'ਕਾਲ਼' ਬਣ ਗਿਆ 'ਚਿਪਸ ਦਾ ਪੈਕੇਟ' ! ਬੱਚਿਆਂ ਨੂੰ 'ਚੀਜੀ' ਦਿਵਾਉਣ ਤੋਂ ਪਹਿਲਾਂ ਮਾਪੇ ਜ਼ਰੂਰ ਪੜ੍ਹਨ ਇਹ ਖ਼ਬਰ

ਨੈਸ਼ਨਲ ਡੈਸਕ : ਓਡੀਸ਼ਾ ਦੇ ਕੰਧਮਾਲ ਜ਼ਿਲ੍ਹੇ 'ਚ ਇੱਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਚਿਪਸ ਦੇ ਪੈਕਟ ਵਿੱਚੋਂ ਨਿਕਲਿਆ ਇੱਕ ਛੋਟਾ ਜਿਹਾ ਖਿਡੌਣਾ 4 ਸਾਲ ਦੇ ਮਾਸੂਮ ਬੱਚੇ ਲਈ ਮੌਤ ਦਾ ਕਾਰਨ ਬਣ ਗਿਆ ਹੈ। ਮੁਸਿਮਾਹਾ ਪਿੰਡ ਵਿੱਚ ਚਿਪਸ ਦੇ ਪੈਕੇਟ ਤੋਂ ਪਲਾਸਟਿਕ ਦਾ ਖਿਡੌਣਾ ਨਿਗਲਣ ਤੋਂ ਬਾਅਦ ਦਮ ਘੁੱਟਣ ਕਾਰਨ ਬੱਚੇ ਦੀ ਮੌਤ ਹੋ ਗਈ।
ਕਿਵੇਂ ਵਾਪਰਿਆ ਹਾਦਸਾ?
ਮ੍ਰਿਤਕ ਬੱਚੇ ਦੀ ਪਛਾਣ ਕਿਸਾਨ ਰਣਜੀਤ ਪ੍ਰਧਾਨ (40) ਦੇ ਪੁੱਤਰ ਬਿਗਿਲ ਪ੍ਰਧਾਨ ਵਜੋਂ ਹੋਈ ਹੈ। ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਮੰਗਲਵਾਰ ਨੂੰ ਆਂਗਣਵਾੜੀ ਕੇਂਦਰ ਤੋਂ ਪਰਤਣ ਤੋਂ ਬਾਅਦ ਬਿਗਿਲ ਨੇ ਚਿਪਸ ਖਾਣ ਦੀ ਜ਼ਿੱਦ ਕੀਤੀ ਸੀ। ਉਸ ਦੇ ਪਿਤਾ ਉਸ ਨੂੰ ਬਾਜ਼ਾਰ ਲੈ ਗਏ ਅਤੇ 10 ਰੁਪਏ ਵਾਲਾ ਚਿਪਸ ਦਾ ਪੈਕਟ ਖਾਣ ਲਈ ਦਿੱਤਾ, ਜਿਸ ਵਿੱਚ ਇੱਕ ਪਲਾਸਟਿਕ ਦਾ ਖਿਡੌਣਾ ਸੀ।
ਚਿਪਸ ਖਾਂਦੇ ਸਮੇਂ ਇਹ ਖਿਡੌਣਾ ਬੱਚੇ ਦੇ ਹੱਥ ਵਿੱਚ ਆ ਗਿਆ। ਬਿਗਿਲ ਨੇ ਇਸ ਨੂੰ ਮੂੰਹ ਵਿੱਚ ਰੱਖਿਆ ਅਤੇ ਚਬਾਉਣ ਲੱਗਾ। ਇਸ ਦੌਰਾਨ ਖਿਡੌਣਾ ਉਸ ਦੇ ਗਲੇ ਵਿੱਚ ਅਟਕ ਗਿਆ, ਜਿਸ ਕਾਰਨ ਬੱਚੇ ਦਾ ਦਮ ਘੁੱਟਣ ਲੱਗਾ।
