Vastu : ਗਲਤ ਦਿਸ਼ਾ 'ਚ ਲਗਾਇਆ ਗਿਆ ਸ਼ੀਸ਼ਾ ਵੀ ਬਣ ਸਕਦੈ ਤੁਹਾਡੀ ਕੰਗਾਲੀ ਦਾ ਕਾਰਨ! ਜਾਣੋ ਸਹੀ ਦਿਸ਼ਾ ਤੇ ਉਪਾਅ
2/19/2026 9:01:37 AM
ਨਵੀਂ ਦਿੱਲੀ - ਵਾਸਤੂ ਸ਼ਾਸਤਰ ਅਨੁਸਾਰ, ਸ਼ੀਸ਼ਾ ਸਿਰਫ ਚਿਹਰਾ ਦੇਖਣ ਦੀ ਵਸਤੂ ਨਹੀਂ ਹੈ, ਸਗੋਂ ਇਹ ਊਰਜਾ ਨੂੰ ਪਰਿਵਰਤਿਤ ਅਤੇ ਦੁੱਗਣਾ ਕਰਨ ਵਾਲਾ ਇਕ ਸ਼ਕਤੀਸ਼ਾਲੀ ਮਾਧਿਅਮ ਹੈ। ਜੇਕਰ ਸਹੀ ਦਿਸ਼ਾ ਅਤੇ ਸਥਾਨ 'ਤੇ ਸ਼ੀਸ਼ਾ ਲਗਾਇਆ ਜਾਵੇ, ਤਾਂ ਇਹ ਘਰ ਦੀ ਨਕਾਰਾਤਮਕਤਾ ਨੂੰ ਸੋਖ ਲੈਂਦਾ ਹੈ ਅਤੇ ਸਕਾਰਾਤਮਕ ਊਰਜਾ ਦੇ ਪ੍ਰਵਾਹ ਨੂੰ ਵਧਾ ਦਿੰਦਾ ਹੈ, ਜਿਸ ਨਾਲ ਆਰਥਿਕ ਤੰਗੀ ਦੂਰ ਹੋ ਸਕਦੀ ਹੈ।
ਤਿਜੋਰੀ ਅਤੇ ਧਨ 'ਚ ਵਾਧਾ
ਵਾਸਤੂ ਮਾਹਿਰਾਂ ਅਨੁਸਾਰ, ਜੇਕਰ ਤੁਸੀਂ ਆਪਣੀ ਅਲਮਾਰੀ ਜਾਂ ਤਿਜੋਰੀ ਦੇ ਸਾਹਮਣੇ ਇਕ ਸ਼ੀਸ਼ਾ ਲਗਾਉਂਦੇ ਹੋ, ਤਾਂ ਉਸ 'ਚ ਧਨ ਅਤੇ ਗਹਿਣਿਆਂ ਦਾ ਪ੍ਰਤੀਬਿੰਬ ਦਿਖਾਈ ਦਿੰਦਾ ਹੈ। ਇਹ ਇਸ ਗੱਲ ਦਾ ਪ੍ਰਤੀਕ ਹੈ ਕਿ ਤੁਹਾਡੇ ਧਨ ਦੇ ਸਰੋਤ ਵਧ ਰਹੇ ਹਨ ਅਤੇ ਸੰਪਤੀ ਦੁੱਗਣੀ ਹੋ ਰਹੀ ਹੈ। ਤਿਜੋਰੀ ਦੇ ਅੰਦਰ ਉੱਤਰੀ ਕੰਧ 'ਤੇ ਇੱਕ ਛੋਟਾ ਸ਼ੀਸ਼ਾ ਲਗਾਉਣਾ ਵੀ ਲਾਭਦਾਇਕ ਹੁੰਦਾ ਹੈ। ਹਾਲਾਂਕਿ, ਇਹ ਧਿਆਨ ਰੱਖਣਾ ਜ਼ਰੂਰੀ ਹੈ ਕਿ ਸ਼ੀਸ਼ਾ ਕਦੇ ਵੀ ਗੰਦਾ ਜਾਂ ਧੁੰਦਲਾ ਨਹੀਂ ਹੋਣਾ ਚਾਹੀਦਾ, ਕਿਉਂਕਿ ਇਹ ਧਨ ਦੇ ਆਗਮਨ 'ਚ ਰੁਕਾਵਟ ਪਾ ਸਕਦਾ ਹੈ।
ਦਿਸ਼ਾ ਦਾ ਚੋਣ ਅਤੇ ਪ੍ਰਭਾਵ :-
ਉੱਤਰ ਦਿਸ਼ਾ
- ਇਸ ਨੂੰ ਕੁਬੇਰ ਦੀ ਦਿਸ਼ਾ ਮੰਨਿਆ ਜਾਂਦਾ ਹੈ; ਇੱਥੇ ਲੱਗਿਆ ਸ਼ੀਸ਼ਾ ਧਨ ਦੇ ਨਵੇਂ ਮੌਕੇ ਲਿਆਉਂਦਾ ਹੈ।
ਪੂਰਬ ਦਿਸ਼ਾ
- ਇੱਥੇ ਸ਼ੀਸ਼ਾ ਲਗਾਉਣ ਨਾਲ ਪਰਿਵਾਰ ਦੇ ਮੈਂਬਰਾਂ ਦੀ ਉੱਨਤੀ ਹੁੰਦੀ ਹੈ ਅਤੇ ਸਮਾਜ 'ਚ ਮਾਨ-ਸਨਮਾਨ ਵਧਦਾ ਹੈ।
