ਰਿਕਵਰੀ ਏਜੰਟਾਂ ਤੋਂ ਬਚਦਿਆਂ ਕਾਰ ਸਰਹਿੰਦ ਨਹਿਰ ''ਚ ਡਿੱਗੀ, ਸ਼ੀਸ਼ਾ ਤੋੜ ਚਾਲਕ ਨੇ ਬਚਾਈ ਜਾਨ

ਦੋਰਾਹਾ (ਵਿਨਾਇਕ) : ਲੁਧਿਆਣਾ-ਚੰਡੀਗੜ੍ਹ ਦੱਖਣੀ ਬਾਈਪਾਸ ’ਤੇ ਪਿੰਡ ਅਜਨੌਦ ਚੌਕ ਨੇੜੇ ਉਸ ਵੇਲੇ ਹੜਕੰਪ ਮਚ ਗਿਆ ਜਦੋਂ ਬੈਂਕ ਦੇ ਕਥਿਤ ਰਿਕਵਰੀ ਏਜੰਟਾਂ ਤੋਂ ਬਚਣ ਦੀ ਕੋਸ਼ਿਸ਼ ਕਰ ਰਹੇ ਇੱਕ ਨੌਜਵਾਨ ਦੀ ਕਾਰ ਬੇਕਾਬੂ ਹੋ ਕੇ ਸਰਹਿੰਦ ਨਹਿਰ 'ਚ ਜਾ ਡਿੱਗੀ। ਗੱਡੀ ਪਾਣੀ ਵਿੱਚ ਉਲਟ ਜਾਣ ਦੇ ਬਾਵਜੂਦ ਚਾਲਕ ਨੇ ਹਿੰਮਤ ਅਤੇ ਸੂਝਬੂਝ ਨਾਲ ਕਾਰ ਦਾ ਸ਼ੀਸ਼ਾ ਤੋੜ ਕੇ ਆਪਣੀ ਜਾਨ ਬਚਾ ਲਈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ ਗੌਰਵ ਵਰਮਾ ਵਾਸੀ ਪਿੰਡ ਹੇੜੋ ਕਟਾਲਾ (ਨਾਲਾਗੜ੍ਹ) ਹਾਲ ਵਾਸੀ ਧਾਂਦਰਾ ਰੋਡ, ਲੁਧਿਆਣਾ ਆਪਣੀ ਟਾਟਾ ਅਲਟਰੋਜ਼ ਕਾਰ ਰਾਹੀਂ ਦੋਰਾਹਾ ਵੱਲ ਆ ਰਿਹਾ ਸੀ। ਚਾਲਕ ਦੇ ਦੱਸਣ ਅਨੁਸਾਰ ਰਸਤੇ ਵਿੱਚ ਕੁਝ ਵਿਅਕਤੀਆਂ ਨੇ, ਜੋ ਆਪਣੇ ਆਪ ਨੂੰ ਬੈਂਕ ਦੇ ਰਿਕਵਰੀ ਏਜੰਟ ਦੱਸ ਰਹੇ ਸਨ, ਉਸਦੀ ਗੱਡੀ ਨੂੰ ਘੇਰ ਕੇ ਰੋਕਣ ਦੀ ਕੋਸ਼ਿਸ਼ ਕੀਤੀ ਅਤੇ ਸਾਈਡ ’ਤੇ ਲਗਾਉਣ ਲਈ ਕਿਹਾ। ਉਸਨੇ ਦੱਸਿਆ ਕਿ ਇਸ ਤੋਂ ਪਹਿਲਾਂ ਵੀ ਇਹ ਵਿਅਕਤੀ ਉਸਨੂੰ ਦੋ ਵਾਰ ਰੋਕ ਚੁੱਕੇ ਸਨ ਅਤੇ ਉਸਦੇ ਕੋਲੋਂ ਨਕਦ ਰਕਮ ਲੈ ਗਏ ਸਨ। ਇਸ ਵਾਰ ਉਹ ਡਰ ਦੇ ਮਾਰੇ ਉੱਥੇ ਨਾ ਰੁਕਿਆ ਅਤੇ ਆਪਣੀ ਗੱਡੀ ਅੱਗੇ ਵਧਾ ਲਈ, ਜਿਸ ਤੋਂ ਬਾਅਦ ਰਿਕਵਰੀ ਏਜੰਟਾਂ ਦੀ ਗੱਡੀ ਉਸਦੇ ਪਿੱਛੇ ਲੱਗ ਗਈ।