ਪਰਿਵਾਰਕ ਮੈਂਬਰਾਂ ਨੇ ਖਿਡੌਣਾ ਕੱਢਣ ਦੀਆਂ ਕਾਫ਼ੀ ਕੋਸ਼ਿਸ਼ਾਂ ਕੀਤੀਆਂ ਪਰ ਉਹ ਸਾਰੀਆਂ ਅਸਫ਼ਲ ਹੋ ਗਈਆਂ। ਬਿਗਿਲ ਅਚਾਨਕ ਬੇਹੋਸ਼ ਹੋ ਗਿਆ। ਮਾਤਾ-ਪਿਤਾ ਉਸ ਨੂੰ ਤੁਰੰਤ ਦਾਰਿੰਗਬਾੜੀ ਕਮਿਊਨਿਟੀ ਹੈਲਥ ਸੈਂਟਰ (ਸੀ.ਐਚ.ਸੀ.) ਲੈ ਗਏ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ।
ਸਾਹ ਨਲੀ 'ਚ ਫਸ ਗਿਆ ਸੀ ਖਿਡੌਣਾ
ਸੀ.ਐਚ.ਸੀ. ਦੇ ਇੰਚਾਰਜ ਮੈਡੀਕਲ ਅਧਿਕਾਰੀ, ਜੈਕੇਸ਼ ਸਾਮੰਤਾਰਾ ਨੇ ਦੱਸਿਆ ਕਿ ਖਿਡੌਣਾ ਬੱਚੇ ਦੇ ਗਲੇ ਵਿੱਚ ਸਾਹ ਨਲੀ ਵਿੱਚ ਫਸ ਗਿਆ ਸੀ, ਜਿਸ ਕਾਰਨ ਉਸ ਨੂੰ ਸਾਹ ਲੈਣ ਵਿੱਚ ਭਾਰੀ ਮੁਸ਼ਕਲ ਹੋ ਰਹੀ ਸੀ ਅਤੇ ਦਮ ਘੁੱਟਣ ਕਾਰਨ ਉਸ ਦੀ ਮੌਤ ਹੋ ਗਈ। ਉਨ੍ਹਾਂ ਕਿਹਾ ਕਿ ਬੱਚੇ ਅਕਸਰ ਇਨ੍ਹਾਂ ਖਿਡੌਣਿਆਂ ਨੂੰ ਖਾਣ ਦੀਆਂ ਚੀਜ਼ਾਂ ਸਮਝ ਲੈਂਦੇ ਹਨ।
ਡਾਕਟਰਾਂ ਨੇ ਕਾਰਵਾਈ ਦੀ ਮੰਗ ਕੀਤੀ
ਘਟਨਾ ਤੋਂ ਬਾਅਦ ਸਿਹਤ ਮਾਹਿਰਾਂ ਨੇ ਖੁਰਾਕ ਕੰਪਨੀਆਂ ਦੀ ਲਾਪਰਵਾਹੀ 'ਤੇ ਚਿੰਤਾ ਪ੍ਰਗਟਾਈ ਹੈ। ਡਾਕਟਰ ਜੈਕੇਸ਼ ਸਾਮੰਤਾਰਾ ਨੇ ਕਿਹਾ ਕਿ ਖੁਰਾਕ ਕੰਪਨੀਆਂ ਨੂੰ ਚਿਪਸ ਜਾਂ ਹੋਰ ਖਾਣ-ਪੀਣ ਵਾਲੇ ਪਦਾਰਥਾਂ ਦੇ ਪੈਕਟਾਂ ਦੇ ਅੰਦਰ ਅਜਿਹੀਆਂ ਚੀਜ਼ਾਂ ਰੱਖਣਾ ਤੁਰੰਤ ਬੰਦ ਕਰ ਦੇਣਾ ਚਾਹੀਦਾ ਹੈ। ਗੰਜਮ ਦੇ ਮੁੱਖ ਜ਼ਿਲ੍ਹਾ ਮੈਡੀਕਲ ਅਤੇ ਜਨ ਸਿਹਤ ਅਧਿਕਾਰੀ (ਸੀ.ਡੀ.ਐਮ. ਐਂਡ ਪੀ.ਐਚ.ਓ.) ਐਸ.ਕੇ. ਨਾਇਕ ਨੇ ਚੇਤਾਵਨੀ ਦਿੱਤੀ ਕਿ ਅਜਿਹੀ ਕੋਈ ਵੀ ਬਾਹਰੀ ਵਸਤੂ ਜੇਕਰ ਸਾਹ ਨਲੀ ਜਾਂ ਭੋਜਨ ਨਲੀ ਵਿੱਚ ਫਸ ਜਾਵੇ ਤਾਂ ਇਹ ਬੱਚਿਆਂ ਦੇ ਨਾਲ-ਨਾਲ ਬਾਲਗਾਂ ਲਈ ਵੀ ਖਤਰਨਾਕ ਹੋ ਸਕਦੀ ਹੈ ਅਤੇ ਮੌਤ ਦਾ ਕਾਰਨ ਬਣ ਸਕਦੀ ਹੈ।
