1 ਕਰੋੜ 38 ਲੱਖ ਰੁਪਏ ਦੇ ਆਕਸੀਟੋਸਿਨ ਟੀਕੇ ਦੀ ਖੇਪ ਜ਼ਬਤ, ਪੁੱਛਗਿੱਛ ''ਚ ਹੋਏ ਹੈਰਾਨੀਜਨਕ ਖੁਲਾਸੇ

ਲਖਨਊ: ਉੱਤਰ ਪ੍ਰਦੇਸ਼ ਵਿੱਚ ਫੂਡ ਸੇਫਟੀ ਐਂਡ ਡਰੱਗ ਐਡਮਨਿਸਟ੍ਰੇਸ਼ਨ ਵਿਭਾਗ (ਐੱਫਐੱਸਡੀਏ) ਅਤੇ ਐੱਸਟੀਐੱਫਐੱਫ ਦੀ ਸਾਂਝੀ ਟੀਮ ਨੇ ਵੱਡੀ ਸਫਲਤਾ ਹਾਸਲ ਕੀਤੀ ਹੈ। ਐੱਫਐੱਸਡੀਏ ਅਤੇ ਐੱਸਟੀਐੱਫ ਦੀ ਟੀਮ ਨੇ ਸਾਂਝੀ ਕਾਰਵਾਈ ਕਰਦਿਆਂ ਕਰੋੜਾਂ ਰੁਪਏ ਦੇ ਆਕਸੀਟੋਸਿਨ ਟੀਕੇ ਬਰਾਮਦ ਕੀਤੇ ਹਨ। ਸਹਾਇਕ ਕਮਿਸ਼ਨਰ ਬ੍ਰਜੇਸ਼ ਕੁਮਾਰ ਨੇ ਦੱਸਿਆ ਕਿ ਗੈਰ-ਕਾਨੂੰਨੀ ਆਕਸੀਟੋਸਿਨ ਟੀਕਿਆਂ ਦੀ ਕੁੱਲ ਕੀਮਤ 1 ਕਰੋੜ 38 ਲੱਖ ਰੁਪਏ ਦੇ ਕਰੀਬ ਬਣਦੀ ਹੈ। ਇਹ ਖੇਪ ਬਿਹਾਰ ਤੋਂ ਯੂਪੀ ਲਿਆਂਦੀ ਜਾ ਰਹੀ ਸੀ। ਇਸ ਮਾਮਲੇ ਵਿੱਚ ਮੁਲਜ਼ਮ ਅਨਮੋਲ ਪਾਲ ਅਤੇ ਦਿਨੇਸ਼ ਪਾਲ ਖ਼ਿਲਾਫ਼ ਕੇਸ ਦਰਜ ਕਰ ਲਿਆ ਗਿਆ ਹੈ। ਇਸ ਦੇ ਨਾਲ ਹੀ ਮੁੱਖ ਸਰਗਨਾ ਤੱਕ ਪਹੁੰਚਣ ਲਈ ਦੋਵਾਂ ਤੋਂ ਵੀ ਲਗਾਤਾਰ ਪੁੱਛਗਿੱਛ ਕੀਤੀ ਜਾ ਰਹੀ ਹੈ।

ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਖਾਦ ਸੁਰੱਖਿਆ ਅਤੇ ਡਰੱਗ ਪ੍ਰਸ਼ਾਸਨ ਵਿਭਾਗ ਦੇ ਸਹਾਇਕ ਕਮਿਸ਼ਨਰ ਬ੍ਰਜੇਸ਼ ਕੁਮਾਰ ਨੇ ਵੀ ਇਸ ਸਬੰਧੀ ਬਿਆਨ ਜਾਰੀ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਸਾਨੂੰ ਕਈ ਦਿਨਾਂ ਤੋਂ ਇਸ ਮਾਮਲੇ ਦੀ ਸੂਚਨਾ ਮਿਲ ਰਹੀ ਸੀ। ਜਿਸ ਦੇ ਆਧਾਰ 'ਤੇ ਵੀਰਵਾਰ ਨੂੰ ਉਨ੍ਹਾਂ ਨੇ ਲਖਨਊ ਦੇ ਬੰਗਲਾ ਬਾਜ਼ਾਰ ਚੌਰਾਹੇ ਤੋਂ ਤੇਲੀ ਬਾਗ ਵੱਲ ਜਾ ਰਹੀ ਚਿੱਟੇ ਰੰਗ ਦੀ ਸਕਾਰਪੀਓ ਨੰਬਰ ਯੂਪੀ 32 ਜੀਆਰ 9609 ਦੀ ਤਲਾਸ਼ੀ ਲਈ। ਇਸ ਦੌਰਾਨ ਉਨ੍ਹਾਂ ਨੂੰ ਕਾਰ ਦੇ ਅੰਦਰੋਂ ਆਕਸੀਟੋਸਿਨ ਟੀਕੇ ਦੀ ਖੇਪ ਮਿਲੀ।

ਦੱਸ ਦੇਈਏ ਕਿ ਪੁਲਸ ਪੁੱਛਗਿੱਛ ਦੌਰਾਨ ਦੋਵਾਂ ਦੋਸ਼ੀਆਂ ਨੇ ਦੱਸਿਆ ਕਿ ਸਾਰਾ ਸਾਮਾਨ ਇਕ ਕਮਰੇ 'ਚ ਰੱਖਿਆ ਹੋਇਆ ਸੀ। ਜਿਸ ਤੋਂ ਬਾਅਦ ਜਦੋਂ ਪੁਲਸ ਉਕਤ ਸਥਾਨ 'ਤੇ ਪਹੁੰਚੀ ਤਾਂ ਉਥੋਂ 30 ਪੇਟੀਆਂ ਅਤੇ 6 ਬੋਰੀਆਂ (2,67,000 ਐਮਪੂਲ, 30 ਐੱਮ.ਐੱਲ. ਦੀਆਂ 12,627 ਸ਼ੀਸ਼ੀਆਂ, 100 ਐੱਮ.ਐੱਲ. ਦੀਆਂ 1260 ਸ਼ੀਸ਼ੀਆਂ) ਦਾ ਸਟਾਕ ਬਰਾਮਦ ਹੋਇਆ। ਜਿਸ ਤੋਂ ਬਾਅਦ ਨਿਯਮਾਂ ਅਨੁਸਾਰ ਫਾਰਮ-16 'ਤੇ ਸਾਰੇ ਗੈਰ-ਕਾਨੂੰਨੀ ਆਕਸੀਟੋਸਿਨ ਟੀਕੇ ਜ਼ਬਤ ਕੀਤੇ ਗਏ।