2019 ਲੋਕ ਸਭਾ ਚੋਣਾਂ: 27 ਸਾਲਾਂ ਤੋਂ ਨਹੀਂ ਜਿੱਤ ਸਕੀ ਪਾਰਟੀ, ਦਿਲਚਸਪ ਹੋਵੇਗਾ ਮੁਕਾਬਲਾ

ਬਠਿੰਡਾ (ਨਰੇਸ਼)—ਪੰਜਾਬ 'ਚ ਪਿਛਲੇ 27 ਸਾਲਾਂ ਤੋਂ ਤਿੰਨ ਵਾਰ ਕਾਂਗਰਸ ਸੱਤਾ 'ਚ ਆਈ ਪਰ ਇਸ ਦੇ ਬਾਵਜੂਦ ਉਹ ਅਕਾਲੀ ਦਲ ਦੇ ਮਜ਼ਬੂਤ ਗੜ੍ਹ ਬਠਿੰਡਾ ਦੀ ਲੋਕ ਸਭਾ ਦੀ ਸੀਟ ਹੁਣ ਤੱਕ ਨਹੀਂ ਜਿੱਤ ਸਕੀ ਹੈ। ਕਾਂਗਰਸ ਨੇ 1992 ਦੀਆਂ ਲੋਕ ਸਭਾ ਚੋਣਾਂ 'ਚ ਇਹ ਸੀਟ ਜਿੱਤੀ ਸੀ ਪਰ ਉਸ ਤੋਂ ਬਾਅਦ ਇਸ ਸੀਟ 'ਤੇ ਲਗਾਤਾਰ ਅਕਾਲੀ ਦਲ ਦਾ ਪ੍ਰਭਾਵ ਰਿਹਾ ਹੈ। 1999 ਦੀਆਂ ਚੋਣਾਂ 'ਚ ਸਿਰਫ ਇਕ ਵਾਰ ਸੀ. ਪੀ. ਆਈ. ਦੇ ਭਾਨ ਸਿੰਘ ਭੌਰਾ ਇਸ ਸੀਟ ਤੋਂ ਜਿੱਤੇ ਜਦਕਿ ਕਾਂਗਰਸ ਇਸ ਦੌਰਾਨ ਵੀ ਤੀਜੇ ਨੰਬਰ ਦੀ ਪਾਰਟੀ ਰਹੀ। ਕੇਂਦਰ 'ਚ ਮੋਦੀ ਸਰਕਾਰ ਦੇ ਖਿਲਾਫ ਬਣੇ ਮਾਹੌਲ ਅਤੇ ਪੰਜਾਬ 'ਚ ਦੋਵੇਂ ਵਿਰੋਧੀ ਪਾਰਟੀਆਂ 'ਚ ਪਈ ਭਾਰੀ ਫੁੱਟ ਵਿਚਾਲੇ ਕਾਂਗਰਸ ਲਈ 27 ਸਾਲ ਬਾਅਦ ਇਕ ਵਾਰ ਮੁੜ ਬਠਿੰਡਾ 'ਚ ਜਿੱਤ ਦਾ ਮੌਕਾ ਬਣ ਸਕਦਾ ਹੈ ਪਰ ਇਸ ਸੀਟ 'ਤੇ ਅਕਾਲੀ ਦਲ ਨੂੰ ਕਮਜ਼ੋਰ ਸਮਝਣਾ ਭਾਰੀ ਵੀ ਪੈ ਸਕਦਾ ਹੈ। ਇਸ ਸੀਟ ਦਾ ਨਤੀਜਾ ਇਸ ਗੱਲ 'ਤੇ ਨਿਰਭਰ ਕਰੇਗਾ ਕਿ ਆਮ ਆਦਮੀ ਪਾਰਟੀ ਹਲਕੇ ਦੀਆਂ 9 'ਚੋਂ 5 ਵਿਧਾਨ ਸਭਾ ਸੀਟਾਂ 'ਤੇ  ਜਿੱਤ  ਗਈ  ਸੀ  ਪਰ ਪਿਛਲੇ 2 ਸਾਲਾਂ 'ਚ ਆਮ ਆਦਮੀ ਪਾਰਟੀ 'ਚ ਪਈ ਫੁੱਟ ਕਾਰਨ ਉਸ ਦਾ ਵੋਟ ਬੈਂਕ ਖਿੰਡਣਾ ਤੈਅ ਹੈ। ਇਹ ਵੋਟ ਬਠਿੰਡਾ ਲੋਕ ਸਭਾ ਸੀਟ ਦਾ ਨਤੀਜਾ ਤੈਅ ਕਰੇਗਾ।

