱਚ ਮਦਦ ਕਰੇਗਾ। ਇਸ ਘਟਨਾ ਲਈ ਵਿਗਿਆਨੀਆਂ ਅਤੇ ਖੋਜ ਸੰਸਥਾਵਾਂ ਨੇ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ।

ਕਿੱਥੇ-ਕਿੱਥੇ ਦਿਸੇਗਾ ਇਹ ਨਜ਼ਾਰਾ?

ਇਹ ਗ੍ਰਹਿਣ ਅਟਲਾਂਟਿਕ ਮਹਾਸਾਗਰ ਤੋਂ ਸ਼ੁਰੂ ਹੋਵੇਗਾ। ਗ੍ਰਹਿਣ ਦਾ ਪਹਿਲਾ ਪ੍ਰਭਾਵ ਜਿਬਰਾਲਟਰ ਸਟ੍ਰੇਟ ਦੇ ਕੋਲ ਦੇਖਿਆ ਜਾ ਸਕੇਗਾ। ਦੁਨੀਆ ਦੇ ਕਈ ਹਿੱਸਿਆਂ ਜਿਵੇਂ ਕਿ ਦੱਖਣੀ ਯੂਰਪ, ਉੱਤਰ-ਪੂਰਬੀ ਅਫਰੀਕਾ, ਅਤੇ ਮੱਧ ਪੂਰਬ ਦੇ ਕਈ ਸ਼ਹਿਰਾਂ ਵਿੱਚ ਕੁਝ ਸਮੇਂ ਲਈ ਹਨੇਰਾ ਛਾ ਜਾਵੇਗਾ। ਜਿਹੜੇ ਦੇਸ਼ ਇਸ ਕੁਦਰਤੀ ਚਮਤਕਾਰ ਨੂੰ ਦੇਖ ਸਕਣਗੇ, ਉਨ੍ਹਾਂ ਵਿੱਚ ਸਪੇਨ, ਮੋਰੱਕੋ, ਅਲਜੀਰੀਆ, ਟਿਊਨੀਸ਼ੀਆ, ਲੀਬੀਆ ਅਤੇ ਮਿਸਰ ਸ਼ਾਮਲ ਹਨ।

ਕੀ ਭਾਰਤ ਵਿੱਚ ਵੀ ਹੋਵੇਗਾ ਅਸਰ?

ਖ਼ਬਰਾਂ ਅਨੁਸਾਰ, ਭਾਰਤੀਆਂ ਨੂੰ ਇਸ ਪੂਰਨ ਗ੍ਰਹਿਣ ਦੀ ਘਟਨਾ ਦਾ ਅਹਿਸਾਸ ਨਹੀਂ ਹੋਵੇਗਾ। ਪੂਰਨ ਸੂਰਜ ਗ੍ਰਹਿਣ ਦਾ ਅਸਰ ਭਾਰਤ ਵਿੱਚ ਨਹੀਂ ਦਿਖੇਗਾ, ਹਾਲਾਂਕਿ ਕੁਝ ਸੀਮਤ ਹਿੱਸਿਆਂ ਵਿੱਚ ਆਂਸ਼ਿਕ ਸੂਰਜ ਗ੍ਰਹਿਣ ਦੇਖਣ ਨੂੰ ਮਿਲ ਸਕਦਾ ਹੈ।