'cafe ਕੌਫੀ ਡੇ' ਦੇ ਮਾਲਕ ਦੀ ਲਾਸ਼ ਮਿਲੀ, ਦੋ ਦਿਨ ਤੋਂ ਸੀ ਲਾਪਤਾ
Wednesday, Jul 31, 2019 - 07:47 AM (IST)
ਬੇਂਗਲੁਰੂ— ਸੋਮਵਾਰ ਤੋਂ ਲਾਪਤਾ 'ਕੈਫੇ ਕੌਫੀ ਡੇ' (ਸੀ. ਸੀ. ਡੀ.) ਦੇ ਸੰਸਥਾਪਕ ਵੀ. ਜੀ. ਸਿਧਾਰਥ ਦੀ ਲਾਸ਼ ਕਰਨਾਟਕ 'ਚ ਮੰਗਲੁਰੂ ਦੀ ਨੇਤਰਾਵਤੀ ਨਦੀ 'ਚੋਂ ਮਿਲੀ ਹੈ। ਪਹਿਲਾਂ ਹੀ ਕਿਹਾ ਜਾ ਰਿਹਾ ਸੀ ਕਿ ਉਨ੍ਹਾਂ ਨੇ ਨਦੀ 'ਚ ਛਾਲ ਮਾਰ ਕੇ ਖੁਦਕੁਸ਼ੀ ਕਰ ਲਈ ਹੈ। ਕਰੀਬ 200 ਲੋਕਾਂ ਦਾ ਦਲ ਮੰਗਲੁਰੂ ਦੀ ਨੇਤਰਾਵਤੀ ਨਦੀ 'ਚ ਉਨ੍ਹਾਂ ਦੀ ਭਾਲ 'ਚ ਲੱਗਾ ਸੀ। ਵੀ. ਜੀ. ਸਿਧਾਰਥ ਕਰਨਾਟਕ ਦੇ ਸਾਬਕਾ ਮੁੱਖ ਮੰਤਰੀ ਐੱਸ. ਐੱਮ. ਕ੍ਰਿਸ਼ਣਾ ਦੇ ਜਵਾਈ ਸਨ।
ਮੰਗਲੁਰੂ ਪੁਲਸ ਕਮਿਸ਼ਨਰ ਸੰਦੀਪ ਪਾਟਿਲ ਨੇ ਕਿਹਾ ਕਿ ਅੱਜ ਸਵੇਰ ਉਨ੍ਹਾਂ ਨੂੰ ਇਕ ਲਾਸ਼ ਮਿਲੀ ਹੈ, ਜਿਸ ਦੀ ਪੁਸ਼ਟੀ ਹੋਣਾ ਬਾਕੀ ਹੈ। ਵੀ. ਜੀ. ਸਿਧਾਰਥ ਦੇ ਪਰਿਵਾਰ ਨੂੰ ਇਸ ਦੀ ਸੂਚਨਾ ਦਿੱਤੀ ਗਈ ਹੈ।
ਸਿਧਾਰਥ ਸੋਮਵਾਰ ਤੋਂ ਉਸ ਵਕਤ ਲਾਪਤਾ ਹੋ ਗਏ ਸਨ, ਜਦੋਂ ਉਹ ਨੇਤਰਾਵਤੀ ਨਦੀ ਦੇ ਪੁਲ 'ਤੇ ਡਰਾਈਵਰ ਨੂੰ ਇਹ ਕਹਿ ਕੇ ਕਾਰ ਤੋਂ ਉਤਰ ਗਏ ਸਨ ਕਿ ਉਹ ਥੋੜ੍ਹੀ ਦੇਰ ਸੈਰ ਕਰਨਾ ਚਾਹੁੰਦੇ ਹਨ ਪਰ ਜਦੋਂ ਉਹ ਘੰਟੇ ਤਕ ਵਾਪਸ ਨਹੀਂ ਆਏ ਤਾਂ ਡਰਾਈਵਰ ਨੇ ਪੁਲਸ ਨੂੰ ਇਸ ਦੀ ਰਿਪੋਰਟ ਦਰਜ ਕਰਵਾਈ। ਡਰਾਈਵਰ ਦੇ ਬਿਆਨ ਤੋਂ ਪੁਲਸ ਨੂੰ ਖਦਸ਼ਾ ਸੀ ਕਿ ਸਿਧਾਰਥ ਨਦੀ 'ਚ ਕੁੱਦ ਗਏ ਹੋਣਗੇ। ਇਸ ਆਧਾਰ 'ਤੇ ਪੁਲਸ ਤਲਾਸ਼ 'ਚ ਜੁਟੀ ਹੋਈ ਸੀ ਤੇ ਇਸ ਕੰਮ ਲਈ 200 ਲੋਕਾਂ ਦੀ ਟੀਮ ਲਗਾਈ ਗਈ ਸੀ, ਜਿਸ 'ਚ ਪੁਲਸ ਕਰਮੀ, ਗੋਤਾਖੋਰ ਤੇ ਮਛੇਰੇ ਸ਼ਾਮਲ ਸਨ। ਇਕ ਮਛੇਰੇ ਨੇ ਦਾਅਵਾ ਕੀਤਾ ਸੀ ਕਿ ਉਸ ਨੇ ਇਕ ਵਿਅਕਤੀ ਨੂੰ ਨਦੀ 'ਚ ਛਾਲ ਮਾਰਦਿਆਂ ਦੇਖਿਆ ਸੀ।