ਬਠਿੰਡਾ 'ਚ ਫਿਰ ਦਿਓਰ-ਭਾਬੀ ਆਹਮੋ-ਸਾਹਮਣੇ
ਬਠਿੰਡਾ ਲੋਕ ਸਭਾ ਸੀਟ ਨੂੰ ਲੈ ਕੇ ਹਾਲਾਂਕਿ ਕਿਸੇ ਪਾਰਟੀ ਨੇ ਉਮੀਦਵਾਰ ਦੇ ਨਾਂ ਦਾ ਐਲਾਨ ਨਹੀਂ ਕੀਤਾ ਹੈ ਪਰ ਪਿਛਲੇ 10 ਦਿਨਾਂ ਤੋਂ ਹਲਕੇ ਦੀ ਮੌਜੂਦਾ ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਜਿਸ ਤਰੀਕੇ ਨਾਲ ਹਲਕੇ 'ਚ ਸਰਗਰਮ ਹੈ, ਨੂੰ ਦੇਖ ਕੇ ਮੰਨਿਆ ਜਾ ਰਿਹਾ ਹੈ ਕਿ ਅਕਾਲੀ ਦਲ ਇਸ ਵਾਰ ਫਿਰ ਉਨ੍ਹਾਂ ਨੂੰ ਹੀ ਇਸ ਸੀਟ 'ਤੇ ਮੈਦਾਨ 'ਚ ਉਤਾਰੇਗਾ। ਉਸ ਦੇ ਸਾਹਮਣੇ ਕਾਂਗਰਸ ਵੱਲੋਂ ਇਕ ਵਾਰ ਮੁੜ ਮਨਪ੍ਰੀਤ ਬਾਦਲ ਨੂੰ ਉਤਾਰੇ ਜਾਣ ਦੀ ਚਰਚਾ ਹੈ। ਮਨਪ੍ਰੀਤ ਬਾਦਲ ਪਿਛਲੀਆਂ ਚੋਣਾਂ ਆਪਣੀ ਭਾਬੀ ਦੇ ਹੱਥੋਂ 19395 ਵੋਟਾਂ ਦੇ ਫਰਕ ਨਾਲ ਹਾਰ ਗਏ ਸਨ ਪਰ ਇਸ ਵਾਰ ਸਿਆਸੀ ਹਾਲਾਤ ਹਰਸਿਮਰਤ ਲਈ ਇੰਨੇ ਵਧੀਆ ਨਹੀਂ ਹਨ।

