'ਜੇਕਰ ਘਰ ਨਾਲ ਮੋਹ ਹੁੰਦਾ ਤਾਂ 3 ਦਿਨਾਂ 'ਚ ਖਾਲੀ ਨਾ ਕਰਦਾ' CM ਹਾਊਸ ਵਿਵਾਦ 'ਤੇ ਬੋਲੇ ਕੇਜਰੀਵਾਲ
Saturday, Dec 14, 2024 - 12:09 AM (IST)
ਨਵੀਂ ਦਿੱਲੀ : ਦਿੱਲੀ 'ਚ ਕਰਵਾਏ ਇਕ ਪ੍ਰੋਗਰਾਮ ਦੌਰਾਨ ਅਰਵਿੰਦ ਕੇਜਰੀਵਾਲ ਨੇ ਆਪਣੇ ਉੱਪਰ ਲੱਗ ਰਹੇ ਕਈ ਦੋਸ਼ਾਂ ਅਤੇ ਉਨ੍ਹਾਂ ਸਾਰੇ ਮੁੱਦਿਆਂ 'ਤੇ ਖੁੱਲ੍ਹ ਕੇ ਆਪਣੇ ਵਿਚਾਰ ਪ੍ਰਗਟ ਕੀਤੇ, ਜਿਨ੍ਹਾਂ 'ਤੇ ਉਹ ਅਕਸਰ ਘਿਰੇ ਰਹਿੰਦੇ ਹਨ। ਉਨ੍ਹਾਂ ਨੇ ਸੀਐੱਮ ਹਾਊਸ ਵਿਚ ਮਹਿੰਗੇ ਪਰਦੇ ਅਤੇ ਟਾਈਲਾਂ ਲਗਾਉਣ ਦੀ ਚਰਚਾ 'ਤੇ ਵੀ ਵਿਰਾਮ ਲਗਾ ਦਿੱਤਾ।
ਜਦੋਂ ਅਰਵਿੰਦ ਕੇਜਰੀਵਾਲ ਨੂੰ ਪੁੱਛਿਆ ਗਿਆ ਕਿ ਦਿੱਲੀ ਦੇ ਸੀਐੱਮ ਹਾਊਸ ਬਾਰੇ ਕਈ ਵੀਡੀਓ ਕਲਿੱਪ ਆਉਂਦੇ ਰਹਿੰਦੇ ਹਨ। ਕਿਹਾ ਜਾਂਦਾ ਹੈ ਕਿ ਜਿਸ ਘਰ ਵਿਚ ਤੁਸੀਂ ਰਹਿੰਦੇ ਸੀ, ਇਸ ਵਿਚ ਸਿਰਫ 10 ਲੱਖ ਰੁਪਏ ਦੇ ਪਰਦੇ ਸਨ। ਇਸ 'ਤੇ ਸਾਬਕਾ ਮੁੱਖ ਮੰਤਰੀ ਨੇ ਬੜੇ ਹੀ ਸਹਿਜ ਤਰੀਕੇ ਨਾਲ ਜਵਾਬ ਦਿੱਤਾ। ਉਨ੍ਹਾਂ ਕਿਹਾ ਕਿ ਮੇਰਾ ਉਸ ਘਰ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ।
'ਮੋਹ ਰਹਿੰਦਾ ਤਾਂ ਕੁਝ ਦਿਨ ਸੀਐੱਮ ਹਾਊਸ 'ਚ ਜ਼ਰੂਰ ਰਹਿੰਦਾ'