ਦੱਖਣ ਜਾਂ ਦੱਖਣ-ਪੱਛਮ ਦਿਸ਼ਾ
- ਇਨ੍ਹਾਂ ਦਿਸ਼ਾਵਾਂ 'ਚ ਸ਼ੀਸ਼ਾ ਲਗਾਉਣ ਤੋਂ ਬਚਣਾ ਚਾਹੀਦਾ ਹੈ, ਕਿਉਂਕਿ ਇਸ ਨਾਲ ਬੇਲੋੜੇ ਖਰਚੇ ਵਧਦੇ ਹਨ ਅਤੇ ਜਮ੍ਹਾਂ ਪੂੰਜੀ ਘਟਣ ਲੱਗਦੀ ਹੈ।
ਸ਼ੀਸ਼ੇ ਦਾ ਆਕਾਰ ਅਤੇ ਬਣਾਵਟ
- ਵਾਸਤੂ ਅਨੁਸਾਰ ਵਰਗਾਕਾਰ ਅਤੇ ਆਇਤਾਕਾਰ ਸ਼ੀਸ਼ੇ ਸਭ ਤੋਂ ਉੱਤਮ ਮੰਨੇ ਜਾਂਦੇ ਹਨ ਕਿਉਂਕਿ ਇਹ ਊਰਜਾ ਨੂੰ ਸੰਤੁਲਿਤ ਰੱਖਦੇ ਹਨ। ਦੂਜੇ ਪਾਸੇ, ਗੋਲ ਸ਼ੀਸ਼ੇ ਮਾਨਸਿਕ ਤਣਾਅ ਵਧਾ ਸਕਦੇ ਹਨ ਅਤੇ ਤਿਕੋਣੇ ਜਾਂ ਨੁਕੀਲੇ ਕਿਨਾਰਿਆਂ ਵਾਲੇ ਸ਼ੀਸ਼ੇ ਘਰ 'ਚ ਕਲੇਸ਼ ਦਾ ਕਾਰਨ ਬਣ ਸਕਦੇ ਹਨ।
ਸਾਵਧਾਨੀਆਂ : ਮੁੱਖ ਦਰਵਾਜ਼ਾ ਅਤੇ ਬੈੱਡਰੂਮ
- ਅਕਸਰ ਲੋਕ ਸੁੰਦਰਤਾ ਲਈ ਮੁੱਖ ਦਰਵਾਜ਼ੇ ਦੇ ਸਾਹਮਣੇ ਸ਼ੀਸ਼ਾ ਲਗਾ ਦਿੰਦੇ ਹਨ, ਜੋ ਕਿ ਵਾਸਤੂ ਅਨੁਸਾਰ ਇਕ ਵੱਡੀ ਗਲਤੀ ਹੈ। ਅਜਿਹਾ ਕਰਨ ਨਾਲ ਘਰ 'ਚ ਪ੍ਰਵੇਸ਼ ਕਰਨ ਵਾਲੀ ਸਕਾਰਾਤਮਕ ਊਰਜਾ ਟਕਰਾ ਕੇ ਵਾਪਸ ਬਾਹਰ ਚਲੀ ਜਾਂਦੀ ਹੈ। ਇਸੇ ਤਰ੍ਹਾਂ, ਬੈੱਡਰੂਮ 'ਚ ਅਜਿਹੀ ਜਗ੍ਹਾ ਸ਼ੀਸ਼ਾ ਨਹੀਂ ਹੋਣਾ ਚਾਹੀਦਾ ਜਿੱਥੇ ਸੌਂਦੇ ਸਮੇਂ ਸਰੀਰ ਦਾ ਕੋਈ ਹਿੱਸਾ ਦਿਖਾਈ ਦੇਵੇ ਕਿਉਂਕਿ ਇਹ ਸਿਹਤ ਸੰਬੰਧੀ ਸਮੱਸਿਆਵਾਂ ਪੈਦਾ ਕਰ ਸਕਦਾ ਹੈ। ਜੇਕਰ ਸ਼ੀਸ਼ਾ ਹਟਾਇਆ ਨਹੀਂ ਜਾ ਸਕਦਾ, ਤਾਂ ਸੌਂਦੇ ਸਮੇਂ ਉਸ ਨੂੰ ਕੱਪੜੇ ਨਾਲ ਢਕ ਦੇਣਾ ਚਾਹੀਦਾ ਹੈ।
ਖੁਸ਼ਹਾਲੀ ਦਾ ਗੁਪਤ ਉਪਾਅ
- ਆਰਥਿਕ ਖੁਸ਼ਹਾਲੀ ਲਈ ਡਾਇਨਿੰਗ ਟੇਬਲ ਦੇ ਸਾਹਮਣੇ ਸ਼ੀਸ਼ਾ ਲਗਾਉਣਾ ਬਹੁਤ ਸ਼ੁਭ ਮੰਨਿਆ ਜਾਂਦਾ ਹੈ। ਜਦੋਂ ਭੋਜਨ ਕਰਦੇ ਸਮੇਂ ਸ਼ੀਸ਼ੇ 'ਚ ਪ੍ਰਤੀਬਿੰਬ ਦਿਖਾਈ ਦਿੰਦਾ ਹੈ, ਤਾਂ ਇਹ ਅੰਨ ਦੀ ਬਹੁਤਾਤ ਦਾ ਸੰਕੇਤ ਦਿੰਦਾ ਹੈ ਅਤੇ ਪਰਿਵਾਰ ਵਿੱਚ ਪ੍ਰੇਮ ਤੇ ਸੰਤੁਸ਼ਟੀ ਦੀ ਭਾਵਨਾ ਵਧਾਉਂਦਾ ਹੈ।