ਪ੍ਰਭਾਵ ਨਹੀਂ ਛੱਡ ਸਕੇ 'ਆਪ' ਦੇ ਵਿਧਾਇਕ
ਆਮ ਆਦਮੀ ਪਾਰਟੀ ਨੇ 2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਇਸ ਹਲਕੇ ਦੀ ਬਠਿੰਡਾ ਰੂਰਲ, ਤਲਵੰਡੀ ਸਾਬੋ, ਮਾਨਸਾ, ਬੁਢਲਾਢਾ ਅਤੇ ਮੌੜ ਮੰਡੀ ਸੀਟਾਂ 'ਤੇ ਜਿੱਤ ਦਰਜ ਕੀਤੀ ਸੀ ਅਤੇ ਪਾਰਟੀ ਨੇ ਬਠਿੰਡਾ ਲੋਕ ਸਭਾ ਦੇ ਤਹਿਤ ਆਉਂਦੀਆਂ 9 ਵਿਧਾਨ ਸਭਾ ਸੀਟਾਂ 'ਚੋਂ 447036 ਵੋਟਾਂ ਹਾਸਲ ਕੀਤੀਆਂ ਸਨ ਪਰ ਪਿਛਲੇ 2 ਸਾਲਾਂ 'ਚ ਆਮ ਆਦਮੀ ਪਾਰਟੀ ਦੇ ਉਨ੍ਹਾਂ 5 ਵਿਧਾਇਕਾਂ 'ਚੋਂ ਕੋਈ ਵੀ ਵਿਧਾਇਕ ਜਨਤਾ 'ਚ ਅਜਿਹਾ ਪ੍ਰਭਾਵ ਨਹੀਂ ਛੱਡ ਸਕਿਆ ਹੈ, ਜਿਸ ਨਾਲ ਪਾਰਟੀ ਮਜ਼ਬੂਤ ਹੋਵੇ। ਇਸ ਦੇ ਉਲਟ ਪਾਰਟੀ 'ਚ ਪਈ ਫੁੱਟ ਅਤੇ ਸੁਖਪਾਲ ਖਹਿਰਾ ਦੀ ਬਠਿੰਡਾ 'ਚ ਸਰਗਰਮੀ ਨਾਲ ਆਮ ਆਦਮੀ ਪਾਰਟੀ ਦਾ ਵੋਟਰ ਦੁਚਿੱਤੀ 'ਚ ਹੈ ਅਤੇ ਲੋਕ ਸਭਾ ਚੋਣਾਂ ਦੌਰਾਨ ਪਾਰਟੀ ਨੂੰ ਇਸ ਦਾ ਖਾਮਿਆਜ਼ਾ ਭੁਗਤਣਾ ਪੈ ਸਕਦਾ ਹੈ। ਆਮ ਆਦਮੀ ਪਾਰਟੀ ਜੇਕਰ ਇਸ ਸੀਟ 'ਤੇ ਕਿਸੇ ਮਜ਼ਬੂਤ ਚਿਹਰੇ ਨੂੰ ਮੈਦਾਨ 'ਚ ਉਤਾਰਦੀ ਹੈ ਤਾਂ ਹੀ ਪਾਰਟੀ ਇਥੇ ਮਜ਼ਬੂਤੀ ਨਾਲ ਟੱਕਰ ਦੇ ਸਕੇਗੀ। ਦੂਜਾ ਬਦਲ ਇਹ ਵੀ ਹੋ ਸਕਦਾ ਹੈ ਕਿ ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਵਿਚਾਲੇ ਸਮਝੌਤੇ ਦੀ ਸਥਿਤੀ 'ਚ ਜੇਕਰ ਸੀਟ 'ਆਪ' ਦੇ ਹਿੱਸੇ ਆਈ ਤਾਂ ਹੀ ਪਾਰਟੀ ਇਥੇ ਮਜ਼ਬੂਤੀ ਨਾਲ ਟੱਕਰ ਦੇ ਸਕੇਗੀ। 

ਬਠਿੰਡਾ ਸੀਟ ਦੀਆਂ ਵਿਧਾਨ ਸਭਾ ਚੋਣਾਂ ਦੇ  ਨਤੀਜਿਆਂ ਮੁਤਾਬਕ ਵਿਸ਼ਲੇਸ਼ਣ

2014 ਦਾ ਨਤੀਜਾ ਹਰਸਿਮਰਤ ਕੌਰ ਬਾਦਲ 5,14,727    ਮਨਪ੍ਰੀਤ ਬਾਦਲ 4,95,332    ਜੱਸੀ ਜਸਰਾਜ 87,901

ਲੜਾਈ ਨੂੰ ਦਿਲਚਸਪ ਬਣਾ ਸਕਦੀ ਹੈ ਖਹਿਰਾ ਦੀ ਐਂਟਰੀ
ਆਮ ਆਦਮੀ ਪਾਰਟੀ ਨਾਲ ਬਗਾਵਤ ਕਰਕੇ ਪੰਜਾਬੀ ਏਕਤਾ ਪਾਰਟੀ ਬਣਾਉਣ ਵਾਲੇ ਸੁਖਪਾਲ ਖਹਿਰਾ ਪਿਛਲੇ ਕਈ ਦਿਨਾਂ ਤੋਂ ਇਸ ਹਲਕੇ 'ਚ ਸਰਗਰਮ ਹਨ ਅਤੇ ਮੰਨਿਆ ਜਾ ਰਿਹਾ ਹੈ ਕਿ  ਉਹ ਬਠਿੰਡਾ ਲੋਕ ਸਭਾ ਹਲਕੇ ਤੋਂ ਹੀ ਚੋਣ ਲੜਨਗੇ। ਸਿਆਸੀ ਮਾਹਰਾਂ ਦਾ ਮੰਨਣਾ ਹੈ ਕਿ ਖਹਿਰਾ ਦੀ ਨਜ਼ਰ ਆਮ ਆਦਮੀ ਪਾਰਟੀ ਨੂੰ 2017 'ਚ ਹਾਸਲ ਹੋਈਆਂ ਲਗਭਗ ਸਾਢੇ ਚਾਰ ਲੱਖ ਵੋਟਾਂ 'ਤੇ ਹੈ ਅਤੇ ਉਹ ਇਸੇ ਵੋਟ ਬੈਂਕ 'ਚ ਸੰਨ੍ਹ ਲਾਉਣ ਲਈ ਬਠਿੰਡਾ ਸੀਟ ਵੱਲ ਰੁਖ ਕਰ ਸਕਦੇ ਹਨ। ਹਾਲਾਂਕਿ  ਉਨ੍ਹਾਂ ਦੀ ਉਮੀਦਵਾਰੀ 'ਤੇ ਸਸਪੈਂਸ ਬਣਿਆ ਹੋਇਆ ਹੈ ਪਰ ਜੇਕਰ ਉਹ ਮੈਦਾਨ 'ਚ ਉਤਰੇ ਤਾਂ ਦਿਓਰ-ਭਾਬੀ ਦੀ ਲੜਾਈ ਵਿਚਾਲੇ ਖਹਿਰਾ ਦੀ ਐਂਟਰੀ ਇਸ ਸੀਟ ਦੀ ਲੜਾਈ ਨੂੰ ਹੋਰ ਜਿਆਦਾ ਦਿਲਚਸਪ ਬਣਾ ਦੇਵੇਗੀ।
ਹਰਸਿਮਰਤ ਦੀ ਪ੍ਰਾਪਤੀ
ਬਠਿੰਡਾ 'ਚ ਏਮਜ਼ ਹਸਪਤਾਲ
ਮਾਨਸਾ 'ਚ ਸਰਕਾਰੀ ਸਹਾਇਤਾ ਪ੍ਰਾਪਤ ਗਰਲਜ਼ ਕਾਲਜ
ਪੰਜਾਬ 'ਚ 3 ਮੈਗਾ ਫੂਡ ਪਾਰਕ

