ਗੁਰਦੁਆਰਾ ਸਾਹਿਬ ''ਚ ਮੱਥਾ ਟੇਕਣ ਆਈਆਂ ਕੁੜੀਆਂ, ਐਕਟਿਵਾ ਦੀ ਡਿੱਗੀ ਵਿਚੋਂ ਪਰਸ ਚੋਰੀ

ਲੁਧਿਆਣਾ (ਰਾਜ): ਮਹਾਨਗਰ ਦੇ ਪੌਸ਼ ਇਲਾਕੇ ਮਾਡਲ ਟਾਊਨ ਸਥਿਤ ਇਤਿਹਾਸਕ ਗੁਰਦੁਆਰਾ ਬਾਬਾ ਦੀਪ ਸਿੰਘ ਜੀ ਦੇ ਬਾਹਰੋਂ ਦਿਨ-ਦਿਹਾੜੇ ਚੋਰੀ ਹੋ ਗਈ। ਗੁਰਦੁਆਰਾ ਸਾਹਿਬ ਵਿਖੇ ਨਤਮਸਤਕ ਹੋਣ ਪਹੁੰਚੀ ਇਕ ਮਹਿਲਾ ਮੇਕਅੱਪ ਆਰਟਿਸਟ ਦੀ ਪਾਰਕਿੰਗ ਵਿਚ ਖੜ੍ਹੀ ਐਕਟਿਵਾ ਦਾ ਕਿਸੇ ਨੇ ਲੌਕ ਤੋੜ ਦਿੱਤਾ ਅਤੇ ਡਿੱਗੀ ਦੇ ਅੰਦਰ ਰੱਖੇ ਦੋ ਲੇਡੀਜ਼ ਪਰਸ ਚੋਰੀ ਕਰਕੇ ਫ਼ਰਾਰ ਹੋ ਗਿਆ। ਚੋਰੀ ਦੀ ਇਹ ਪੂਰੀ ਘਟਨਾ ਪਾਰਕਿੰਗ ਖੇਤਰ ਵਿਚ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਵਿਚ ਕੈਦ ਹੋ ਗਈ, ਜਿਸ ਵਿਚ ਦੋਸ਼ੀ ਦੀ ਕਰਤੂਤ ਸਾਫ਼ ਨਜ਼ਰ ਆ ਰਹੀ ਹੈ।

ਪ੍ਰਾਪਤ ਜਾਣਕਾਰੀ ਅਨੁਸਾਰ, ਮੇਕਅੱਪ ਆਰਟਿਸਟ ਕਵਿਤਾ ਦੁਪਹਿਰ ਲਗਭਗ 3 ਵਜੇ ਆਪਣੀ ਸਹੇਲੀ ਨਾਲ ਮਾਡਲ ਟਾਊਨ ਸਥਿਤ ਗੁਰਦੁਆਰਾ ਬਾਬਾ ਦੀਪ ਸਿੰਘ ਜੀ ਵਿਖੇ ਮੱਥਾ ਟੇਕਣ ਲਈ ਆਈ ਸੀ। ਉਨ੍ਹਾਂ ਨੇ ਆਪਣੀ ਐਕਟਿਵਾ ਸਕੂਟੀ ਨੂੰ ਗੁਰਦੁਆਰਾ ਸਾਹਿਬ ਦੇ ਬਾਹਰ ਨਿਰਧਾਰਿਤ ਪਾਰਕਿੰਗ ਏਰੀਆ ਵਿਚ ਸੁਰੱਖਿਅਤ ਖੜ੍ਹਾ ਕੀਤਾ ਸੀ। ਦੋਵਾਂ ਮਹਿਲਾਵਾਂ ਨੇ ਆਪਣੇ ਕੀਮਤੀ ਸਾਮਾਨ ਅਤੇ ਨਕਦੀ ਨਾਲ ਭਰੇ ਪਰਸ ਐਕਟਿਵਾ ਦੀ ਡਿੱਗੀ ਦੇ ਅੰਦਰ ਰੱਖੇ ਅਤੇ ਲੌਕ ਲਗਾ ਕੇ ਗੁਰਦੁਆਰਾ ਸਾਹਿਬ ਦੇ ਅੰਦਰ ਚਲੀਆਂ ਗਈਆਂ। ਕੁਝ ਦੇਰ ਬਾਅਦ ਜਦੋਂ ਉਹ ਦੋਵੇਂ ਨਤਮਸਤਕ ਹੋ ਕੇ ਬਾਹਰ ਪਰਤੀਆਂ, ਤਾਂ ਐਕਟਿਵਾ ਦਾ ਲੌਕ ਟੁੱਟਾ ਦੇਖ ਕੇ ਉਨ੍ਹਾਂ ਦੇ ਹੋਸ਼ ਉੱਡ ਗਏ। ਡਿੱਗੀ ਖੋਲ੍ਹ ਕੇ ਦੇਖਣ 'ਤੇ ਦੋਵਾਂ ਦੇ ਪਰਸ ਗਾਇਬ ਮਿਲੇ।

