ਬਾਰਿਸ਼ ਬਣੀ ਆਫਤ, ਪਿਛਲੇ 24 ਘੰਟਿਆਂ ''ਚ 15 ਲੋਕਾਂ ਦੀ ਮੌਤ

ਲਖਨਊ — ਉੱਤਰ ਪ੍ਰਦੇਸ਼ 'ਚ ਪਿਛਲੇ 24 ਘੰਟਿਆਂ 'ਚ ਮੀਂਹ ਨਾਲ ਹੋਣ ਵਾਲੀਆਂ ਘਟਨਾਵਾਂ ਸਮੇਤ ਵੱਖ-ਵੱਖ ਆਫਤਾਂ 'ਚ 15 ਲੋਕਾਂ ਦੀ ਮੌਤ ਹੋ ਗਈ। ਇਕ ਅਧਿਕਾਰੀ ਨੇ ਬੁੱਧਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਰਾਹਤ ਕਮਿਸ਼ਨਰ ਨੇ ਬੁੱਧਵਾਰ ਨੂੰ ਇੱਥੇ ਦੱਸਿਆ ਕਿ ਮੰਗਲਵਾਰ ਸ਼ਾਮ 6 ਵਜੇ ਤੋਂ ਬੁੱਧਵਾਰ ਨੂੰ ਇਸੇ ਸਮੇਂ ਤੱਕ 15 ਲੋਕਾਂ ਦੀ ਮੌਤ ਹੋ ਗਈ, ਜਿਨ੍ਹਾਂ ਵਿੱਚ ਚੰਦੌਲੀ ਵਿੱਚ ਚਾਰ, ਬਾਂਦਾ ਅਤੇ ਗੌਤਮ ਬੁੱਧ ਨਗਰ ਵਿੱਚ ਤਿੰਨ-ਤਿੰਨ, ਪ੍ਰਯਾਗਰਾਜ ਵਿੱਚ ਦੋ, ਪ੍ਰਤਾਪਗੜ੍ਹ, ਗੋਂਡਾ ਅਤੇ ਇਟਾਵਾ ਵਿੱਚ ਇੱਕ-ਇੱਕ ਵਿਅਕਤੀ ਸ਼ਾਮਲ ਹੈ।

ਰਾਹਤ ਕਮਿਸ਼ਨਰ ਦੀ ਰਿਪੋਰਟ ਅਨੁਸਾਰ ਇਹ ਮੌਤਾਂ ਮੀਂਹ ਨਾਲ ਸਬੰਧਤ ਘਟਨਾਵਾਂ ਜਿਵੇਂ ਕਿ ਬਿਜਲੀ ਡਿੱਗਣ, ਡੁੱਬਣ ਅਤੇ ਸੱਪ ਦੇ ਡੱਸਣ ਕਾਰਨ ਹੋਈਆਂ ਹਨ। ਸਿੰਚਾਈ ਵਿਭਾਗ ਦੀ ਰਿਪੋਰਟ ਮੁਤਾਬਕ ਬਦਾਯੂੰ ਦੇ ਕਚਲਾ ਪੁਲ 'ਤੇ ਗੰਗਾ ਨਦੀ ਖ਼ਤਰੇ ਦੇ ਨਿਸ਼ਾਨ ਤੋਂ ਉੱਪਰ ਵਹਿ ਰਹੀ ਹੈ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਇਸ ਸਮੇਂ ਰਾਜ ਵਿੱਚ ਸਿਰਫ਼ ਸੱਤ ਜ਼ਿਲ੍ਹੇ (ਕੁੱਲ 75 ਵਿੱਚੋਂ) ਅਯੁੱਧਿਆ, ਬਲੀਆ, ਲਖੀਮਪੁਰ ਖੇੜੀ, ਫਾਰੂਖਾਬਾਦ, ਸੀਤਾਪੁਰ, ਬਹਰਾਇਚ ਅਤੇ ਹਰਦੋਈ ਹੜ੍ਹ ਪ੍ਰਭਾਵਿਤ ਹਨ। ਰਿਪੋਰਟ ਮੁਤਾਬਕ ਹੜ੍ਹ ਪ੍ਰਭਾਵਿਤ ਜ਼ਿਲ੍ਹਿਆਂ 'ਚ ਰਾਹਤ ਅਤੇ ਬਚਾਅ ਕੰਮ ਜਾਰੀ ਹੈ।