ਵੈੱਬ ਡੈਸਕ - ਗਰਮੀ ਦਾ ਮੌਸਮ ਸ਼ੁਰੂ ਹੁੰਦੇ ਹੀ ਸਿਹਤ ਦੇ ਨਾਲ-ਨਾਲ ਵਾਲਾਂ ਨਾਲ ਜੁੜੀਆਂ ਸਮੱਸਿਆਵਾਂ ਵੀ ਵਧਣ ਲੱਗਦੀਆਂ ਹਨ। ਅਕਸਰ ਦੇਖਿਆ ਜਾਂਦਾ ਹੈ ਕਿ ਗਰਮੀਆਂ 'ਚ ਵਾਲ ਜ਼ਿਆਦਾ ਟੁੱਟਣ ਅਤੇ ਝੜਨ ਲੱਗਦੇ ਹਨ। ਮਾਹਿਰਾਂ ਅਨੁਸਾਰ, ਇਸ ਦੇ ਪਿੱਛੇ ਬਦਲਦਾ ਮੌਸਮ, ਪਸੀਨਾ ਅਤੇ ਤੇਜ਼ ਧੁੱਪ ਮੁੱਖ ਕਾਰਨ ਹਨ। 

ਗਰਮੀਆਂ 'ਚ ਵਾਲ ਝੜਨ ਦੇ ਮੁੱਖ ਕਾਰਨ :-

ਪਸੀਨਾ ਅਤੇ ਇਨਫੈਕਸ਼ਨ
- ਗਰਮੀ ਕਾਰਨ ਸਿਰ 'ਚ ਬਹੁਤ ਜ਼ਿਆਦਾ ਪਸੀਨਾ ਆਉਂਦਾ ਹੈ। ਜੇਕਰ ਸਿਰ ਨੂੰ ਨਿਯਮਿਤ ਤੌਰ 'ਤੇ ਸਾਫ਼ ਨਾ ਕੀਤਾ ਜਾਵੇ, ਤਾਂ ਪਸੀਨੇ ਕਾਰਨ ਧੂੜ-ਮਿੱਟੀ ਜੰਮ ਜਾਂਦੀ ਹੈ, ਜਿਸ ਨਾਲ ਫੰਗਲ ਇਨਫੈਕਸ਼ਨ ਹੋ ਸਕਦੀ ਹੈ ਅਤੇ ਵਾਲਾਂ ਦੀਆਂ ਜੜ੍ਹਾਂ ਕਮਜ਼ੋਰ ਹੋ ਜਾਂਦੀਆਂ ਹਨ।

ਸੂਰਜ ਦੀਆਂ ਤੇਜ਼ ਕਿਰਨਾਂ
- ਤੇਜ਼ ਧੁੱਪ ਵਾਲਾਂ ਦੀ ਨਮੀ ਖ਼ਤਮ ਕਰ ਦਿੰਦੀ ਹੈ। ਇਸ ਨਾਲ ਵਾਲ ਖੁਸ਼ਕ, ਬੇਜਾਨ ਅਤੇ ਦੋ-ਮੂੰਹੇ ਹੋ ਕੇ ਟੁੱਟਣ ਲੱਗਦੇ ਹਨ।

ਸਰੀਰ 'ਚ ਪਾਣੀ ਦੀ ਕਮੀ
- ਗਰਮੀਆਂ 'ਚ ਡੀਹਾਈਡ੍ਰੇਸ਼ਨ (ਪਾਣੀ ਦੀ ਕਮੀ) ਕਾਰਨ ਵਾਲਾਂ ਨੂੰ ਲੋੜੀਂਦਾ ਪੋਸ਼ਣ ਨਹੀਂ ਮਿਲਦਾ, ਜਿਸ ਕਾਰਨ ਉਹ ਕਮਜ਼ੋਰ ਹੋ ਜਾਂਦੇ ਹਨ।

ਕਲੋਰੀਨ ਵਾਲਾ ਪਾਣੀ
- ਗਰਮੀਆਂ 'ਚ ਲੋਕ ਅਕਸਰ ਸਵੀਮਿੰਗ ਪੂਲ ਦਾ ਆਨੰਦ ਲੈਂਦੇ ਹਨ, ਪਰ ਪੂਲ ਦੇ ਪਾਣੀ 'ਚ ਮੌਜੂਦ ਕਲੋਰੀਨ ਵਾਲਾਂ ਲਈ ਬੇਹੱਦ ਨੁਕਸਾਨਦੇਹ ਹੁੰਦੀ ਹੈ।

ਵਾਲਾਂ ਨੂੰ ਝੜਨ ਤੋਂ ਰੋਕਣ ਲਈ ਕੁਝ ਖ਼ਾਸ ਟਿਪਸ :-

-  ਜਦੋਂ ਵੀ ਧੁੱਪ 'ਚ ਬਾਹਰ ਨਿਕਲੋ, ਵਾਲਾਂ ਨੂੰ ਸਕਾਰਫ਼ ਜਾਂ ਟੋਪੀ ਨਾਲ ਜ਼ਿਆਦਾ ਢੱਕ ਕੇ ਰੱਖੋ।
- ਹਫ਼ਤੇ 'ਚ ਘੱਟੋ-ਘੱਟ 2-3 ਵਾਰ ਹਲਕੇ ਸ਼ੈਂਪੂ ਨਾਲ ਵਾਲ ਜ਼ਰੂਰ ਧੋਵੋ ਤਾਂ ਜੋ ਪਸੀਨਾ ਅਤੇ ਗੰਦਗੀ ਸਾਫ਼ ਹੋ ਸਕੇ।
- ਦਿਨ 'ਚ ਘੱਟੋ-ਘੱਟ 8-10 ਗਲਾਸ ਪਾਣੀ ਪੀਓ ਤਾਂ ਜੋ ਸਰੀਰ ਅਤੇ ਵਾਲ ਹਾਈਡ੍ਰੇਟਿਡ ਰਹਿਣ।
- ਹਫ਼ਤੇ 'ਚ ਇਕ ਵਾਰ ਨਾਰੀਅਲ ਜਾਂ ਜੈਤੂਨ ਦੇ ਤੇਲ ਨਾਲ ਹਲਕੀ ਮਾਲਿਸ਼ ਕਰੋ, ਇਹ ਵਾਲਾਂ ਨੂੰ ਕੁਦਰਤੀ ਨਮੀ ਦਿੰਦਾ ਹੈ।
- ਆਪਣੀ ਡਾਈਟ ਵਿੱਚ ਹਰੀਆਂ ਸਬਜ਼ੀਆਂ, ਫਲ ਅਤੇ ਪ੍ਰੋਟੀਨ ਭਰਪੂਰ ਚੀਜ਼ਾਂ ਸ਼ਾਮਲ ਕਰੋ।