ਘਟਨਾ ਦੇ ਤੁਰੰਤ ਬਾਅਦ ਜਦੋਂ ਪਾਰਕਿੰਗ ਵਿਚ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਰਿਕਾਰਡਿੰਗ ਖੰਗਾਲੀ ਗਈ, ਤਾਂ ਚੋਰੀ ਦੀ ਪੂਰੀ ਸਾਜ਼ਿਸ਼ ਬੇਨਕਾਬ ਹੋ ਗਈ। ਫੁਟੇਜ ਵਿਚ ਇਕ ਸ਼ੱਕੀ ਨੌਜਵਾਨ ਮੋਢੇ 'ਤੇ ਬੈਗ ਟੰਗੀ ਪਾਰਕਿੰਗ ਖੇਤਰ ਵਿਚ ਘੁੰਮਦਾ ਹੋਇਆ ਦਿਖਾਈ ਦੇ ਰਿਹਾ ਹੈ। ਦੋਸ਼ੀ ਨੇ ਪਹਿਲਾਂ ਆਸ-ਪਾਸ ਖੜ੍ਹੇ ਵਾਹਨਾਂ ਅਤੇ ਲੋਕਾਂ ਦੀਆਂ ਗਤੀਵਿਧੀਆਂ ਦੀ ਬਾਰੀਕੀ ਨਾਲ ਰੇਕੀ ਕੀਤੀ। ਜਿਵੇਂ ਹੀ ਪਾਰਕਿੰਗ ਵਿਚ ਚਹਿਲ-ਪਹਿਲ ਥੋੜ੍ਹੀ ਘੱਟ ਹੋਈ, ਦੋਸ਼ੀ ਤੁਰੰਤ ਕਵਿਤਾ ਦੀ ਐਕਟਿਵਾ ਕੋਲ ਪਹੁੰਚਿਆ। ਸ਼ਾਤਿਰ ਨੇ ਕਿਸੇ ਔਜ਼ਾਰ ਜਾਂ ਤਕਨੀਕ ਨਾਲ ਐਕਟਿਵਾ ਦਾ ਲੌਕ ਤੋੜਿਆ, ਡਿੱਗੀ ਖੋਲ੍ਹੀ ਅਤੇ ਉਸ ਵਿਚ ਰੱਖੇ ਦੋਵੇਂ ਪਰਸ ਕੱਢ ਕੇ ਤੇਜ਼ੀ ਨਾਲ ਆਪਣੇ ਬੈਗ ਵਿਚ ਛੁਪਾ ਲਏ। ਇਸ ਤੋਂ ਬਾਅਦ ਦੋਸ਼ੀ ਬੜੇ ਇਤਮੀਨਾਨ ਨਾਲ ਪੈਦਲ ਹੀ ਉੱਥੋਂ ਭੱਜ ਨਿਕਲਿਆ।

ਗੁਰਦੁਆਰਾ ਸਾਹਿਬ ਵਰਗੇ ਪਾਵਨ ਧਾਰਮਿਕ ਅਸਥਾਨ ਦੇ ਬਾਹਰ ਦਿਨ-ਦਿਹਾੜੇ ਹੋਈ ਇਸ ਵਾਰਦਾਤ ਤੋਂ ਬਾਅਦ ਸੰਗਤ ਅਤੇ ਸਥਾਨਕ ਦੁਕਾਨਦਾਰਾਂ ਵਿਚ ਭਾਰੀ ਰੋਸ ਦੇਖਿਆ ਜਾ ਰਿਹਾ ਹੈ। ਸ਼ਰਧਾਲੂਆਂ ਦਾ ਕਹਿਣਾ ਹੈ ਕਿ ਮਾਡਲ ਟਾਊਨ ਵਰਗੇ ਮੁੱਖ ਅਤੇ ਵਪਾਰਕ ਇਲਾਕੇ ਵਿਚ ਵੀ ਜੇਕਰ ਦਿਨ ਦੇ ਸਮੇਂ ਧਾਰਮਿਕ ਅਸਥਾਨਾਂ ਦੀ ਪਾਰਕਿੰਗ ਸੁਰੱਖਿਅਤ ਨਹੀਂ ਹੈ, ਤਾਂ ਪੁਲਸ ਸੁਰੱਖਿਆ ਪ੍ਰਬੰਧਾਂ 'ਤੇ ਗੰਭੀਰ ਸਵਾਲ ਖੜ੍ਹੇ ਹੁੰਦੇ ਹਨ। ਪੀੜਤ ਮਹਿਲਾਵਾਂ ਨੇ ਤੁਰੰਤ ਮਾਮਲੇ ਦੀ ਸੂਚਨਾ ਸਥਾਨਕ ਪੁਲਸ ਨੂੰ ਦਿੱਤੀ। ਸੂਚਨਾ ਮਿਲਦਿਆਂ ਹੀ ਥਾਣਾ ਮਾਡਲ ਟਾਊਨ ਦੀ ਪੁਲਸ ਨੇ ਘਟਨਾ ਸਥਾਨ ਦਾ ਮੁਆਇਨਾ ਕੀਤਾ ਅਤੇ ਪੀੜਤ ਪੱਖ ਦੇ ਬਿਆਨ ਦਰਜ ਕੀਤੇ। ਪੁਲਸ ਨੇ ਗੁਰਦੁਆਰਾ ਸਾਹਿਬ ਅਤੇ ਆਸ-ਪਾਸ ਦੀਆਂ ਸੜਕਾਂ 'ਤੇ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਫੁਟੇਜ ਨੂੰ ਆਪਣੇ ਕਬਜ਼ੇ ਵਿਚ ਲੈ ਲਿਆ ਹੈ। ਪੁਲਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਫੁਟੇਜ ਵਿਚ ਦੋਸ਼ੀ ਦਾ ਚਿਹਰਾ ਕਾਫ਼ੀ ਹੱਦ ਤੱਕ ਸਪੱਸ਼ਟ ਦਿਸ ਰਿਹਾ ਹੈ। ਤਕਨੀਕੀ ਟੀਮਾਂ ਦੀ ਮਦਦ ਨਾਲ ਹੁਲੀਆ ਟਰੇਸ ਕਰਕੇ ਦੋਸ਼ੀ ਦੀ ਗ੍ਰਿਫ਼ਤਾਰੀ ਦੇ ਯਤਨ ਤੇਜ਼ ਕਰ ਦਿੱਤੇ ਗਏ ਹਨ।