ਹਰਸਿਮਰਤ ਦਾ ਫੰਡ
ਕੁਲ ਜਾਰੀ ਫੰਡ-20ਕੋਰੜ
ਵਿਆਜ ਦੇ ਨਾਲ ਫੰਡ-21.13 ਕਰੋੜ
ਖਰਚ ਫੰਡ 18.56 ਕਰੋੜ
ਬਚਿਆ ਫੰਡ-2.57 ਕਰੋੜ

ਕਈ ਅਹਿਮ ਮੁੱਦਿਆਂ 'ਤੇ ਵੀ ਬਹਿਸ
ਹਰਸਿਮਰਤ ਕੌਰ ਬਾਦਲ ਕੇਂਦਰੀ ਮੰਤਰੀ ਹਨ,  ਫਿਰ  ਵੀ  ਸੰਸਦ 'ਚ ਉਨ੍ਹਾਂ ਦੀ ਹਾਜ਼ਰੀ ਦਾ ਕੋਈ ਰਿਕਾਰਡ ਉਪਲੱਬਧ ਨਹੀਂ ਹੈ। ਨਿਯਮਾਂ ਮੁਤਾਬਕ ਮੰਤਰੀ ਅਹੁਦੇ ਮਿਲ ਜਾਣ 'ਤੇ ਸੰਸਦ ਮੈਂਬਰ ਨਾ ਤਾਂ ਸੰਸਦ ਦਾ ਹਾਜ਼ਰੀ ਰਜਿਸਟਰ ਸਾਈਨ ਕਰਦਾ ਹੈ ਅਤੇ ਨਾ ਹੀ ਉਹ ਸਵਾਲ ਪੁੱਛਦਾ ਹੈ ਕਿਉਂਕਿ ਉਸ ਨੂੰ ਵਿਰੋਧੀ ਧਿਰ ਦੇ ਨਾਲ-ਨਾਲ ਆਪਣੀ ਪਾਰਟੀ ਦੇ ਸੰਸਦ ਮੈਂਬਰਾਂ ਦੇ ਸਵਾਲਾਂ ਦਾ ਜਵਾਬ ਵੀ ਦੇਣਾ ਹੁੰਦਾ ਹੈ ਪਰ ਬਤੌਰ ਸੰਸਦ ਮੈਂਬਰ ਹਰਸਿਮਰਤ ਬਾਦਲ ਨੇ ਕਿਸਾਨਾਂ ਨਾਲ ਜੁੜੇ ਮੁੱਦਿਆਂ ਤੋਂ ਇਲਾਵਾ ਸਿੱਖਾਂ ਦੀ ਦਸਤਾਰ ਦੇ ਮਸਲੇ, ਅਨੰਦ ਮੈਰਿਜ ਐਕਟ ਅਤੇ ਫੂਡ ਸਕਿਓਰਿਟੀ ਬਿੱਲ ਵਰਗੇ ਮੁੱਦਿਆਂ 'ਤੇ ਵੀ ਸੰਸਦ 'ਚ ਬਹਿਸ 'ਤੇ ਹਿੱਸਾ ਲਿਆ ਹੈ।

