ਪੁਰਸ਼ਾਂ ਲਈ ਵੱਧ ਜਾਨਲੇਵਾ ਸਾਬਤ ਹੋਇਆ ਕੋਰੋਨਾ ਇਨਫੈਕਸ਼ਨ

ਨਵੀਂ ਦਿੱਲੀ- ਦੇਸ਼ 'ਚ ਕੋਰੋਨਾ ਵਾਇਰਸ (ਕੋਵਿਡ-19) ਇਨਫੈਕਸ਼ਨ ਜਨਾਨੀਆਂ ਦੀ ਤੁਲਨਾ 'ਚ ਪੁਰਸ਼ਾਂ ਲਈ ਵੱਧ ਜਾਨਲੇਵਾ ਸਾਬਤ ਹੋਇਆ ਹੈ। ਦੇਸ਼ 'ਚ ਹੁਣ ਤੱਕ ਕੋਰੋਨਾ ਇਨਫੈਕਸ਼ਨ ਕਾਰਨ ਜਾਨ ਗਵਾਉਣ ਵਾਲੇ ਵਿਅਕਤੀਆਂ 'ਚ 69 ਫੀਸਦੀ ਪੁਰਸ਼ ਅਤੇ 31 ਫੀਸਦੀ ਜਨਾਨੀਆਂ ਹਨ। ਕੇਂਦਰੀ ਸਿਹਤ ਅਤੇ ਪਰਿਵਾਰ ਕਲਿਆਣ ਮੰਤਰਾਲੇ ਨੇ ਸਿਹਤ ਸਕੱਤਰ ਰਾਜੇਸ਼ ਭੂਸ਼ਣ ਨੇ ਦੱਸਿਆ ਕਿ ਹੁਣ ਤੱਕ ਕੋਰੋਨਾ ਇਨਫੈਕਸ਼ਨ ਕਾਰਨ ਹੋਈ ਮੌਤ ਦੇ 58,390 ਮਾਮਲਿਆਂ 'ਚੋਂ 31 ਫੀਸਦੀ ਜਨਾਨੀਆਂ ਅਤੇ 69 ਫੀਸਦੀ ਪੁਰਸ਼ ਹਨ।

ਉਨ੍ਹਾਂ ਨੇ ਦੱਸਿਆ ਕਿ ਉਮਰ ਦੇ ਆਧਾਰ 'ਤੇ ਜੇਕਰ ਮੌਤ ਦੇ ਮਾਮਲੇ ਦੇਖੀਏ ਤਾਂ ਕੋਰੋਨਾ ਇਨਫੈਕਸ਼ਨ ਕਾਰਨ ਸਭ ਤੋਂ ਵੱਧ ਮੌਤਾਂ 60 ਅਤੇ ਉਸ ਤੋਂ ਵੱਧ ਉਮਰ ਦੇ ਵਿਅਕਤੀਆਂ ਦੀਆਂ ਹੋਈਆਂ ਹਨ। ਕੁੱਲ ਮੌਤਾਂ 'ਚ 51 ਫੀਸਦੀ ਮਾਮਲੇ 60 ਸਾਲ ਅਤੇ ਉਸ ਤੋਂ ਵੱਧ ਉਮਰ ਵਰਗ ਦੇ ਵਿਅਕਤੀਆਂ ਦੇ ਹਨ। ਇਸ ਤੋਂ ਇਲਾਵਾ ਕੁੱਲ ਮੌਤਾਂ 'ਚ 36 ਫੀਸਦੀ ਮਾਮਲੇ 45 ਤੋਂ 60 ਸਾਲ ਦੇ ਵਿਅਕਤੀਆਂ ਦੇ, 11 ਫੀਸਦੀ ਮਾਮਲੇ 26 ਤੋਂ 44 ਸਾਲ ਦੀ ਉਮਰ ਦੇ, ਇਕ ਫੀਸਦੀ ਮਾਮਲਾ 18 ਤੋਂ 25 ਸਾਲ ਦੇ ਉਮਰ ਅਤੇ ਇਕ ਫੀਸਦੀ ਮਾਮਲਾ 17 ਸਾਲ ਤੋਂ ਘੱਟ ਉਮਰ ਦੇ ਵਿਅਕਤੀ ਦਾ ਹੈ।