ਜੀਜੇ ਨੇ ਸੁਪਨੇ ''ਚ ਛੇੜਿਆ, ਹਕੀਕਤ ''ਚ ਹੋ ਗਈ ਕਾਰਵਾਈ ! ਸਾਲੀ ਦੇ ਇਕ ਬਿਆਨ ਨੇ ਬਦਲਿਆ ਪੂਰਾ ਕੇਸ

ਨੈਸ਼ਨਲ ਡੈਸਕ : ਉੱਤਰ ਪ੍ਰਦੇਸ਼ ਦੇ ਕਾਨਪੁਰ ਵਿੱਚ ਇੱਕ ਬਹੁਤ ਹੀ ਹੈਰਾਨੀਜਨਕ ਕਾਨੂੰਨੀ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਏਅਰਫੋਰਸ ਕਰਮੀ ਨੂੰ ਆਪਣੀ ਨਾਬਾਲਗ ਸਾਲੀ ਨਾਲ ਛੇੜਛਾੜ ਦੇ ਦੋਸ਼ਾਂ ਤੋਂ 7 ਸਾਲ ਬਾਅਦ ਬਰੀ ਕਰ ਦਿੱਤਾ ਗਿਆ ਹੈ। ਇਸ ਮਾਮਲੇ ਵਿੱਚ ਸਭ ਤੋਂ ਅਜੀਬ ਗੱਲ ਇਹ ਰਹੀ ਕਿ ਪੀੜਤਾ (ਸਾਲੀ) ਨੇ ਅਦਾਲਤ ਵਿੱਚ ਬਿਆਨ ਦਿੱਤਾ ਕਿ ਉਸ ਨਾਲ ਛੇੜਛਾੜ ਹਕੀਕਤ ਵਿੱਚ ਨਹੀਂ, ਸਗੋਂ ਸੁਪਨੇ ਵਿੱਚ ਹੋਈ ਸੀ।
ਭਾਰਤੀ ਹਵਾਈ ਸੈਨਾ ਵਿੱਚ ਤਾਇਨਾਤ ਅਨੁਰਾਗ ਸ਼ੁਕਲਾ ਨੂੰ ਆਪਣੀ ਸਾਲੀ ਵਲੋਂ ਲਗਾਏ ਗਏ ਛੇੜਛਾੜ ਦੇ ਗੰਭੀਰ ਦੋਸ਼ਾਂ ਕਾਰਨ ਪਿਛਲੇ 7 ਸਾਲਾਂ ਤੋਂ ਕਾਨੂੰਨੀ ਜੰਗ ਲੜਨੀ ਪਈ। ਇਸ ਦੌਰਾਨ ਉਸ ਨੂੰ 19 ਦਿਨ ਜੇਲ੍ਹ ਵੀ ਕੱਟਣੀ ਪਈ ਅਤੇ ਸਮਾਜਿਕ ਬੇਇੱਜ਼ਤੀ ਦੇ ਨਾਲ-ਨਾਲ ਉਸ ਦੀ ਨੌਕਰੀ ਵਿੱਚ ਪ੍ਰਮੋਸ਼ਨ ਵੀ ਰੁਕ ਗਈ। ਪੁਲਸ ਨੇ ਇਸ ਮਾਮਲੇ ਵਿੱਚ ਅਕਤੂਬਰ 2019 ਵਿੱਚ ਚਾਰਜਸ਼ੀਟ ਦਾਇਰ ਕੀਤੀ ਸੀ, ਜਿਸ ਵਿੱਚ ਕੁੱਟਮਾਰ, ਬਦਨਾਮੀ ਅਤੇ ਲੈਂਗਿਕ ਹਮਲੇ ਵਰਗੇ ਦੋਸ਼ ਸ਼ਾਮਲ ਸਨ।

ਸੁਪਨੇ ਅਤੇ ਹਕੀਕਤ ਦਾ ਭੁਲੇਖਾ
