ਜੰਮੂ ਕਸ਼ਮੀਰ ''ਚ ਅੱਤਵਾਦੀ ਘਟਨਾਵਾਂ ''ਚ ਆਈ 168 ਫੀਸਦੀ ਕਮੀ : ਅਨੁਰਾਗ ਠਾਕੁਰ

ਨਵੀਂ ਦਿੱਲੀ (ਭਾਸ਼ਾ)- ਕੇਂਦਰੀ ਮੰਤਰੀ ਅਨੁਰਾਗ ਠਾਕੁਰ ਨੇ ਸੋਮਵਾਰ ਨੂੰ ਕਿਹਾ ਕਿ ਮੋਦੀ ਸਰਕਾਰ ਦੇ ਸੱਤਾ 'ਚ ਆਉਣ ਤੋਂ ਬਾਅਦ ਜੰਮੂ-ਕਸ਼ਮੀਰ 'ਚ ਅੱਤਵਾਦੀ ਘਟਨਾਵਾਂ 'ਚ 168 ਫੀਸਦੀ ਕਮੀ ਆਈ ਹੈ ਅਤੇ 2015 ਦੇ ਬਾਅਦ ਤੋਂ ਖੱਬੇ ਪੱਖੀ ਅੱਤਵਾਦ ਦੀਆਂ ਘਟਨਾਵਾਂ 'ਚ 265 ਫੀਸਦੀ ਤੋਂ ਵੱਧ ਦੀ ਕਮੀ ਆਈ ਹੈ। ਠਾਕੁਰ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਸਰਕਾਰ ਦੀ 'ਅੱਤਵਾਦ ਪ੍ਰਤੀ ਜ਼ੀਰੋ-ਟੌਲਰੈਂਸ ਨੀਤੀ' ਹੈ। ਉਨ੍ਹਾਂ ਕਿਹਾ,“ਸਰਕਾਰ ਨੇ ਨਿਰਣਾਇਕ ਕਾਰਵਾਈ ਕੀਤੀ ਜਿਸ ਦੇ ਠੋਸ ਨਤੀਜੇ ਸਾਹਮਣੇ ਆਏ।” ਠਾਕੁਰ ਨੇ ਇੱਥੇ ਪੱਤਰਕਾਰਾਂ ਨੂੰ ਕਿਹਾ,“2016 'ਚ ਸਰਜੀਕਲ ਸਟ੍ਰਾਈਕ ਉੜੀ ਹਮਲੇ ਦੇ ਜਵਾਬ 'ਚ ਕੀਤੀ ਗਈ ਸੀ। 2019 'ਚ ਬਾਲਾਕੋਟ ਹਵਾਈ ਹਮਲੇ ਪੁਲਵਾਮਾ ਬੰਬ ਧਮਾਕੇ ਦੇ ਜਵਾਬ 'ਚ ਕੀਤੇ ਗਏ ਸਨ, ਇਸ ਲਈ ਇਨ੍ਹਾਂ ਸਾਰੀਆਂ ਨਿਰਣਾਇਕ ਕਾਰਵਾਈਆਂ ਦੇ ਠੋਸ ਨਤੀਜੇ ਸਾਹਮਣੇ ਆਏ ਹਨ।''

ਉਨ੍ਹਾਂ ਕਿਹਾ 2014 ਤੋਂ ਬਾਅਦ ਅੱਤਵਾਦ ਕਾਰਨ ਹਿੰਸਾ 'ਚ 80 ਫੀਸਦੀ ਦੀ ਕਮੀ ਆਈ, ਗੈਰ-ਫ਼ੌਜੀ ਨਾਗਰਿਕਾਂ ਦੀ ਮੌਤ 'ਚ 89 ਫੀਸਦੀ ਦੀ ਕਮੀ ਆਈ ਅਤੇ 6 ਹਜ਼ਾਰ ਅੱਤਵਾਦੀਆਂ ਨੇ ਆਤਮਸਮਰਪਣ ਕੀਤਾ। ਕੇਂਦਰੀ ਮੰਤਰੀ ਨੇ ਕਿਹਾ,''ਜੰਮੂ ਕਸ਼ਮੀਰ 'ਚ ਮੋਦੀ ਸਰਕਾਰ ਦੇ ਅਧੀਨ ਅੱਤਵਾਦੀ ਘਟਨਾਵਾਂ 'ਚ 168 ਫੀਸਦੀ ਦੀ ਕਮੀ ਆਈ ਅਤੇ ਅੱਤਵਾਦ ਦੇ ਵਿੱਤ ਪੋਸ਼ਣ ਨਾਲ ਜੁੜੇ ਮਾਮਲਿਆਂ 'ਚ ਦੋਸ਼ ਸਿੱਧੀ ਦਰ 94 ਫੀਸਦੀ ਤੋਂ ਵੱਧ ਹੈ।'' ਉਨ੍ਹਾਂ ਕਿਹਾ ਕਿ ਖੱਬੇ ਪੱਖੀ ਅੱਤਵਾਦ ਦੀਆਂ ਘਟਨਾਵਾਂ 'ਚ 2015 ਤੋਂ ਲੈ ਕੇ ਇਸ ਸਾਲ ਜੂਨ 2022 ਤੱਕ 265 ਫੀਸਦੀ ਤੋਂ ਵੱਧ ਦੀ ਕਮੀ ਆਈ ਹੈ। ਠਾਕੁਰ ਨੇ ਕਿਹਾ,''ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ 'ਚ ਪੂਰਬ-ਉੱਤਰ ਖੇਤਰ 'ਚ ਸ਼ਾਂਤੀ ਦਾ ਯੁੱਗ ਸ਼ੁਰੂ ਹੋ ਗਿਆ ਹੈ।''