ਇਸ ਤੋਂ ਇਲਾਵਾ, ਨਿੱਜੀ ਡਾਕਟਰ ਸੁਭਾਸ਼ ਸਾਹੂ ਨੇ ਅਧਿਕਾਰੀਆਂ ਨੂੰ ਕਾਰਵਾਈ ਕਰਨ ਦੀ ਅਪੀਲ ਕੀਤੀ। ਉਨ੍ਹਾਂ ਸਖ਼ਤੀ ਨਾਲ ਕਿਹਾ ਕਿ ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ (FSSAI) ਨੂੰ ਪੈਕੇਜਡ ਸਨੈਕਸ ਦੀ ਸਖ਼ਤ ਨਿਗਰਾਨੀ ਕਰਨੀ ਚਾਹੀਦੀ ਹੈ ਅਤੇ ਪੈਕਟ ਦੇ ਅੰਦਰ ਖਿਡੌਣਿਆਂ 'ਤੇ ਪਾਬੰਦੀ ਲਗਾਉਣੀ ਚਾਹੀਦੀ ਹੈ। ਉਨ੍ਹਾਂ ਮੰਗ ਕੀਤੀ ਕਿ ਅਜਿਹਾ ਕਰਨ ਵਾਲੀਆਂ ਕੰਪਨੀਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ।
ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਵੀ ਅੰਧਰਾ ਪ੍ਰਦੇਸ਼ ਦੇ ਵਿਜੇਨਗਰਮ (ਅਕਤੂਬਰ 2020) ਅਤੇ ਪੱਛਮੀ ਗੋਦਾਵਰੀ (ਨਵੰਬਰ 2017) ਜ਼ਿਲ੍ਹਿਆਂ ਵਿੱਚ ਇਸੇ ਤਰ੍ਹਾਂ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ ਸਨ, ਜਿੱਥੇ ਸਨੈਕਸ ਦੇ ਪੈਕਟਾਂ ਵਿੱਚੋਂ ਖਿਡੌਣੇ ਨਿਗਲਣ ਕਾਰਨ ਦੋ ਬੱਚਿਆਂ ਦੀ ਮੌਤ ਹੋ ਗਈ ਸੀ। ਇਸ ਮਾਮਲੇ ਵਿੱਚ ਮਾਤਾ-ਪਿਤਾ ਦੇ ਇਨਕਾਰ ਕਾਰਨ ਪੋਸਟਮਾਰਟਮ ਨਹੀਂ ਕਰਵਾਇਆ ਗਿਆ, ਹਾਲਾਂਕਿ ਹਾਲਾਤ ਦੇ ਆਧਾਰ 'ਤੇ ਮੌਤ ਦਾ ਕਾਰਨ ਦਮ ਘੁੱਟਣਾ ਦੱਸਿਆ ਗਿਆ ਹੈ ਅਤੇ ਕੋਈ ਐਫ.ਆਈ.ਆਰ. ਦਰਜ ਨਹੀਂ ਕੀਤੀ ਗਈ ਹੈ।