BSNL ਜਲਦ ਹੀ ਬੰਦ ਕਰੇਗੀ ਆਪਣੀ ਇਹ ਸੇਵਾ, ਕਰੋੜਾਂ ਯੂਜ਼ਰਸ 'ਤੇ ਪਵੇਗਾ ਅਸਰ

ਨਵੀਂ ਦਿੱਲੀ: ਦੇਸ਼ ਦੀ ਸਰਕਾਰੀ ਟੈਲੀਕਾਮ ਕੰਪਨੀ ਭਾਰਤ ਸੰਚਾਰ ਨਿਗਮ ਲਿਮਟਿਡ (ਬੀ. ਐੱਸ. ਐੱਨ. ਐੱਲ.) ਨੇ ਆਪਣੀ 3ਜੀ ਸਰਵਿਸ ਨੂੰ ਪੂਰੀ ਤਰ੍ਹਾਂ ਬੰਦ ਕਰਨ ਦਾ ਵੱਡਾ ਫੈਸਲਾ ਲਿਆ ਹੈ। ਕੰਪਨੀ ਵੱਲੋਂ ਇਹ ਕਦਮ ਦੇਸ਼ ਭਰ ਵਿੱਚ 4G ਨੈਟਵਰਕ ਦੇ ਵਧਦੇ ਦਾਇਰੇ ਨੂੰ ਦੇਖਦੇ ਹੋਏ ਚੁੱਕਿਆ ਗਿਆ ਹੈ। ਅਗਲੇ ਕੁਝ ਦਿਨਾਂ ਵਿੱਚ ਇਸ ਸੇਵਾ ਨੂੰ ਪੜਾਅਵਾਰ ਤਰੀਕੇ ਨਾਲ ਬੰਦ ਕਰ ਦਿੱਤਾ ਜਾਵੇਗਾ, ਜਿਸ ਦਾ ਸਿੱਧਾ ਅਸਰ ਕੰਪਨੀ ਦੇ ਕਰੋੜਾਂ ਗਾਹਕਾਂ 'ਤੇ ਪੈਣ ਦੀ ਉਮੀਦ ਹੈ। ਸਰੋਤਾਂ ਮੁਤਾਬਕ, ਬੀ. ਐੱਸ. ਐੱਨ. ਐੱਲ. ਨੇ ਇਸ ਮਹੀਨੇ ਸਾਰੇ ਟੈਲੀਕਾਮ ਸਰਕਲਾਂ ਦੇ ਜਨਰਲ ਮੈਨੇਜਰਾਂ ਨੂੰ ਪੱਤਰ ਲਿਖ ਕੇ 3ਜੀ ਸੇਵਾਵਾਂ ਬੰਦ ਕਰਨ ਦੇ ਨਿਰਦੇਸ਼ ਜਾਰੀ ਕਰ ਦਿੱਤੇ ਹਨ। ਕੰਪਨੀ ਨੇ ਕਿਹਾ ਹੈ ਕਿ ਜਿਨ੍ਹਾਂ ਇਲਾਕਿਆਂ ਵਿੱਚ 4ਜੀ ਨੈਟਵਰਕ ਦੀ ਕਵਰੇਜ ਪੂਰੀ ਹੋ ਚੁੱਕੀ ਹੈ, ਉੱਥੇ 3ਜੀ ਸੇਵਾ ਨੂੰ ਬੰਦ ਕਰ ਦਿੱਤਾ ਜਾਵੇ। ਫਿਲਹਾਲ ਦੇਸ਼ ਦੇ ਹਜ਼ਾਰਾਂ ਸ਼ਹਿਰਾਂ ਅਤੇ ਕਸਬਿਆਂ ਵਿੱਚ ਅਜੇ ਵੀ 3ਜੀ ਸੇਵਾ ਚੱਲ ਰਹੀ ਹੈ।

ਯੂਜ਼ਰਸ ਨੂੰ ਕੀ ਕਰਨਾ ਪਵੇਗਾ?

