''ਐਨਜੈੱਕ ਡੇਅ'' ਪਰੇਡ ''ਚ ਆਸਟ੍ਰੇਲੀਆਈ ਸਿੱਖਾਂ ਵਲੋਂ ਭਰਵੀਂ ਸ਼ਮੂਲੀਅਤ

ਮੈਲਬੌਰਨ/ਬ੍ਰਿਸਬੇਨ (ਮਨਦੀਪ ਸਿੰਘ ਸੈਣੀ/ਸੁਰਿੰਦਰਪਾਲ ਸਿੰਘ ਖੁਰਦ)- ਵਿਸ਼ਵ ਜੰਗਾਂ ਨੂੰ ਸਮਰਪਿਤ 'ਐਨਜੈੱਕ ਡੇਅ' ਪਰੇਡ ਦਾ ਆਯੋਜਨ ਆਸਟਰੇਲੀਆ ਦੇ ਵੱਖ-ਵੱਖ ਸ਼ਹਿਰਾਂ ਵਿਚ ਕੀਤਾ ਗਿਆ।ਜ਼ਿਕਰਯੋਗ ਹੈ ਕਿ 'ਐੱਨਜੈੱਕ ਡੇਅ' 25 ਅਪ੍ਰੈਲ 1915 ਨੂੰ ਗੋਲੀਪੋਲੀ (ਤੁਰਕੀ) ਦੀ ਜੰਗ, ਪਹਿਲੇ ਅਤੇ ਦੂਜੇ ਵਿਸ਼ਵ ਯੁੱਧ ਵਿਚ ਸ਼ਹੀਦ ਹੋਏ ਜਵਾਨਾਂ ਨੂੰ ਸਮਰਪਿਤ ਹੁੰਦਾ ਹੈ।ਇਹਨਾਂ ਜੰਗਾਂ ਵਿਚ ਸਿੱਖ ਫੌਜ਼ ਦੀਆਂ ਕਈ ਬਟਾਲੀਅਨਾਂ ਨੇ ਹਿੱਸਾ ਲਿਆ ਸੀ।ਅੰਕੜਿਆਂ ਮੁਤਾਬਕ ਪਹਿਲੇ ਅਤੇ ਦੂਜੇ ਵਿਸ਼ਵ ਯੁੱਧ ਵਿਚ ਤਕਰੀਬਨ 83,000 ਸਿੱਖ ਸ਼ਹੀਦ ਹੋਏ ਸਨ ਤੇ ਇਕ ਲੱਖ ਤੋਂ ਵੀ ਜ਼ਿਆਦਾ ਜ਼ਖਮੀ ਹੋਏ ਸਨ।
'ਐਨਜੈੱਕ ਡੇਅ' ਪਰੇਡ ਦਾ ਆਯੋਜਨ ਮੈਲਬੌਰਨ, ਸਿਡਨੀ, ਪਰਥ, ਬ੍ਰਿਸਬੇਨ ਅਤੇ ਐਡੀਲੇਡ ਸ਼ਹਿਰਾਂ ਵਿਚ ਕੀਤਾ ਗਿਆ।ਇਸ ਮੌਕੇ ਸਿੱਖ ਰੈਜ਼ੀਮੈਂਟਾਂ ਵਲੋਂ ਆਪਣੀ ਵਿਲੱਖਣ ਹੋਂਦ ਦਰਸਾਉਣ ਲਈ ਇਹਨਾਂ ਪਰੇਡਾਂ ਵਿਚ ਹਿੱਸਾ ਲਿਆ ਗਿਆ।ਸਿੱਖ ਵਲੰਟੀਅਰਾਂ ਵਲੋਂ ਆਸਟਰੇਲੀਆਈ ਲੋਕਾਂ ਨੂੰ ਸਿੱਖ ਫੌਜ਼ ਵਲੋਂ ਪਾਏ ਯੋਗਦਾਨ ਤੋਂ ਜਾਣੂੰ ਕਰਵਾਉਣ ਲਈ ਵਿਸ਼ੇਸ਼ ਪ੍ਰੋਗਰਾਮ ਉਲੀਕੇ ਗਏ ਸਨ।ਸਿੱਖ ਸੇਵਾਦਾਰਾਂ ਵਲੋਂ ਸਿੱਖ ਫੌਜ਼ੀਆਂ ਦੀ ਵਿਸ਼ਵ ਜ਼ੰਗਾਂ ਦੌਰਾਨ ਦਿਖਾਈ ਸੂਰਬੀਰਤਾ 'ਤੇ ਝਾਤ ਪਾਉਂਦੇ ਕਿਤਾਬਚੇ ਵੀ ਵੰਡੇ ਗਏ।ਇਸ ਮੌਕੇ ਸਿੱਖ ਨੌਜਵਾਨਾਂ, ਬੀਬੀਆਂ ਅਤੇ ਬੱਚਿਆਂ ਵਲੋਂ ਫੜੇ ਹੋਏ ਖਾਲਸਾਈ ਝੰਡੇ ਅਤੇ ਬੈਨਰ ਲੋਕਾਂ ਦੀ ਖਿੱਚ ਦਾ ਕੇਂਦਰ ਰਹੇ।ਪੰਜਾਬੀ ਭਾਈਚਾਰੇ ਵਲੋਂ ਚਾਹ-ਪਾਣੀ ਦੇ ਲੰਗਰ ਦੇ ਵਿਸ਼ੇਸ਼ ਪ੍ਰਬੰਧ ਕੀਤੇ ਗਏ ਸਨ।