ਮਜ਼ਬੂਤ ਪੱਖ-ਹਰਸਿਮਰਤ ਕੌਰ ਬਾਦਲ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਨੁੰਹ ਹੈ ਅਤੇ ਪਰਿਵਾਰ ਦੀ ਸਿਆਸੀ ਸਾਖ ਦਾ ਹਰਸਿਮਰਤ ਨੂੰ ਫਾਇਦਾ ਮਿਲਦਾ ਹੈ। ਬਤੌਰ ਕੇਂਦਰੀ ਮੰਤਰੀ ਹਰਸਿਮਰਤ ਵੱਲੋਂ ਇਲਾਕੇ 'ਚ ਕੀਤੇ ਗਏ ਕੰਮਾਂ ਨਾਲ ਉਨ੍ਹਾਂ ਦੀ ਸਥਿਤੀ ਮਜ਼ਬੂਤ ਹੁੰਦੀ ਹੈ। ਪਿਛਲੀਆਂ 6 ਚੋਣਾਂ 'ਚ ਅਕਾਲੀ ਦਲ ਇਸ ਸੀਟ 'ਤੇ 5 ਵਾਰ ਸਫਲ ਰਿਹਾ ਹੈ। ਕਾਂਗਰਸ ਪਿਛਲੇ 27 ਸਾਲ ਤੋਂ ਇਹ ਸੀਟ ਨਹੀਂ ਜਿੱਤ ਸਕੀ ਹੈ।
ਕਮਜ਼ੋਰ ਪੱਖ-2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਅਕਾਲੀ ਦਲ ਨੂੰ ਇਸ ਸੀਟ 'ਤੇ ਤਕੜਾ ਝਟਕਾ ਲੱਗਾ ਹੈ ਅਤੇ ਪਾਰਟੀ ਇਸ ਸੀਟ 'ਤੇ ਕਮਜ਼ੋਰ ਹੋਈ ਹੈ। ਇਸ ਤੋਂ ਇਲਾਵਾ ਪੰਥਕ ਵੋਟਾਂ ਦੀ ਨਾਰਾਜ਼ਗੀ ਵੀ ਹਰਸਿਮਰਤ 'ਤੇ ਭਾਰੀ ਪੈ ਸਕਦੀ ਹੈ।

ਵਿਧਾਨ ਸਭਾ ਚੋਣਾਂ 'ਚ ਪੱਛੜੀ ਕਾਂਗਰਸ
ਹਾਲਾਂਕਿ 2017 ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਕਾਂਗਰਸ ਨੇ ਪੰਜਾਬ ਦੀਆਂ 10 ਲੋਕ ਸਭਾ ਸੀਟਾਂ 'ਤੇ ਬੜ੍ਹਤ ਬਣਾਈ ਪਰ ਬਠਿੰਡਾ ਲੋਕ ਸਭਾ ਸੀਟ 'ਤੇ ਉਹ ਬੁਰੀ ਤਰ੍ਹਾਂ ਪੱਛੜ ਗਈ। ਕਾਂਗਰਸ ਬਠਿੰਡਾ ਦੀਆਂ 9 ਵਿਧਾਨ ਸਭਾ ਸੀਟਾਂ 'ਚੋਂ ਭੁੱਚੋ ਮੰਡੀ ਅਤੇ ਬਠਿੰਡਾ ਅਰਬਨ ਸੀਟਾਂ 'ਤੇ ਹੀ ਜਿੱਤ ਹਾਸਲ ਕਰ ਸਕਦੀ ਅਤੇ ਵੋਟਾਂ ਦੀ ਗਿਣਤੀ ਦੇ ਲਿਹਾਜ ਨਾਲ ਵੀ ਕਾਂਗਰਸ ਬਠਿੰਡਾ ਲੋਕ ਸਭਾ ਦੀਆਂ ਵਿਧਾਨ ਸਭਾ ਸੀਟਾਂ 'ਤੇ ਤੀਜੇ ਨੰਬਰ 'ਤੇ ਰਹੀ। ਹਾਲਾਂਕਿ ਇਹ ਨਤੀਜੇ ਵਿਧਾਨ ਸਭਾ ਚੋਣਾਂ ਦੇ ਹਨ ਅਤੇ ਲੋਕ ਸਭਾ ਚੋਣਾਂ 'ਚ ਹਾਲਾਤ ਇਸ ਨਾਲ ਵੱਖ ਹੋ ਸਕਦੇ ਹਨ।