ਟਰਾਈ (TRAI) ਦੇ ਅੰਕੜਿਆਂ ਅਨੁਸਾਰ, ਬੀ. ਐੱਸ. ਐੱਨ. ਐੱਲ. ਦੇ ਕਰੋੜਾਂ ਯੂਜ਼ਰਸ ਅਜੇ ਵੀ 2ਜੀ ਅਤੇ 3ਜੀ ਸਿਮ ਦੀ ਵਰਤੋਂ ਕਰ ਰਹੇ ਹਨ। ਸੇਵਾਵਾਂ ਬੰਦ ਹੋਣ ਤੋਂ ਬਾਅਦ ਯੂਜ਼ਰਸ ਨੂੰ ਆਪਣਾ ਪੁਰਾਣਾ 3ਜੀ ਸਿਮ 4ਜੀ ਵਿੱਚ ਅਪਗ੍ਰੇਡ ਕਰਵਾਉਣਾ ਪਵੇਗਾ। ਜੇਕਰ ਕਿਸੇ ਯੂਜ਼ਰ ਦਾ ਮੋਬਾਈਲ ਫੋਨ 4ਜੀ ਜਾਂ 5ਜੀ ਤਕਨੀਕ ਨੂੰ ਸਪੋਰਟ ਨਹੀਂ ਕਰਦਾ, ਤਾਂ ਉਸ ਨੂੰ ਸੇਵਾਵਾਂ ਜਾਰੀ ਰੱਖਣ ਲਈ ਨਵਾਂ ਫੋਨ ਖਰੀਦਣਾ ਪੈ ਸਕਦਾ ਹੈ। ਬੀ. ਐੱਸ. ਐੱਨ. ਐੱਲ. ਨੇ ਇਸ ਸਾਲ ਦੇ ਅੰਤ ਤੱਕ ਦੇਸ਼ ਭਰ ਵਿੱਚ ਇੱਕ ਲੱਖ 4ਜੀ ਟਾਵਰ ਲਗਾਉਣ ਦਾ ਟੀਚਾ ਰੱਖਿਆ ਸੀ, ਜਿਸ ਵਿੱਚੋਂ ਲਗਭਗ 97,000 ਟਾਵਰ ਲਗਾਏ ਜਾ ਚੁੱਕੇ ਹਨ। ਇਹ ਪੂਰਾ ਨੈਟਵਰਕ ਭਾਰਤੀ ਸਵਦੇਸ਼ੀ ਤਕਨੀਕ ਨਾਲ ਤਿਆਰ ਕੀਤਾ ਗਿਆ ਹੈ। ਕੰਪਨੀ ਲਈ ਰਾਹਤ ਦੀ ਗੱਲ ਇਹ ਹੈ ਕਿ ਇਹ ਨਵਾਂ 4ਜੀ ਨੈਟਵਰਕ 5ਜੀ ਰੈਡੀ (Ready) ਹੈ। 4ਜੀ ਦਾ ਰੋਲਆਊਟ ਪੂਰਾ ਹੁੰਦੇ ਹੀ ਕੰਪਨੀ 5ਜੀ ਕਨੈਕਟੀਵਿਟੀ 'ਤੇ ਕੰਮ ਸ਼ੁਰੂ ਕਰ ਦੇਵੇਗੀ। ਉਮੀਦ ਜਤਾਈ ਜਾ ਰਹੀ ਹੈ ਕਿ ਅਗਲੇ ਸਾਲ ਤੱਕ ਬੀ. ਐੱਸ. ਐੱਨ. ਐੱਲ. ਦੇ ਗਾਹਕਾਂ ਨੂੰ 5ਜੀ ਸੇਵਾਵਾਂ ਦਾ ਤੋਹਫਾ ਵੀ ਮਿਲ ਸਕਦਾ ਹੈ। ਸੂਤਰਾਂ ਅਨੁਸਾਰ, ਬੀ. ਐੱਸ. ਐੱਨ. ਐੱਲ. ਆਪਣੇ ਗਾਹਕਾਂ ਨੂੰ ਬਣਾਈ ਰੱਖਣ ਲਈ ਨਵੇਂ ਸਾਲ ਦੇ ਮੌਕੇ 'ਤੇ ਕਈ ਸਸਤੇ ਪਲਾਨ ਅਤੇ ਆਫਰ ਵੀ ਪੇਸ਼ ਕਰ ਰਹੀ ਹੈ, ਜਿਸ ਵਿੱਚ 100ਜੀ.ਬੀ. ਡੇਟਾ ਵਰਗੀਆਂ ਸਹੂਲਤਾਂ ਸ਼ਾਮਲ ਹਨ।