ਅਰਵਿੰਦ ਕੇਜਰੀਵਾਲ ਨੇ ਕਿਹਾ ਕਿ ਮੈਂ ਜੇਲ੍ਹ ਗਿਆ ਅਤੇ ਉੱਥੇ ਬਹੁਤ ਔਖੀ ਜ਼ਿੰਦਗੀ ਬਤੀਤ ਕੀਤੀ, ਮੈਂ 6 ਮਹੀਨੇ ਕਾਲ ਕੋਠੜੀ ਦੇ ਅੰਦਰ ਰਿਹਾ। ਜੇ ਮੈਨੂੰ ਉਹ ਘਰ ਪਿਆਰਾ ਹੁੰਦਾ ਤਾਂ ਮੈਂ ਜੇਲ੍ਹ ਤੋਂ ਵਾਪਸ ਆ ਕੇ ਘੱਟੋ-ਘੱਟ ਦੋ-ਤਿੰਨ ਮਹੀਨੇ ਉੱਥੇ ਜ਼ਰੂਰ ਰਹਿੰਦਾ। ਵਾਪਸ ਆਉਣ ਤੋਂ ਤੁਰੰਤ ਬਾਅਦ ਮੈਂ ਅਸਤੀਫਾ ਦੇ ਦਿੱਤਾ ਅਤੇ ਫਿਰ ਤਿੰਨ ਦਿਨਾਂ ਦੇ ਅੰਦਰ ਘਰ ਖਾਲੀ ਕਰ ਦਿੱਤਾ।
ਇਹ ਵੀ ਪੜ੍ਹੋ : ਪੇਕੇ ਘਰ ਤੋਂ ਸਹੁਰੇ ਆਈ ਪਤਨੀ ਨੂੰ ਪਤੀ ਨੇ ਮਾਰੀ ਗੋਲੀ, 23 ਸਾਲਾਂ ਤੋਂ ਚੱਲ ਰਿਹਾ ਸੀ ਝਗੜਾ
ਜਿਹੜਾ ਵੀ ਮੁੱਖ ਮੰਤਰੀ ਬਣੇਗਾ, ਉਸ ਘਰ 'ਚ ਰਹੇਗਾ...
ਦਿੱਲੀ ਦੇ ਸਾਬਕਾ ਸੀਐੱਮ ਨੇ ਕਿਹਾ ਕਿ ਜਦੋਂ ਮੈਂ ਸੀਐੱਮ ਸੀ ਤਾਂ ਸੀਐੱਮ ਦੇ ਘਰ ਰਹਿੰਦਾ ਸੀ। ਕੱਲ੍ਹ ਜੋ ਵੀ ਦਿੱਲੀ ਦਾ ਮੁੱਖ ਮੰਤਰੀ ਬਣੇਗਾ, ਉਹ ਉਸੇ ਘਰ ਵਿਚ ਰਹੇਗਾ। ਜਦੋਂ ਮੈਂ ਇਕ ਕਾਰਕੁਨ ਸੀ, ਮੈਂ ਦਿੱਲੀ ਦੀਆਂ ਝੁੱਗੀਆਂ ਵਿਚ ਰਹਿੰਦਾ ਸੀ। ਅੱਜ ਮੈਂ ਰਾਸ਼ਟਰੀ ਕਨਵੀਨਰ ਹਾਂ। ਹੁਣ ਕੌਮੀ ਕਨਵੀਨਰ ਵਜੋਂ ਕੇਂਦਰ ਸਰਕਾਰ ਵੱਲੋਂ ਦਿੱਤੇ ਗਏ ਘਰ ਵਿਚ ਹੀ ਰਹਾਂਗਾ। ਪ੍ਰਮਾਤਮਾ ਨੇ ਜੋ ਵੀ ਜ਼ਿੰਮੇਵਾਰੀ ਮੈਨੂੰ ਜੀਵਨ ਵਿਚ ਦਿੱਤੀ ਹੈ, ਉਸ ਅਨੁਸਾਰ ਜੋ ਘਰ ਮੈਨੂੰ ਮਿਲਿਆ ਹੈ, ਉਸ ਵਿਚ ਰਹਿ ਰਿਹਾ ਹਾਂ।
'ਮੁੱਖ ਮੁੱਦੇ ਤੋਂ ਧਿਆਨ ਭਟਕਾਉਣਾ ਚਾਹੁੰਦੇ ਹਨ ਕੁਝ ਲੋਕ'