ਅਜਨੌਦ ਪੁੱਲ ਨੇੜੇ ਪਹੁੰਚਣ ’ਤੇ ਪਿੱਛੇ ਆ ਰਹੇ ਵਾਹਨ ਵੱਲੋਂ ਉਸਦੀ ਕਾਰ ਨੂੰ ਮਾਰੇ ਗਏ ਕੱਟ ਕਾਰਨ ਉਸਦੀ ਕਾਰ ਬੇਕਾਬੂ ਹੋ ਗਈ ਅਤੇ ਸਿੱਧੀ ਸਰਹਿੰਦ ਨਹਿਰ ਵਿੱਚ ਜਾ ਡਿੱਗੀ। ਨਹਿਰ ਵਿੱਚ ਪਾਣੀ ਦੇ ਤੇਜ਼ ਬਹਾਅ ਕਾਰਨ ਕਾਰ ਕੁਝ ਹੀ ਪਲਾਂ ਵਿੱਚ ਉਲਟ ਗਈ ਅਤੇ ਦਰਵਾਜ਼ੇ ਲੌਕ ਹੋ ਜਾਣ ਕਰਕੇ ਚਾਲਕ ਅੰਦਰ ਫਸ ਗਿਆ। ਸੰਕਟਮਈ ਹਾਲਾਤਾਂ ਵਿੱਚ ਗੌਰਵ ਵਰਮਾ ਨੇ ਹਿੰਮਤ ਦਿਖਾਉਂਦਿਆਂ ਆਪਣੇ ਕੜੇ ਨਾਲ ਕਾਰ ਦਾ ਸ਼ੀਸ਼ਾ ਤੋੜਿਆ ਅਤੇ ਬਾਹਰ ਨਿਕਲਣ ਵਿੱਚ ਕਾਮਯਾਬ ਹੋਇਆ। ਮੌਕੇ ’ਤੇ ਮੌਜੂਦ ਲੋਕਾਂ ਅਤੇ ਰਾਹਗੀਰਾਂ ਨੇ ਤੁਰੰਤ ਉਸਦੀ ਮਦਦ ਕੀਤੀ ਅਤੇ ਉਸਨੂੰ ਸੁਰੱਖਿਅਤ ਥਾਂ ’ਤੇ ਲਿਆਂਦਾ। ਹਾਦਸੇ ਤੋਂ ਬਾਅਦ ਰਿਕਵਰੀ ਏਜੰਟ ਮੌਕੇ ਤੋਂ ਫਰਾਰ ਹੋ ਗਏ।

ਘਟਨਾ ਦੀ ਸੂਚਨਾ ਮਿਲਦੇ ਹੀ ਸਥਾਨਕ ਲੋਕਾਂ ਦੀ ਭੀੜ ਇਕੱਠੀ ਹੋ ਗਈ ਅਤੇ ਪੁਲਸ ਨੂੰ ਵੀ ਜਾਣਕਾਰੀ ਦਿੱਤੀ ਗਈ। ਹਾਦਸੇ ਵਿੱਚ ਕਾਰ ਨੂੰ ਕਾਫ਼ੀ ਨੁਕਸਾਨ ਪਹੁੰਚਿਆ, ਜਦਕਿ ਚਾਲਕ ਨੂੰ ਹਲਕੀਆਂ ਸੱਟਾ ਲਗੀਆਂ।

ਰੇਲਿੰਗ ਦੀ ਘਾਟ ਬਣ ਰਹੀ ਜਾਨਲੇਵਾ ਖਤਰਾ, ਪਹਿਲਾਂ ਵੀ ਹੋ ਚੁੱਕੀ ਹੈ ਮੌਤ
ਵਰਣਨਯੋਗ ਹੈ ਕਿ ਅਜਨੌਦ ਪੁੱਲ ਅਤੇ ਸਰਹਿੰਦ ਨਹਿਰ ਕਿਨਾਰੇ ਕਈ ਥਾਵਾਂ ’ਤੇ ਸੁਰੱਖਿਆ ਰੇਲਿੰਗ ਜਾਂ ਤਾਂ ਲੱਗੀ ਹੀ ਨਹੀਂ ਜਾਂ ਜਿੱਥੇ ਲੱਗੀ ਸੀ ਉੱਥੇ ਤੋਂ ਟੁੱਟ ਕੇ ਜਾਂ ਚੋਰੀ ਹੋ ਚੁੱਕੀ ਹੈ। ਮੌਕੇ ’ਤੇ ਲੱਗੀਆਂ ਤਸਵੀਰਾਂ ਵੀ ਸਪੱਸ਼ਟ ਕਰਦੀਆਂ ਹਨ ਕਿ ਨਹਿਰ ਕਿਨਾਰੇ ਸੜਕ ਦੇ ਨਾਲ ਕੋਈ ਪੱਕਾ ਸੁਰੱਖਿਆ ਪ੍ਰਬੰਧ ਨਹੀਂ ਹੈ, ਜਿਸ ਕਾਰਨ ਹਲਕੀ ਜਿਹੀ ਗਲਤੀ ਵੀ ਵੱਡੇ ਹਾਦਸੇ ਦਾ ਰੂਪ ਧਾਰ ਸਕਦੀ ਹੈ।