ਟ੍ਰਾਇਲ ਦੌਰਾਨ ਦਸੰਬਰ 2021 ਵਿੱਚ ਸਾਲੀ ਨੇ ਅਦਾਲਤ ਵਿੱਚ ਆਪਣਾ ਬਿਆਨ ਦਰਜ ਕਰਵਾਉਂਦੇ ਹੋਏ ਇੱਕ ਵੱਡਾ ਖੁਲਾਸਾ ਕੀਤਾ। ਉਸ ਨੇ ਕਿਹਾ, "ਮੈਂ ਐਂਟੀਬਾਇਓਟਿਕ ਦਵਾਈ ਲੈ ਕੇ ਸੁੱਤੀ ਹੋਈ ਸੀ। ਦਵਾਈ ਨਸ਼ੀਲੀ ਹੋਣ ਕਾਰਨ ਮੈਂ ਅੱਧੀ ਨੀਂਦ ਵਿੱਚ ਸੀ। ਮੈਨੂੰ ਸੁਪਨੇ ਵਿੱਚ ਮਹਿਸੂਸ ਹੋਇਆ ਕਿ ਜੀਜਾ ਜੀ ਨੇ ਮੈਨੂੰ ਛੇੜਿਆ ਹੈ, ਜਿਸ ਤੋਂ ਬਾਅਦ ਮੈਂ ਰੌਲਾ ਪਾ ਦਿੱਤਾ"। ਉਸ ਨੇ ਸਪੱਸ਼ਟ ਕੀਤਾ ਕਿ ਅਸਲ ਵਿੱਚ ਕੋਈ ਛੇੜਛਾੜ ਨਹੀਂ ਹੋਈ ਸੀ, ਸਗੋਂ ਉਸ ਨੂੰ ਭਰਮ ਹੋ ਗਿਆ ਸੀ। ਪੀੜਤਾ ਦੇ ਪਿਤਾ ਅਤੇ ਵੱਡੀ ਭੈਣ ਨੇ ਵੀ ਅਦਾਲਤ ਵਿੱਚ ਸਵੀਕਾਰ ਕੀਤਾ ਕਿ ਇਹ ਸਾਰਾ ਮਾਮਲਾ ਸਿਰਫ ਇੱਕ ਭੁਲੇਖੇ ਕਾਰਨ ਦਰਜ ਹੋਇਆ ਸੀ।
 ਦੂਜੇ ਪਾਸੇ, ਬਰੀ ਹੋਏ ਅਨੁਰਾਗ ਸ਼ੁਕਲਾ ਨੇ ਦੱਸਿਆ ਕਿ ਵਿਆਹ ਦੇ 10 ਦਿਨਾਂ ਬਾਅਦ ਹੀ ਉਸ ਦੇ ਸਹੁਰੇ ਨੇ ਉਸ 'ਤੇ ਜਾਇਦਾਦ ਆਪਣੀ ਪਤਨੀ ਅਤੇ ਸਾਲੀ ਦੇ ਨਾਮ ਕਰਨ ਦਾ ਦਬਾਅ ਪਾਇਆ ਸੀ। ਜਦੋਂ ਉਸ ਨੇ ਮਨ੍ਹਾ ਕੀਤਾ ਤਾਂ ਉਸ ਖ਼ਿਲਾਫ਼ ਇਹ ਝੂਠਾ ਕੇਸ ਦਰਜ ਕਰਵਾ ਦਿੱਤਾ ਗਿਆ। ਕਾਨਪੁਰ ਦੀ ਪਾਕਸੋ (POCSO) ਅਦਾਲਤ ਨੇ ਸਾਲੀ ਦੇ ਯੂ-ਟਰਨ ਅਤੇ ਪਰਿਵਾਰ ਦੇ ਬਿਆਨਾਂ ਦੇ ਆਧਾਰ 'ਤੇ ਅਨੁਰਾਗ ਨੂੰ ਸਾਰੇ ਦੋਸ਼ਾਂ ਤੋਂ ਸਨਮਾਨ ਸਹਿਤ ਬਰੀ ਕਰ ਦਿੱਤਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e