ਅਰਵਿੰਦ ਕੇਜਰੀਵਾਲ ਨੇ ਅੱਗੇ ਕਿਹਾ ਕਿ ਸਾਨੂੰ ਸੋਚਣਾ ਹੋਵੇਗਾ ਕਿ ਇਹ ਲੋਕ ਇਹ ਮੁੱਦਾ ਕਿਉਂ ਉਠਾ ਰਹੇ ਹਨ। ਜਦੋਂ ਤੋਂ ਮੈਂ ਦਿੱਲੀ ਵਿਚ ਕਾਨੂੰਨ ਵਿਵਸਥਾ ਦਾ ਮੁੱਦਾ ਜ਼ੋਰ-ਸ਼ੋਰ ਨਾਲ ਉਠਾਉਣਾ ਸ਼ੁਰੂ ਕੀਤਾ ਹੈ। ਜਦੋਂ ਤੋਂ ਮੈਂ ਕਹਿਣਾ ਸ਼ੁਰੂ ਕੀਤਾ ਹੈ ਕਿ ਦਿੱਲੀ ਵਿਚ ਗੈਂਗਸਟਰ ਰਾਜ ਹੈ, ਦਿੱਲੀ ਵਿਚ ਔਰਤਾਂ ਸੁਰੱਖਿਅਤ ਨਹੀਂ ਹਨ। ਦਿੱਲੀ ਵਿਚ ਕਾਰੋਬਾਰੀਆਂ ਤੋਂ ਜਬਰੀ ਵਸੂਲੀ ਦੀ ਮੰਗ ਕੀਤੀ ਜਾ ਰਹੀ ਹੈ, ਉਨ੍ਹਾਂ ਨੂੰ ਫਿਰੌਤੀ ਦੀਆਂ ਕਾਲਾਂ ਆ ਰਹੀਆਂ ਹਨ, ਉਦੋਂ ਤੋਂ ਧਿਆਨ ਭਟਕਾਉਣ ਲਈ ਉਨ੍ਹਾਂ ਨੇ ਸੀਐੱਮ ਹਾਊਸ ਦਾ ਮੁੱਦਾ ਉਠਾਉਣਾ ਸ਼ੁਰੂ ਕਰ ਦਿੱਤਾ ਹੈ।
ਇਹ ਵੀ ਪੜ੍ਹੋ : ਝਾਂਸੀ 'ਚ NIA ਟੀਮ 'ਤੇ ਹਮਲਾ ਕਰਨ ਦੇ ਦੋਸ਼ 'ਚ 111 ਲੋਕਾਂ ਖ਼ਿਲਾਫ਼ ਮੁਕੱਦਮਾ ਦਰਜ
'ਉਸ ਘਰ ਨੂੰ ਮੈਂ ਨਹੀਂ, ਪੀਡਬਲਯੂਡੀ ਨੇ ਬਣਾਇਆ ਸੀ'
ਕੇਜਰੀਵਾਲ ਨੇ ਕਿਹਾ ਕਿ ਇਸ ਸਮੁੱਚੀ ਚੋਣ 'ਚ ਇਹ ਲੋਕ ਸਿਰਫ ਇਹੀ ਮੁੱਦਾ ਚੁੱਕਣ ਲੱਗੇ ਹਨ ਕਿ ਕੇਜਰੀਵਾਲ ਇਹ ਜੁੱਤੀ ਪਾਉਂਦਾ ਹੈ, ਇਹ ਕਮੀਜ਼ ਪਹਿਨਦਾ ਹੈ, ਅਜਿਹੇ ਘਰ 'ਚ ਰਹਿੰਦਾ ਹੈ। ਉਨ੍ਹਾਂ ਦਾ ਇੱਕੋ ਇਕ ਮਿਸ਼ਨ ਕੇਜਰੀਵਾਲ ਨੂੰ ਹਟਾਉਣਾ ਹੈ ਅਤੇ ਮੇਰਾ ਇੱਕੋ ਇਕ ਮਿਸ਼ਨ ਹੈ ਦਿੱਲੀ ਨੂੰ ਬਚਾਉਣਾ, ਦਿੱਲੀ ਵਾਸੀਆਂ ਨੂੰ ਬਚਾਉਣਾ। ਉਹ ਸੀਐੱਮ ਦਾ ਘਰ ਹੈ, ਮੈਂ ਥੋੜ੍ਹੇ ਬਣਾਇਆ ਸੀ, ਪੀਡਬਲਯੂਡੀ ਨੇ ਬਣਾਇਆ ਸੀ।'
ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8
