ਜੈਪੁਰ ''ਚ ਲਾਪਤਾ ਹੋਏ 2 ਜਾਪਾਨੀ ਸੈਲਾਨੀ ਸਿੱਧਾ ਪਹੁੰਚੇ ਆਪਣੇ ਦੇਸ਼; ਹੈਰਾਨ ਕਰੇਗਾ ਮਾਮਲਾ

ਨੈਸ਼ਨਲ ਡੈਸਕ : ਰਾਜਸਥਾਨ ਦੀ ਰਾਜਧਾਨੀ ਜੈਪੁਰ ਵਿੱਚ ਘੁੰਮਣ ਆਏ ਦੋ ਜਾਪਾਨੀ ਸੈਲਾਨੀਆਂ ਦੇ ਰਹੱਸਮਈ ਢੰਗ ਨਾਲ ਲਾਪਤਾ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪੁਲਸ ਦੀ ਜਾਂਚ ਵਿੱਚ ਇੱਕ ਹੈਰਾਨੀਜਨਕ ਖੁਲਾਸਾ ਹੋਇਆ ਹੈ ਕਿ ਲਾਪਤਾ ਹੋਏ ਦੋਵੇਂ ਸੈਲਾਨੀ ਸੁਰੱਖਿਅਤ ਆਪਣੇ ਦੇਸ਼ ਜਾਪਾਨ ਪਹੁੰਚ ਗਏ ਹਨ। ਜੈਪੁਰ ਪੁਲਸ ਨੇ ਜਾਪਾਨੀ ਦੂਤਾਵਾਸ ਨਾਲ ਸੰਪਰਕ ਕਰਨ ਤੋਂ ਬਾਅਦ ਸੁੱਖ ਦਾ ਸਾਹ ਲਿਆ ਹੈ।

ਟੈਕਸੀ ਡਰਾਈਵਰ ਨੇ ਦਰਜ ਕਰਵਾਈ ਸੀ ਸ਼ਿਕਾਇਤ
ਡੀਸੀਪੀ ਜੈਪੁਰ ਸਾਊਥ ਰਾਜਰਸ਼ੀ ਰਾਜ ਨੇ ਦੱਸਿਆ ਕਿ ਦੋਵੇਂ ਸੈਲਾਨੀ ਦਿੱਲੀ ਤੋਂ ਟੈਕਸੀ ਰਾਹੀਂ ਜੈਪੁਰ ਪਹੁੰਚੇ ਸਨ। ਸੈਲਾਨੀਆਂ ਦੀ ਪਛਾਣ ਹਿਬਿੱਕੀ ਸ਼ਿੱਬਾ ਅਤੇ ਯੂਮਾ ਵਜੋਂ ਹੋਈ ਹੈ। ਉਹ 7 ਫਰਵਰੀ ਨੂੰ ਜੈਪੁਰ ਆਏ ਸਨ ਅਤੇ ਬ੍ਰਹਮਪੁਰੀ ਸਥਿਤ ਇੱਕ ਹੋਟਲ ਵਿੱਚ ਰੁਕੇ ਸਨ। ਅਸ਼ੋਕ ਨਗਰ ਇਲਾਕੇ ਦੇ ਇੱਕ ਰੈਸਟੋਰੈਂਟ ਵਿੱਚ ਖਾਣਾ ਖਾਣ ਦੀ ਗੱਲ ਕਹਿ ਕੇ ਉਹ ਟੈਕਸੀ ਵਿੱਚੋਂ ਉਤਰੇ, ਪਰ ਵਾਪਸ ਨਹੀਂ ਪਰਤੇ। ਟੈਕਸੀ ਡਰਾਈਵਰ ਨੇ ਉਨ੍ਹਾਂ ਦੀ ਕਾਫੀ ਤਲਾਸ਼ ਕੀਤੀ ਅਤੇ ਅਖੀਰ ਅਸ਼ੋਕ ਨਗਰ ਥਾਣੇ ਵਿੱਚ ਉਨ੍ਹਾਂ ਦੀ ਗੁੰਮਸ਼ੁਦਗੀ ਦੀ ਰਿਪੋਰਟ ਦਰਜ ਕਰਵਾਈ।

ਸਾਮਾਨ ਟੈਕਸੀ ਵਿੱਚ ਹੀ ਛੱਡ ਕੇ ਹੋਏ ਫ਼ਰਾਰ 
ਹੈਰਾਨੀ ਦੀ ਗੱਲ ਇਹ ਸੀ ਕਿ ਦੋਵੇਂ ਸੈਲਾਨੀ ਆਪਣਾ ਸਾਰਾ ਸਾਮਾਨ (ਲਗੇਜ) ਟੈਕਸੀ ਵਿੱਚ ਹੀ ਛੱਡ ਗਏ ਸਨ, ਜਿਸ ਨੂੰ ਪੁਲਸ ਨੇ ਆਪਣੀ ਕਸਟਡੀ ਵਿੱਚ ਲੈ ਲਿਆ ਹੈ। ਪੁਲਸ ਨੇ ਜਦੋਂ ਇਲਾਕੇ ਦੇ ਸੀਸੀਟੀਵੀ (CCTV) ਫੁਟੇਜ ਖੰਗਾਲੇ ਤਾਂ ਪਤਾ ਲੱਗਾ ਕਿ ਉਹ ਰੈਸਟੋਰੈਂਟ ਵਿੱਚ ਦਾਖਲ ਹੋਣ ਦੇ ਮਹਿਜ਼ 5 ਮਿੰਟ ਬਾਅਦ ਹੀ ਬਾਹਰ ਨਿਕਲ ਆਏ ਅਤੇ ਪੈਦਲ ਹੀ ਚਲੇ ਗਏ।

ਦੂਤਾਵਾਸ ਤੋਂ ਹੋਈ ਸੁਰੱਖਿਅਤ ਹੋਣ ਦੀ ਪੁਸ਼ਟੀ 
ਜਦੋਂ ਪੁਲਸ ਨੇ ਇਸ ਮਾਮਲੇ ਸਬੰਧੀ ਜਾਪਾਨੀ ਦੂਤਾਵਾਸ ਨਾਲ ਸੰਪਰਕ ਕੀਤਾ, ਤਾਂ ਪਤਾ ਲੱਗਾ ਕਿ ਦੋਵੇਂ ਸੈਲਾਨੀ ਸੁਰੱਖਿਅਤ ਆਪਣੇ ਦੇਸ਼ ਪਹੁੰਚ ਚੁੱਕੇ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਉਨ੍ਹਾਂ ਨੇ ਜੈਪੁਰ ਵਿੱਚ ਦੋ ਰਾਤਾਂ ਰੁਕਣ ਤੋਂ ਬਾਅਦ ਰਣਥੰਭੌਰ ਨੈਸ਼ਨਲ ਪਾਰਕ ਜਾਣ ਦੀ ਯੋਜਨਾ ਬਣਾਈ ਸੀ, ਪਰ ਉਹ ਅਚਾਨਕ ਹੀ ਵਾਪਸ ਚਲੇ ਗਏ। ਫਿਲਹਾਲ ਪੁਲਸ ਇਸ ਗੱਲ ਦੀ ਜਾਂਚ ਕਰ ਰਹੀ ਹੈ ਕਿ ਉਨ੍ਹਾਂ ਨੇ ਅਜਿਹਾ ਕਿਉਂ ਕੀਤਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e