ਸਥਾਨਕ ਨਿਵਾਸੀਆਂ ਅਨੁਸਾਰ ਪਿਛਲੇ ਵਰ੍ਹੇ ਵੀ ਇਸੇ ਇਲਾਕੇ ਵਿੱਚ ਰੇਲਿੰਗ ਨਾ ਹੋਣ ਕਾਰਨ ਇੱਕ ਹੋਰ ਵਾਹਨ ਨਹਿਰ ਵਿੱਚ ਡਿੱਗ ਗਿਆ ਸੀ, ਜਿਸ ਵਿੱਚ ਇੱਕ ਨੌਜਵਾਨ ਦੀ ਮੌਕੇ ’ਤੇ ਹੀ ਮੌਤ ਹੋ ਗਈ ਸੀ। ਇਸ ਦੇ ਬਾਵਜੂਦ ਸੰਬੰਧਿਤ ਵਿਭਾਗਾਂ ਵੱਲੋਂ ਨਾ ਤਾਂ ਪੂਰੀ ਰੇਲਿੰਗ ਲਗਾਈ ਗਈ ਅਤੇ ਨਾ ਹੀ ਟੁੱਟੀ ਰੇਲਿੰਗ ਦੀ ਮੁਰੰਮਤ ਕੀਤੀ ਗਈ, ਜੋ ਪ੍ਰਸ਼ਾਸਨਿਕ ਲਾਪਰਵਾਹੀ ਨੂੰ ਦਰਸਾਉਂਦਾ ਹੈ।
ਇਲਾਕਾ ਵਾਸੀਆਂ ਨੇ ਕਿਹਾ ਕਿ ਜੇ ਸਮੇਂ ਸਿਰ ਮਜ਼ਬੂਤ ਅਤੇ ਲਗਾਤਾਰ ਰੇਲਿੰਗ ਲਗਾ ਦਿੱਤੀ ਜਾਂਦੀ ਤਾਂ ਅੱਜ ਵਾਪਰੇ ਹਾਦਸੇ ਤੋਂ ਵੀ ਬਚਿਆ ਜਾ ਸਕਦਾ ਸੀ। ਉਨ੍ਹਾਂ ਮੰਗ ਕੀਤੀ ਕਿ ਨਹਿਰ ਕਿਨਾਰੇ ਪੂਰੀ ਲੰਬਾਈ ਵਿੱਚ ਪੱਕੀ ਸੁਰੱਖਿਆ ਬੈਰੀਕੇਡਿੰਗ ਕੀਤੀ ਜਾਵੇ ਅਤੇ ਇਸ ਦੀ ਨਿਯਮਿਤ ਨਿਗਰਾਨੀ ਵੀ ਕੀਤੀ ਜਾਵੇ, ਤਾਂ ਜੋ ਚੋਰੀ ਜਾਂ ਨੁਕਸਾਨ ਦੀ ਸਥਿਤੀ ਵਿੱਚ ਤੁਰੰਤ ਕਾਰਵਾਈ ਹੋ ਸਕੇ।
ਇਸ ਤਾਜ਼ਾ ਹਾਦਸੇ ਨੇ ਇੱਕ ਵਾਰ ਫਿਰ ਸੜਕ ਸੁਰੱਖਿਆ ਪ੍ਰਬੰਧਾਂ ਦੀ ਕਮਜ਼ੋਰੀ ਅਤੇ ਪ੍ਰਸ਼ਾਸਨ ਦੀ ਉਦਾਸੀਨਤਾ ’ਤੇ ਗੰਭੀਰ ਸਵਾਲ ਖੜੇ ਕਰ ਦਿੱਤੇ ਹਨ, ਜਦਕਿ ਲੋਕਾਂ ਦਾ ਕਹਿਣਾ ਹੈ ਕਿ ਜੇ ਹਾਲਾਤ ਇਸੇ ਤਰ੍ਹਾਂ ਰਹੇ ਤਾਂ ਭਵਿੱਖ ਵਿੱਚ ਹੋਰ ਜਾਨਲੇਵਾ ਹਾਦਸਿਆਂ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e