ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ
Tuesday, Aug 14, 2018 - 04:20 PM (IST)
ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ
ਲੱਖਾਂ ਸੂਰਮਿਆਂ ਨੇ ਸੀ ਦਿੱਤੀਆਂ ਸ਼ਹਾਦਤਾ,
ਕਰੋੜਾਂ ਤੱਪੀਆਂ ਨੇ ਸੀ ਕੀਤੀਆਂ ਇਬਾਦਤਾਂ,
ਤਾਂ ਜਾ ਕੇ ਸੀ ਇਹ ਚਮਨ ਅਬਾਦ ਹੋਇਆ,
ਐਵੇਂ ਨਹੀਉਂ ਮੁਲਕ ਆਜ਼ਾਦ ਹੋਇਆ ,
ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ ।
ਲੰਮਾਂ ਸਮਾਂ ਗੁਲਾਮੀ ਦੀਆਂ ਲੱਗੀਆਂ ਜੰਜ਼ੀਰਾਂ ਸੀ,
ਲੱਗਾ ਜਿਵੇਂ ਹੱਥਾਂ ਦੀਆਂ ਮਾੜੀਆਂ ਲਕੀਰਾਂ ਸੀ,
ਸਿੰਜਿਆ ਲਹੂ ਨਾਲ ਥੋਰ ਤਾਂ ਗੁਲਾਬ ਹੋਇਆ,
ਐਵੇਂ ਨਹੀਉਂ ਮੁਲਕ ਆਜ਼ਾਦ ਹੋਇਆ ,
ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ ।
ਐਵੇਂ ਨਹੀਂ ਤਿਰੰਗੇ ਉੱਤੇ ਚੜੇ ਹੋਏ ਰੰਗ ਜੀ,
ਗੁਲਾਮੀ ਨਾਲ ਬਹੁਤ ਲੜੇ ਹੋਏ ਜੰਗ ਜੀ,
ਦੋ ਸੌ ਸਾਲਾਂ ਪਿੱਛੋਂ ਗੁਲਾਮ ਸੀ ਨਬਾਬ ਹੋਇਆ,
ਐਵੇਂ ਨਹੀਉਂ ਮੁਲਕ ਆਜ਼ਾਦ ਹੋਇਆ ,
ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ ।
ਕਿੰਨਿਆਂ ਸੀ ਰੱਸਾ ਫਾਂਸੀ ਵਾਲਾ ਚੁੰਮਿਆਂ,
ਕਿੰਨਿਆਂ ਸੀ ਕਾਲਾ ਪਾਣੀ ਘੁੰਮਿਆਂ,
ਇਹਦਾ ਨਾ ਅਜੇ ਤੀਕ ਹਿਸਾਬ ਹੋਇਆ,
ਐਵੇਂ ਨਹੀਂ ਮੁਲਕ ਆਜ਼ਾਦ ਹੋਇਆ,
ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ ।
ਆਜ਼ਾਦੀ ਨੂੰ ਬਣਾਕੇ ਰੱਖੀਏ ਆਜ਼ਾਦੀ ਬਈ,
ਦੇਸ਼ ਦੀ ਨਾ ਹੋਣ ਦਈਏ ਕਦੀ ਬਰਬਾਦੀ ਬਈ,
ਲੰਮੇ ਅਸਰੇ ਪਿੱਛੋਂ ਪੂਰਾ ਸੀ ਇਹ ਖ਼ਾਬ ਹੋਇਆ,
ਐਵੇਂ ਨਹੀਉਂ ਮੁਲਕ ਆਜ਼ਾਦ ਹੋਇਆ ,
ਐਵੇਂ ਨਹੀਉਂ ਦੇਸ਼ ਆਜ਼ਾਦ ਹੋਇਆ ।
ਆਜ਼ਾਦੀ ਦਿਵਸ ਦੀਆਂ ਸਭ ਨੂੰ ਮੁਬਾਰਕਾਂ,
ਪੂਜਦੇ ਰਹੀਏ ਸ਼ਹੀਦਾਂ ਦੀਆਂ ਸਮਾਰਕਾਂ,
ਅਣਖੀ ਲੋਕਾਂ ਦਾ ਦੇਸ਼ ਸਦਾ ਕਾਮਯਾਬ ਹੋਇਆ,
ਐਵੇਂ ਨਹੀਉਂ ਮੁਲਕ ਆਜ਼ਾਦ ਹੋਇਆ ,
ਐਵੇਂ ਨਹੀ “ਲਾਲਪੁਰੀ'' ਦੇਸ਼ ਆਜ਼ਾਦ ਹੋਇਆ ।
ਰਵਿੰਦਰ ਲਾਲਪੁਰੀ
ਨੂਰਪੁਰ ਬੇਦੀ(ਰੋਪੜ)
ਸੰਪਰਕ-94634-52261
